×

Ika Bible 2018

Jobu 4

1
Ya Ẹlifazị onyẹ Tẹmanị nọ sị:
2
“Dodo, omẹni ịhịan sị n'ọ gwa ị ẹkẹrẹ oku, n'o ze i ize? Onyẹ k'a sa nwan ẹka gbachanrịn nkịtịn?
3
Nyanhankwọ nị y'a dụngụọ ndị bu ọda ọdụn, y'e mẹgụọ ẹka ndị zelẹni kẹnrẹn.
4
Oku-ọnụ ị a ghọdọngụọ ndị te kpọgburuni; y'e mẹgụọ mkpụkụ ndị zelẹni kẹnrẹn.
5
Nsọngbu a bịan'ị nwan, ndụn a gụ ị; o rugụọ ị nwan ẹhụ, ẹhụ a rọ ị.
6
Y'a nịkọ egun-Osolobuẹ rị imẹ i mẹ obi ru i alị? Y'e gikọ obibi nwọnlẹni nkọrịanị ị rị e bi nwọnrin olilẹnya?
7
Lee nwan ẹnya: Onyẹ kẹ ẹka a rị ọchan latu iwi? Gwalele m: O nwọntughọ onyẹ ẹka a rị ọchan la ntikpọ?
8
A hụnọlẹ m'a nị ndị hụn kụn eje-ihiẹn lẹ ndị ghaye nsọngbu, a ghọrị a.
9
Chuku kunhụ uzun kpu wẹ, a la wẹ iwi; o gi olulu ẹ mẹ wẹ ihiẹn, nke wẹ a gụ.
10
Ẹwọrọ nwọn ikẹn dẹn, dẹnchanrịn ihiẹn ahụn ile o dẹn, kanị eze okoro-ẹwọrọ e tikwọn etikwọn.
11
Ẹgụn e gbudẹ ẹwọrọ egbu; ụmụ onyẹnnyẹ-ẹwọrọ a gbayịyadẹ agbayiya.
12
“Wẹ gi nzuzue wẹhẹni m ozi, ọ nọ feban m ntịn.
13
Ebe nrọ m rọ rị e hue m uhue imẹ uhinhin, ogẹn hụ okẹn ụran gi e buru ịhịan,
14
egun nọ tụma m, ẹhụ a mama m nni, mẹ ọkpụkpụ m ile mẹhunmẹ.
15
Ihiẹn ohu nọ ghafe m ihun lekẹ ufere, akpata-oyi nọ gba m.
16
Ọ kụsị, kanị amarịn m ihiẹn ọ wụ. Ihiẹn ohu nọ wuzo ihun m, m nọ nụ kẹ olu ohu rị e ku ẹkẹrẹ-ẹkẹrẹ, a sị:
17
‘Nị ịhịan a nwụnnị kadẹ Chuku ọchan a rị ra? Nị ịhịan rịnahịn Onyẹ ken'ẹ ọchan?
18
Omẹni Chuku egini idibo ẹ dọn ẹnya; omẹni ndị mmọn-ozi ezun'ẹ oke ẹnya —
19
kị wụzị ịhịan hụn bi ẹhụ wẹ gi ụrụa kpụ, ẹhụ wẹ gi uzunzun gbe iyetọ a, hụn kadẹ nfe ogwepịa karị akpụkpa?!
20
Eki fọn, a mụ wẹ wẹ; eki gini e gi, e tipipịagụọ wẹ wẹ; wẹ gini d'a marịn, a lagụọ wẹ iwi jẹnrin ejẹn.
21
Wẹ huepụhụ ụdọ wẹ gi limẹ ụlọ ahụn w'a kpụkpọrị hụn wụ ẹhụ wẹ, a nwụnhụn wẹ bụ onwọnni ihiẹn wẹ marịn?’
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes