|
| 1 |
|
| Si du Yekova ki karaga pai fu Eyobo rogo bakamikami yuge yo, ki ya: |
|
| 2 |
|
| “Da nga gi ni re naoka rondo na agu apai zanga inahe? |
|
| 3 |
|
| Mo vódi nga tiro awere wa kumba; bambiko mi asána ro, mo ki taki pande pai fere. |
|
| 4 |
|
| “Wari mo adu ni ni gu rago mi amoi mburu kpotosende? Mo gúmba ha fere, ka mo du na rugatinapai. |
|
| 5 |
|
| Da naringbisi bakiaha―ati mo ini he, te! watadu gini boro nataĩ gire ri he? |
|
| 6 |
|
| I amoi amburu he ku auru gine, da namoi mbia tukpu he? |
|
| 7 |
|
| ni gu rago ho akerekuru ngbawiso abi bia ni wa sa, awiri Mbori dunduko ki ningbiko ni ngbarago. |
|
| 8 |
|
| “Da nakisi abaime na angbadimoho, ho si agbadi ni, wa ka si kuru rukumbu yo? |
|
| 9 |
|
| ho mi amoi dubo ni ni gaha roko, na nanaga bitimo ni gaha gbanga tambara tipa ha, |
|
| 10 |
|
| ki ringbisi bangbandarago tipa ha, ki moi angbongboho na angbadimoho, |
|
| 11 |
|
| ki ya, ‘Kono mo ka ye ku ho ni, ono ku mbata yo te, kina eré ngambi ga ruka ka nye ni’. |
|
| 12 |
|
| “Mo arugu wiso wa ga rame atona, ki yugu pai fu ngbatutu si ini ba ha? |
|
| 13 |
|
| ya si da ti digida kpotosende, ka zigizo gbegberẽ aboro rogo? |
|
| 14 |
|
| Si sa tihe wa pere tii dikadika ha yo; ahe dunduko ki ru wa roko. |
|
| 15 |
|
| I ki si imarago be gbegberẽ aboro, gu be tumba yo ku ari si kuadi. |
|
| 16 |
|
| “Mo arimi ku rogo gugaabi yo nga ga baime? Watadu mo ata ku rogo dudungura rago yo? |
|
| 17 |
|
| Ngbadimo kpio du ni kusikusi he foro? Watadu mo abi ba angbadimo nduunduu bitimo? |
|
| 18 |
|
| Mo rugu tiro na pa waĩ du bakia kpotosende? Mo péke nga ha, ka mo ini pa agi apai re dunduko. |
|
| 19 |
|
| “Wari du gene ni koyo imarago naraka ni? na wari du ba bitimo ni, |
|
| 20 |
|
| ya mo ndu na ni dati kina digida ha, ki ini pa agene koyo du gaha bambu ni? |
|
| 21 |
|
| Kangu ti ni te, mo ini he, bambiko yo i avungu ro ni, gedigedi gamo arame ni badungu he! |
|
| 22 |
|
| “Mo arimi ku rogo ga nana pusi mai baiga ũkumuko yo, watadu mo ini gu baiga ũkumuko nga ga morogumba? |
|
| 23 |
|
| gu mi nabanda tipa rago fudifudipai, tipa gu uru nga ga vura na sovura. |
|
| 24 |
|
| Wari du gu gene ni yo imarago nakparaka ni? wari du gu ba yo yuge uroyo nakparaka ni ku auru kpotosende? |
|
| 25 |
|
| “Da nasari gene fu fufu mai, na gene fu ikpiragumba? |
|
| 26 |
|
| ka ye na mai ku rogo gu ringara adu nga aboro ni ya, na ku rogo gu ngbakungba adu nga aboro ni ya; |
|
| 27 |
|
| ka ungasi ngbakungba na bate; ka manga sende si kusi nvuo. |
|
| 28 |
|
| “Bavungu mai ti ni? na da navungu togotogo ndomo? |
|
| 29 |
|
| Rukumbu da yo zerarago aye ni? Na gu dododo kputakputa pusi mai nga ga ngbangbaturũ, da nabatika ha? |
|
| 30 |
|
| Aime sa tihe nyanyaki wa mbia, bangiri ngirimo ki kputa wa morogumba. |
|
| 31 |
|
| “Mo rengbe ka vo badona agu akerekuru nga Periade, watadu ka zaka gire ti Oriona? |
|
| 32 |
|
| Mo rengbe ka kusa aMazarota ti regbo ra? Mo rengbe ka gasa Urisi na awiru? |
|
| 33 |
|
| Mo ini agu andika nga ga angbangbaturũ? Mo rengbe ka mbakada gu zogarago du yo wo auru kpotosende no? |
|
| 34 |
|
| “Mo rengbe na tumba fugoro si da ku amai yo, bafufu mai wandia ku ri ro? |
|
| 35 |
|
| Mo rengbe ka keda aikpira gumba, ya si ndu, si ki ya foro, ‘Ani du re’? |
|
| 36 |
|
| Da namoi tatamana ku rogo adubo? watadu da nafu rugatinapai ku rogo ndomo yo? |
|
| 37 |
|
| Da rengbe ka geda amai be gani tatamana? Watadu da rengbe ka uka mai rogo agu amanguhe du ngbangbaturũ yo, |
|
| 38 |
|
| ho nvutu nata guta ha ni, aunduhe ki me tihe wa sa nyanyaki. |
|
| 39 |
|
| “Mo rengbe ka gbata pasio fu nabahu? watadu mbisa ga paranga abahu gomoro, |
|
| 40 |
|
| ho ami nipiki ni rogo gaami asima, watadu ka sunguda anya rogo gaami bagbuko? |
|
| 41 |
|
| da ninafu riahe tipa akoya, ho awira nakpara ni fu Mbori, ki nita tipa zingo riahe?” |
|
|
|
|