×

BIBULIYA ENTUKUVU

Yobu 35

1
Eliwu n'ayongera, n'agamba nti:
2
“Ggwe olaba ng'endowooza yo ntuufu, ggwe okugamba nti: ‘Mu maaso ga Katonda ndi mutuufu’?
3
Era ogamba nti: ‘Nfunamu ki? Ngasirwamu ki bwe soonoona?’
4
“Kale nze nzija kukuddamu, nnyanukulireko ne banno abali naawe.
5
Lalama eri eggulu olabe, tunuulira ebire ebitumbidde waggulu wo.
6
Bw'okola ekibi, kimukolako ki? Emisango gyo ne bweginaayongerwa obungi, omukosa wa?
7
Ye bwe weeyisa ng'omutuukirivu, kiki ky'oba omuwadde? Kiki ky'afuna mu mukono gwo?
8
Empisa zo embi zikosa muntu afaanana nga ggwe, n'obutuukirivu bwo buyamba bantu buntu.
9
“Bawanjaga olw'obungi bw'okunyigirizibwa; basaba obuyambi bateewuluzibwe mu mikono gy'ab'amaanyi.
10
Naye mpaawo agamba nti: ‘Katonda Eyankola ali ludda wa, awa ennyimba mu kiro,
11
atuyigiriza okusinga bw'akola ku bisolo by'omu nsi, n'atufuula bagezi okusinga ebinyonyi by'omu bbanga?’
12
Baleekaana eyo, naye tabaddamu olw'okwekuza kw'ababi.
13
Ddala bya busa, Katonda tabawulira; Omuyinza wa buli kantu tatunula nayo.
14
Oli na bubi okusinga, bw'ogamba nti tomulaba, omusango gwo guli mu maaso ge, olina kumulindirira;
15
na kati nti: ‘Obusungu bwe tebubonereza, era tafaayo n'akatono ku mwonoonyi.’
16
Awo nno Yobu ayasamiza bwereere akamwa ke; ayongera bungi ebigambo omutali magezi.”
Luganda Bible
BIBULIYA ENTUKUVU SECOND EDITION The Bible Society of Uganda, 2018.
:
Save Notes