Ak kingo kagomwachi Jehovah Job ng’alechuto, kolenji Jehovah Elipas Temanindet, Kalalyo neregekyuk agobo inye, ak choronoguk tuwai: amu ma omwa kit ne bo iman agobo ane, ko u ye kamwa otwogindennyu Job.
Onam anyun kirugik tisab, ak mengichik tisab, ak okweri koba oldab Job otwogindennyu, ak ogoitochige koek kagochinet ne kibeelei; si kosaiywok Job otwogindennyu; amu kachamji, si mayaiywok ko u abusnateng’wong’; amu tom omwa kit ne bo iman agobo ane, ko u ye komwa otwogindennyu Job.
Kobwa werik tugul che tupcho, ak chepkametisiek tugul, ak bik tugul che kiingen ge, ak koamisie gonnyi koboto inendet: ak korirji inendet, ak kogaigai inendet agobo yaitiet tugul ne kiipchi Jehovah inendet: kiigochi chi age tugul fedaiyat, ak kogochi chi age tugul peteitab tahabu.
Kiiberur anyun Jehovah betusiek che bo let che bo Job kosiir betusiekyik che bo tai: amu kitinyei kechirek elfusiek taman ak ang’wan, ak tambesik elfusiek lo, ak eik elfusiek aeng’ che bo chogit, ak iyuogik elfut che bo sigirok.