×

Biblían 2007

JOBSBÓK 36

1
Elíhú tók enn til máls og sagði:
2
Andartak, ég ætla að segja þér dálítið, enn er margt ósagt um Guð.
3
Þekkingu mína ætla ég að draga langt að og sýna fram á réttlæti skapara míns.
4
Orð mín eru sannarlega engin lygi, hjá þér er sá sem býr yfir fullkominni þekkingu.
5
Guð er voldugur en fyrirlítur engan, hann er voldugur að mætti og speki.
6
Hann gefur ekki óguðlegum líf en lætur umkomulausa ná rétti sínum.
7
Hann hefur ekki augun af réttlátum en setur þá í hásæti með konungum, ævinlega, og þeir verða mikils metnir.
8
En hafi þeir verið lagðir í hlekki, reyrðir í reipi þjáningarinnar,
9
setur hann þeim verk þeirra fyrir sjónir og misgjörðir því að þeir hreyktu sér.
10
Hann opnar eyru þeirra og vandar um við þá, hvetur þá til að hverfa frá vonsku sinni.
11
Ef þeir hlýða og þjóna honum lýkur ævidögum þeirra í velsæld og árum þeirra í unaði.
12
En hlýði þeir ekki fara þeir yfir fljótið til undirheima og deyja í vanþekkingu.
13
Guðlausir í hjarta ala á heift, þeir hrópa ekki á hjálp þegar hann fjötrar þá.
14
Ævi þeirra lýkur í æskublóma og lífi þeirra lýkur meðal hórsveina.
15
Guð bjargar hinum þjáða með þjáningum hans, opnar eyra hans með áþján.
16
Þig dró hann einnig úr gini þjáninga, út á víðlendi þar sem engin þrenging er. Borð þitt er hlaðið feitmeti
17
en þú færð fylli þína af sama dómi og guðlausir, dómur og réttlæti halda þér í skefjum.
18
En gættu þín, láttu ekki ginnast af allsnægtum og ekki tælast af mútum.
19
Mun auður þinn leysa þig úr nauðum eða afl þitt reynt til fulls?
20
Þráðu ekki nóttina þegar þjóðir verða að halda frá byggðum sínum.
21
Gættu þín, snúðu þér ekki að illu því að þess vegna varstu reyndur með þjáningu.
22
Guð er upphafinn í mætti sínum, hver getur kennt eins og hann?
23
Hver getur vísað honum til vegar? Og hver getur sagt við hann: „Þú hefur breytt rangt.“
24
Mundu að tigna verk hans sem menn syngja lof.
25
Allir menn horfa fagnandi á það, hinn dauðlegi sér það úr fjarska.
26
Guð er meiri en vér getum skilið, óteljandi eru ár hans.
27
Hann safnar saman vatnsdropum, þeir hreinsast og verða regn
28
sem streymir úr skýjunum og fellur yfir mannfjöldann.
29
Hver skilur rek skýjanna og þrumugnýinn frá bústað hans?
30
Hann breiðir um sig birtu sína og hylur botn hafsins.
31
Því að þannig dæmir hann þjóðirnar, gefur þeim gnægð matar.
32
Leiftrandi elding hylur lófa hans og skipun hans beinir henni í mark.
33
Þruma hennar segir frá honum og búféð boðar komu hans.
Icelandic Bible 2007
2007 Icelandic Bible Society
:
Vista Skýringar