|
| 1 |
|
| Í-lī-hō͘ koh kóng: |
|
| 2 |
|
| Lín ū tì-hūi ê lâng, tio̍h thiaⁿ góa ê ōe; ū tì-sek ê lâng tio̍h chù-ì thiaⁿ. |
|
| 3 |
|
| Lán ēng hī-khang thiaⁿ-chhut ì-sù, ēng chi̍h chhì-chhut chu-bī. |
|
| 4 |
|
| Lán tio̍h piān-pia̍t sím-mi̍h sī tio̍h, bêng-pe̍k sím-mi̍h sī hó. |
|
| 5 |
|
| In-ūi Iok-pek kóng, “Góa bô m̄-tio̍h, Siōng-tè khiok kū-choa̍t góa ê sin-sò͘. |
|
| 6 |
|
| Góa bô m̄-tio̍h, I iáu khòaⁿ góa chòe pe̍h-chha̍t; góa bô kè-sit, iáu-kú siū-tio̍h bōe-i--tit ê siong.” |
|
| 7 |
|
| Siáⁿ-lâng chhin-chhiūⁿ Iok-pek móa-chhùi thí-chhiò, ká-ná teh lim-chúi? |
|
| 8 |
|
| I kap siâ-ok ê lâng tàu-tīn, kap pháiⁿ-lâng lâi-óng; |
|
| 9 |
|
| in-ūi i bat kóng, “Lâng in-ūi chhin-kūn Siōng-tè lâi hoaⁿ-hí, lóng bô lī-ek.” |
|
| 10 |
|
| Só͘-í, lín bêng-lí ê lâng, tio̍h thiaⁿ góa ê ōe. Siōng-tè choa̍t-tùi bōe chòe pháiⁿ; Choân-lêng-chiá it-tēng bōe kiâⁿ put-gī. |
|
| 11 |
|
| I ōe chiàu lâng ê hêng-ûi kā i pò-èng, chiàu lâng ê kiâⁿ-chòe kā i tùi-thāi. |
|
| 12 |
|
| Siōng-tè it-tēng bōe chòe m̄-tio̍h; Choân-lêng-chiá bōe tian-tò sī-hui. |
|
| 13 |
|
| Kiám ū lâng chí-phài Siōng-tè chiáng-koán tāi-tōe? Kiám ū lâng chiong choân sè-kài kau-tài I? |
|
| 14 |
|
| Siōng-tè nā chiong I ê sîn kap khùi siu-hôe, |
|
| 15 |
|
| só͘-ū ê lâng lóng ōe bia̍t-bông, lâng lóng ōe kui-thó͘. |
|
| 16 |
|
| Lí nā bêng-lí, tio̍h thiaⁿ góa kóng, àⁿ hī-khang thiaⁿ góa beh kóng ê ōe: |
|
| 17 |
|
| Siōng-tè nā iàm-ò͘ⁿ kong-pêng, I kiám ōe-tàng tī-lí? I sī kong-gī koh ū koân-lêng, lí kiám ōe-tàng kā I tēng-chōe? |
|
| 18 |
|
| Siōng-tè ōe-tàng tùi kun-ông kóng “Lí sī pháiⁿ-lâng”, tùi kùi-cho̍k kóng “Lín chin ok-to̍k”. |
|
| 19 |
|
| I tùi-thāi ū koân-sè ê lâng bōe phian-su, mā bōe tiōng-hù-kheng-pîn, in-ūi in lóng sī I ê chhiú só͘ chō--ê. |
|
| 20 |
|
| In tī pòaⁿ-mî hut-jiân sí--khì; Siōng-tè tī hūn-loān tiong kā in siau-bia̍t. I m̄-bián ēng lâng ê chhiú chiū ōe châu-bia̍t ū koân-le̍k ê lâng. |
|
| 21 |
|
| Siōng-tè ê ba̍k-chiu chù-ì khòaⁿ ta̍k-ê lâng ê lō͘, kàm-chhat in ê kha-pō͘. |
|
| 22 |
|
| O͘-àm á-sī sí-ìm, lóng bōe-tàng hō͘ chòe pháiⁿ ê lâng bih. |
|
| 23 |
|
| Siōng-tè m̄-bián tēng sî-kan, sûi-sî ōe-tàng tiàu lâng lâi siū I sím-phòaⁿ. |
|
| 24 |
|
| I m̄-bián chhâ-mn̄g chiū ōe-tàng thiat-tóe táⁿ-tó ū koân-le̍k ê lâng, siat-li̍p pa̍t-lâng lâi chiap in ê ūi. |
|
| 25 |
|
| In-ūi I chai in ê hêng-ûi; it-iā-chi-kan kā in chhia-tó, in chiū bia̍t-bông. |
|
| 26 |
|
| I tī chèng-lâng ê ba̍k-chiu chêng phah in, in-ūi in ê chōe kā in hêng-hoa̍t. |
|
| 27 |
|
| In phian-lī bô tè I, bô ài kiâⁿ I ê tō-lō͘, |
|
| 28 |
|
| tì-kàu sàn-chhiah-lâng âu-kiò ê siaⁿ thàu kàu I ê bīn-chêng; I ū thiaⁿ-tio̍h khùn-khó͘ ê lâng ê âu-kiò. |
|
| 29 |
|
| Siōng-tè nā tiām-tiām, siáⁿ-lâng káⁿ kā I chí-chek? I nā bīn oa̍t-cháu m̄ chhap lán, siáⁿ-lâng ōe tit-tio̍h I koàn-kò͘? Bô-lūn kok-ka á-sī kò-jîn, Siōng-tè lóng ū teh kàm-chhat, |
|
| 30 |
|
| chiah bián bô kèng-ùi I ê lâng chòe thóng-tī-chiá, hām-hāi jîn-bîn. |
|
| 31 |
|
| Lí kiám ū tùi Siōng-tè kóng “Góa í-keng siū hêng-hoa̍t, bōe koh hoān-chōe; |
|
| 32 |
|
| góa khòaⁿ bōe tio̍h--ê, kiû lí chí-sī; góa nā ū chòe m̄-tio̍h, góa bōe koh chòe”? |
|
| 33 |
|
| Kiám sī Siōng-tè só͘ chòe--ê bô chiàu lí ê ì-sù, lí chiah m̄ hóe-kái? Tio̍h koat-tēng--ê sī lí, m̄-sī góa; lí chai--ê, chòe lí kóng. |
|
| 34 |
|
| Bêng-lí ê lâng tùi góa kóng; tì-hūi ê lâng thiaⁿ góa ê ōe chiū kóng, |
|
| 35 |
|
| “ Iok-pek kóng--ê bô tì-sek, I ê ōe bô tì-hūi. |
|
| 36 |
|
| Iok-pek tio̍h thiat-tóe siū chhì-giām, in-ūi i ê ìn-tap chhin-chhiūⁿ siâ-ok ê lâng. |
|
| 37 |
|
| I chōe-siōng-ka-chōe, tī lán tiong-kan chè-chō khùn-jiáu, koh kóng chin chōe ōe te̍k-tùi Siōng-tè.” |
|
|
|
|