×

Ika Bible 2018

Jobu 34

1
Ya Ẹlihu nọzị sị:
2
“Gọn ni ntịn ihiẹn m rị e ku, ụnụ ndị nwọn uche; gọn ni m ntịn, ụnụ ndị marịn ẹkụkwọ.
3
Makẹni ntịn e lelezi oku e lele kẹ ọnụ dọn a danmịn ihiẹn-oriri.
4
Nị ẹnyi họrị nị nwan ihiẹn furuni; nị ẹnyi ile mụrụn nwan ihiẹn rị mma.
5
Makẹni Jobu sị, ‘Ẹka m rị ọchan, kanị Chuku a hangụọnị m eje-eṅẹn.
6
Ọsụọn'a nị ezioku kẹ m rị e ku, wẹ sị m wụ onyẹ-ntụ; ọsụọn'a nị onwọnni ihiẹn m mẹ, ọ rụgụọ m ẹhụ ghalẹni a la.’
7
Kanị, onyẹ mẹru Jobu eje-ihiẹn — Jobu hụn iku-arụ a sụọ kẹ mirin?
8
Ya lẹ ndị e mẹ eje-ihiẹn gba a kpa; ya lẹ ndị eje-ịhịan gba e mẹkọ.
9
Makẹni ọ sị, ‘Onwọnni erere ọ ban nị ịhịan rị e mẹ ihiẹn n'ọ sụọ Chuku.’
10
Gọn ni m nwan ntịn, ụnụ ndị nwọn nghọta. W'a sọ, Chuku ara mẹ eje-ihiẹn kaka! Onyẹ Hụ Nwọn Ikẹn Ile ara mẹ eje-ihiẹn kaka!
11
Ọ kụ ịhịan ụgwọ ihiẹn o mẹ; o mẹ ịhịan e gi isi e buru eje-obibi ẹ.
12
Onwọnzikwọnị ogẹn Chuku e gi mẹfie, Onyẹ Hụ Nwọn Ikẹn Ile ara han eje-eṅẹn.
13
Onyẹ tumẹ Chuku n'ọ kịma elu-ụwa? Onyẹ bu ụwa ile che ẹ ẹka kịma?
14
Omẹni o te chọ achọ, o weri mmọn a lẹ uzun o kunye imẹ ịhịan,
15
ịhịan ile a nwụnchanrịn, ịhịan ile e họnrinzi ẹjan mmakalaka.
16
Omẹni y'e nwọnghọ nghọta, nụ okuni; gọn ntịn ihiẹn m k'e ku.
17
Omẹni ize ezioku e ze Chuku, nị ọ s'ẹka kị? Onyẹ ahụn rị ọchan wụ dikẹn k'ị rị a hụn ihiẹn o mẹ?
18
Onyẹ hụn a sị ndị-nze, ‘Onwọnni ihiẹn ụnụ wụ’? Onyẹ hụn a sị ndị-isi, ‘Ụnụ jọ njọ’?
19
Ẹlẹ ịya wụ onyẹ hụn ghalẹni e gbeyeni ndị-ọkịkị, onyẹ hụn ghalẹni emẹyeni ọdanfịn a hapụ ogbẹnnyẹ, makẹni ya mẹmẹ wẹ ile?
20
W'a nwụnhụn idẹnmuzi, imẹ abalị; wẹ e mẹhunmẹ imẹ abalị, nke w'a gụ, e werigụọ wẹ ndị dikẹn bụ ẹlẹ ẹka ịhịan weri wẹ.
21
Ẹnya Chuku e legha ịhịan ebe ọwụlẹ ọ ghakọ; ọ hụn nzọmụkụ wẹ ile.
22
Onwọnni ebe gba ishi ẹnya a, onwọnni ebe wẹ sị ọ gbaka ishi ẹnya a, hụn ndị e mẹ eje-ihiẹn a nọ warị.
23
Ya wụ, ẹlẹ hụn Chuku k'e gi lelemẹzi ịhịan; ẹlẹ hụn w'e gi bịa ihun ẹ n'o kin wẹ ikpe.
24
O tikpọ ndị dikẹn bụ ọ jụnị wẹ ajụjụ, o tumẹ ndị ọzọ ọnọdị wẹ;
25
Makẹni ọ hụnchanrịn ihiẹn w'e mẹ, o gi imẹ uhinhin a karị wẹ ẹka, e tikpọ wẹ.
26
O ye wẹ afụnfụn njọ wẹ ebe ịhịan ile a nọ hụn wẹ,
27
makẹni e sọnbehigụọ w'a, onwọnzini ihiẹn wẹ kpọ ụzọ a ọwụlẹ.
28
E mẹ wẹ ndị igbẹnnyẹ kwan ẹkwan, o ru ẹ ntịn, nke wụnị ọ nụ ẹkwan ndị ahụn elu rị a fụ.
29
Ọ gba ịhịan nkịtịn, onyẹ k'a ma a ikpe? O bupụ ịhịan ihun, onyẹ k'a s'ẹka hụn a? Kẹ ịhịan kẹ alị?
30
O mẹ ẹ amamgbe ọkịkị a ban ẹka ndị ghalẹni a tụ egun ẹ, amamgbe wẹ e shisọnmẹni ndị alị wẹ ọnyan.
31
Ịhịan a rịọghọ nwan Chuku, sị, ‘E mẹọlẹ m njọ, kanị emẹkọzị m.
32
Kuzi m ihiẹn m ghalẹni as'ẹka a hụn; omẹni m mẹ eje-ihiẹn, emẹkọzị m’?
33
Ni Chuku mẹ nwan hụn i ku ra — hụnnị ị rị a jụ a jụshi ikẹn? Ịyụ nwọnzi nwan ku, ẹlẹ mmẹ; gwa m nwan ihiẹn i marịn.
34
Ndị nwọn nghọta rị e ku ẹ, ndị nwọn uche hụn rị a nụ ihiẹn m rị e ku sị m,
35
‘Jobu rị e ku kẹ onyẹ nwọnlẹni ihiẹn ọ marịn; ọnụ oku ẹ wụ ọnụ oku onyẹ nwọnlẹni nghọta.’
36
K'o furu wẹ lele Jobu ru alị, hụn o gi a shịarị nọkẹ eje-ịhịan.
37
Ọ hụ e fe isi e cheni njọ a; ọ hụ a fịan ẹka alị ẹ imẹ igunrun ẹnyi, a gwa Chuku eje-oku a gwacheni.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes