Ak kingo kagomwachi `Kamuktaindet ne Toroor Job ng'aleechuuto, koleenji `Kamuktaindet ne Toroor Eliphas Temanindet, “Kaanereekyin inyee ak choronoguk tuwai; amu ma omwa kiit ne po iman agobo anee, ko uu ye kamwa otwogindennyu Job.
Onam anyun kiruugik tisap, mengichik tisap ak okweri koba kap Job otwogindennyu, yeityo ogoitochigei koek kagoochinet ne kibeelei; si kosaiywok Job otwogindennyu. Amu kachamji, si ma yaiywok ko uu abusnateng'wong'; amu tomo omwa kiit ne po iman agobo anee, ko uu ye komwa otwogindennyu Job.”
Ki pa anyun Eliphas Temanindet, Bildad Suindet ak Sopa Naamatindet, koyai ko uu ye ki ng'at Kamuktaindet ne Toroor: ak kitaach `Kamuktaindet ne Toroor Job.
Kowal anyun `Kamuktaindet ne Toroor ratetap Job, ye kingo sa agobo choronokyik. Ki igoochi `Kamuktaindet ne Toroor Job konyil aeng' kosiir che ki tinyei eng' tai.
Kobwa weeriik tugul che tupcho, chepkametwagik tugul ak piik tugul che ki ingengei ak koamisye koonnyi kobooto ineendet. Ki riirchi ak kogaigai ineendet agobo yaityet tugul ne ki ipchi `Kamuktaindet ne Toroor ineendet. Ki igoochi chii age tugul fedhaiyat ak kogoochi chii age tugul peteitap thahabu.
Ki iberuur anyun `Kamuktaindet ne Toroor peetuusyek che po let che po Job kosiir peetuusyekyik che po tai, amu ki tinyei keechiirek eliphuusyek taman ak ang'wan, tambeesik eliphuusyek lo, eiik eliphuusyek aeng' che po chogit ak iyuogik eliphuut che po sigiroik.