×

Ika Bible 2018

Jobu 37

1
“O mẹ obi a dụ m kpum-kpum — lekẹ sị akpobi e d'a dọbepụ m.
2
Gọn ntịn! Gọn ntịn olu ẹ rị e dẹnni, ihiẹn rị a gha a ọnụ e dẹnpụha.
3
O mẹ amụma a e besọnmẹ ebe ile rị okpuru igwere, e zizi ẹ e jẹn ebe ụwa ru —
4
Ogẹn hụ k'o gi e dẹnmẹ; o gi olu ẹ pụ ichẹn wụ akpara (akpabọ) ku. Olu ẹ han, ọ hangbarị.
5
Olu Chuku wụ akpara a tụ ẹnya; o mẹsọnmẹ okẹn ihiẹn hụn ẹnyi ghalẹni as'ẹka a ghọta.
6
Ọ sị mirin oyi ọchan wụ sno hụn a kpụkpụrụnị, ‘Ziẹntu,’ ọ sị mbụmbụ-mirin, ‘Họnrin okẹn-mirin.’
7
O mẹ onyẹ ọwụlẹ rụnbehi ọrụn, kẹni ịhịan ile o ke hụn ọrụn ẹka a;
8
anụmanụ e shi d'a warịsọnmẹ, tọ ebe w'a nọdị.
9
Okẹn ẹbi a gha ọnọdị a a kpọha; ufere oyi a gha ẹbamịn-ugu e fehẹ.
10
Uzun Chuku e kun e mẹ mirin a kpụrụ, e mẹ iyi hi-ogbe a kpụrụ.
11
O mẹ mirin e jun ẹkpa mirin rị igwere; o mẹ amụma a a nọ imẹ orukpu e begbarị.
12
W'a ghahunmẹ ohi-ohi k'o dọn gwa wẹ, elu-ụwa ile e mẹ ihiẹn ọwụlẹ ọ sị wẹ e mẹ.
13
O zi orukpu n'o gi ẹ ye ịhịan afụnfụn mọbụ n'o gi ẹ mẹ mirin zueyen'ẹ alị mọbụ n'o gi ẹ ghọsị a ihiẹn-ọsụsụọ a.
14
Jobu, gọn-ntịn n'ị nụ ọnwan: cheri, lekpọ ihiẹn a tụ ẹnya Chuku a rụnsọnmẹ.
15
Y'a marịnghọ kẹ Chuku dọn a kị orukpu rị igwere, e mẹ amụma a e be?
16
Y'a marịnghọ kẹ orukpu rị igwere dọn kọnrinsọnmẹ imẹ elu; ihiẹn a tụ ẹnya, hụn Onyẹ Hụ Nwọnzu amamihiẹn mẹmẹ?
17
Ịyụ hụn ọbanje e su ọda-ọda hụn ufere ndịdan-mirin gihụ febehi ihiẹn ile e mẹhunmẹbehi —
18
n'ị sa nwan ẹka mẹmẹ orukpu hụn o mẹmẹ, mẹ ẹ ze kẹ ughegbe igwe-bronzu?
19
Gwa nwan ẹnyi ihiẹn ẹnyi k'a gwa Chuku; onwọnni ihiẹn ẹnyi k'a s'ẹka kin, makẹni ẹnyi rịhụ a sụọ ishi — onwọnni ihiẹn ẹnyi marịn.
20
Nị ịhịan gwama Chuku ya gọn ntịn nị m chọ nị m ku oku? Ya wụ nị hụnyẹ chọkọ nị Chuku luepụ a nụ.
21
Onwọnni onyẹ a s'ẹka bu ẹnya zinmẹ ẹnyanwụn mmakalaka, hụn rị imẹ igwere e ti, hụn ufere gihụ mẹgụ ihun igwere fọn.
22
Ọ gha ẹbamịn-ugu a bịa nọkẹ ebe ezigbo goru nọ e gbuke — ọghọ a tụ egun fihunmẹ Chuku.
23
Ẹnyi asakọ ẹka nọkunmẹdẹ Onyẹ Nwọn Ikẹn Ile, makẹni o hikẹ ogbe; onyẹ ezioku lẹ onyẹ ezi-omumẹ pụ-ichẹn k'ọ wụ, onwọnni onyẹ ọ bịangbu.
24
Ya kẹ ịhịan ile gi a tụ egun ẹ, makẹni onwọnni ihiẹn ọ kpọ ndị ro n'a marịnka wẹ ihiẹn.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes