×

Ziazia Kekeapai 1978

Eyobo 39

1
“Mo ini pa gu rago ameme mbia nuvunga ti ni? Mo rengbe ka kparia pa gu rago unuungbiimo navunga awira ti ni?
2
Mo rengbe ka geda agu adiwi gaami rago vunga nadiga ti ni? mo ini pa gu rago ami navunga ti ni,
3
ho ami nanugadi ni, ka vunga awira? Ami ki bati be ima.
4
Awira nanyaka, ki nisono haurago yo; ami nandu, ka ami akaraga nga tira fuo anara berewe ya.
5
“Da kedi adongi nvuo ami nita ni sa ra? Da zaki gire ti miipi adongi nvuo
6
nga agu ra mi atu ngbakungba fu ra ni gaami rago, na ndõo ni gaami baraka?
7
Ami napayasi pa gu gbarakagbaraka pai nga ga bakporo, ami agia nga gu tatangba nga ga barugu pa sunge a te.
8
Ri abaagangara yo du gaami banambu ni, ami nagbata iwo ahe dunduko.
9
“Ka gbeẽ du na ngbarago ka manga pa ro? U asúnga pati ga gamo anya sanduki riahe yuru?
10
Mo rengbe ka vo ru na gire ku due bino yo, watadu u abúkia sende ngboongboorago ngba fuo ro?
11
Mo akída kuti ru, bambiko u du na bakere ome ki mbu ga sunge ku be ru?
12
Mo ini he, ya u ayega na ga tunga ku kporo no, ki dungura ga zende ahe ku baigita ahe yo?
13
“Wa pupo surutio nado bukebuke; puporu na sueru na nyemuse ti ni?
14
Bambiko u mbu apararu ri sende, si foi be nvutu sende,
15
bangiriru ki go ti gu pai nga ndue asi he, watadu anya nvuo asumbusa ha.
16
U nazinga kuti awiru, wa du nga ami wa awiru te; ka gau sunge vura du gbua vuru, u agunde nga te;
17
bambiko Mbori mangi ru bangiriru go ti tatamana, ko afu nga rugatinapai fu ru a te.
18
Ni gu rago u naguari sa oto, u napayasi pa farasi na banduriru a.
19
“Mo nafu ga farasi tandu fu ru? Mo naukadi goru na mange nzangbaru?
20
Mo nasa ru u gu wa yere? Iriwo gbokororu du ni kere he.
21
U nade sende ngboongboorago yo ni sukuturu, ki ningi be omeru; u nakura ka gbia aũvura.
22
U namoma gunde amoma, ka u akio nga ya; u asa nga tiru ku sa yo be basape te.
23
Kpokoro nawo awo pavuru, baso nakĩ na andigba imaima.
24
U nambira sende be gau nzengerenzengere erã; u arengba nga ka ru zaa ti woro nambongo te.
25
Ho nambongo apaa ni u naya, ‘Ha, ha!’ U nagia fuõ vura tuturũ, gu woro sumba gumba nga ga abarutirivura, na tatangba a.
26
“Bakiki nayanga be ga tatamana, ki nizaraga puporu ku sudiyo?
27
Dingimo nagu ku ari yo kuti ga rugapai, ki dua bamburu ku ari yo gbe?
28
U naraka ri mbia yo, yo du bamburu ni, kuti ngbaho mbia yo rogo nyanyaki ba.
29
Yo u namaa rago ni tipa nya ka zia ru; bangiriru nabi he tuturũ ku sa yo.
30
Awiru nanyora kina kure a; yo du akangba ni, yo du u ni a.”
Zande Bible 1978
La Sainte Bible en Zande Alliance Biblique Universelle, 1978
:
Save Notes