×

現代台語譯本羅馬字版

約伯記 40

1
Siōng Chú koh tùi Iok-pek kóng:
2
Hò͘ⁿ-piān ê lâng kiám thang kap Choân-lêng-chiá cheng-lūn? Ài chí-chek Siōng-tè ê, taⁿ lí tio̍h ìn.
3
Iok-pek chiū ìn Siōng Chú kóng:
4
Góa chin bî-sòe, góa ōe-tàng ìn-tap lí sím-mi̍h? Góa ēng chhiú ng góa ê chhùi.
5
Góa í-keng kóng chi̍t piàn, bô ōe thang ìn; góa í-keng kóng chhiau-kè, m̄-thang koh kóng.
6
Siōng Chú chiū tùi kńg-lê-á-hong tiong-kan ìn Iok-pek:
7
Tio̍h chún-pī hó-sè, chòe chi̍t ê tāi-tiōng-hu; góa mn̄g lí, lí tio̍h ìn góa.
8
Lí sī beh hó͘-tēng góa ê chhâi-koat, chí-chek góa m̄-tio̍h, lâi chèng-bêng lí ka-kī sī tio̍h o͘h?
9
Lí kiám ū chhin-chhiūⁿ Siōng-tè hiah ū-la̍t ê chhiú-kut? Lí kiám ōe chhin-chhiūⁿ góa hoat-chhut lûi lōng-lōng-háu ê siaⁿ?
10
Án-ni, tio̍h ēng chun-êng ui-giâm lâi chng-thāⁿ, ēng êng-kng chun-kùi chòe saⁿ chhēng.
11
Tio̍h piàⁿ-chhut lí móa-pak ê siū-khì, khòaⁿ-tio̍h it-chhè kiau-ngō͘ ê lâng, tio̍h hō͘ in khut-kē.
12
Khòaⁿ-tio̍h it-chhè kiau-ngō͘ ê lâng, tio̍h kā in khiú--lo̍h-lâi, tī pháiⁿ-lâng ê tōe-pôaⁿ kā in thún-ta̍h.
13
Tio̍h kā in chòe-chi̍t-ē tâi tī thô͘-tóe, kā in lóng koaiⁿ tī Im-kan.
14
Án-ni, liân góa mā ōe sêng-jīn, lí ū khùi-la̍t kiù lí ka-kī.
15
Lí khòaⁿ hô-bé, góa chō lí, mā chō i; i chhin-chhiūⁿ gû chia̍h-chháu.
16
I ê khùi-la̍t chāi-tī io; i ê la̍t chāi-tī pak-tó͘-kun.
17
I ê bé-liu khiàu--khí-lâi chhin-chhiūⁿ pek-hiuⁿ-chhiū; i ê tōa-thúi-kun chho͘-ióng;
18
i ê kut-thâu chhin-chhiūⁿ tâng ê kóng; i ê sù-chi chhin-chhiūⁿ thih ê thiāu.
19
I sī Siōng-tè ê kia̍t-chok; chí-ū i ê Chhòng-chō-chiá ōe-tàng kā i chè-ho̍k.
20
Tōa-soaⁿ sió-soaⁿ kiong-kip i chia̍h-mi̍h; chhân-iá ê pah-siù tī hia thit-thô.
21
I tó tī liân-hoe-hio̍h kha, khùn tī kui-phō lô͘-tek ê chúi-khut lāi.
22
Liân-hoe-hio̍h kā i jia--teh; khoe-piⁿ ê liú-chhiū kā i ûi--teh.
23
Hô-chúi hoàn-lām, i mā m̄ kiaⁿ; Iok-tàn-hô tiòng kàu i ê chhùi, i mā chū-chāi.
24
Siáⁿ-lâng ōe-tàng tī i ba̍k-chiu kim-kim ê sî kā i lia̍h--tio̍h, á-sī ēng kau-á kǹg-kè i ê phīⁿ?
Chinese TTVR
The Bible Society in Taiwan
:
保存笔记