×

Ekitabo Erikwera 2008

Yobu 37

1
Kandi ebi nabyo nibireetera omutima gwangye kutetema n'okwesikura.
2
Nimuhurire okuhinda kw'eiraka rya Ruhanga n'okurigita kw'omu kanwa ke.
3
Akwohereza, kubuga eiguru ryona; n'okutyankana kw'emirabyo ye kuhika aha mbaju zoona z'ensi.
4
Ku kuhwa, eiraka rye rigamba, arigitsa eiraka rye ry'ekitiinisa. Kandi ku rihurirwa, tazibira murabyo kutyankana.
5
Ruhanga ahindisa eiraka rye omu buryo burikutangaaza; akora ebintu bikuru, ebi tutarikubaasa kwetegyereza.
6
Agira orubaare ati: Gwa aha nsi! Agira orutoonyerera n'enjura ati: Mugwise amaani!
7
Azibira abantu kuba barekire emirimo yaabo; ngu boona bamanye ebi arikukora.
8
Enyamaishwa ziza omu bweshereko bwazo, ziguma omu maaya gaazo.
9
Omuyaga gw'akasooroora guruga obukiizi-bwa-buryo; n'embeho enyababa ereeterwa obwa bumosho.
10
Omwitsyo gwa Ruhanga gureetera amaizi kukwata, n'amaizi gakwatana aha ruguru yaago.
11
Ekicu kikwatsire akiijuza omurombe, ebicu bibuzya hoona emirabyo ye.
12
Ekora oku n'oku, nk'oku arikugihabura; ngu ebone kuhikiiriza byona ebi yaagiragiira omu nsi etuurwamu abantu.
13
Ebyo abiikiriza kubaho ahabw'okuhana abantu; nari ahabw'okwitirira ensi ye, nainga ahabw'embabazi ze.
14
Iwe Yobu, hurira eki, ba orekire, obanze oteekateekye aha by'okutangaaza ebi Ruhanga akora.
15
Ebyo noomanya oku Ruhanga abiteeraho ekiragiro, akaragiira omurabyo gw'omu kicu kye kutyankana?
16
Noomanya okuzeereera kw'ebicu ku kuri omurimo ogu Ruhanga akoresa obwengye burikutangaaza?
17
Iwe, ou ebijwaro biitsa empiita, ensi yaagira obucureera ahabw'omuyaga gw'omu bukiizi-bwa-buryo,
18
noobaasa kubamba eiguru nkawe, rikaguma nk'endeeberwamu eheesirwe?
19
Otwegyese eki turaamugambire, ahabw'okuba turimbagiriirwe, titurikubaasa kutebeekanisa ebi turaagambe.
20
Ebyo bakaamugambira ku ndikwenda kugamba nawe? Mbwenu shi iwe, omuntu areetengire kumarirwaho kimwe?
21
Reeba, na hati abantu tibarikubaasa kureeba omushana gurikujwera ahaiguru, omuyaga gwaheza kuhingura, gwakinguura ebicu.
22
Aha bukiizi-bwa-bumosho niharugayo ekirikwengyengyeta nk'ezaabu; Ruhanga ajwaire obukuru burikwitsa obwoba.
23
Ow'obushoboorozi bwona titurikubaasa kumuhika. Ni mukuru, aine obushoboorozi n'obwinganisa, kandi ahabw'okuba ahikiriire kimwe, tarikubaasa kutura muntu busha.
24
Nikyo abantu bamutiinira; ahabw'okuba tayeta ha bantu abeemanya ku bari abanyabwengye.
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes