Kɛ kɔr kä mëë ci Kuoth ti diaal ti̱ti̱ thuk kɛ lär I-yob, cuɛ ruac bä kɛ Ɛ-li-padh raan wec Te-man wëë i̱, “Bi ŋɛ̈ɛ̈nydä rɔ tok kɛ ji̱ yɛnɛ mäthniku da̱ŋ rɛw, kɛ ɣöö /ken yɛn lat ni min la thuɔ̱k kɛ kui̱dä, ce̱tkɛ mëë ci ja̱ŋdä ni I-yob ɛ lat.
Täämɛ yɛn naŋɛ thääk ɣɔ̱ɔ̱k da̱ŋ bärɔw kɛnɛ thääk deet da̱ŋ bärɔw wiaa kä ja̱ŋdä ni I-yob kä thöpɛ kɛ ala muc ti waŋkɛ kɛ kui̱dun. Kä bi ja̱ŋdä ni I-yob pal kɛ kui̱dun kɛ ɣöö bä palɛ nhɔk, kä /cä bi lät kɛ yɛ ce̱tkɛ ciaaŋ dɔ̱ɔ̱rädun. Kɛ ɣöö /ken yɛn lat ni min la thuɔ̱k kɛ kui̱dä ce̱tkɛ mëë ca lat ɛ ja̱ŋdä ni I-yob.”
Kä cu, Ɛ-li-padh raan wec Te-man, kɛ Bil-dad raan wec Cuwa, kɛnɛ Dho-par raan wec Naamaa wä, kä cukɛ jɛ la̱t ce̱tkɛ min ci Kuoth ɛ la̱rkɛ. Kä cu Kuoth pal I-yob nhɔk.
Kä cu Kuoth ria̱ŋ I-yob nyɔk kɛ käm jɛ, mëë cɛ pal kɛ kui̱ mäthnikɛ. Kä cu Kuoth ria̱ŋ I-yob jakä di̱t ɛlɔ̱ŋ a leny ɛ ria̱ŋ ëë nhiam ëë ci kɔŋ tekɛ jɛ ni wal nikä rɛɛw.
Kä cu dämani, kɛnɛ nyimani, kɛ nɛɛkɛ diaal tëë ŋa̱ckɛ jɛ, kä ci kɔŋ mi̱th ni kɛɛl kɛ jɛ cieŋdɛ ben kä jɛ. Kä cukɛ jɛ ben nyuɔ̱th nhök mi di̱i̱t kä com kɛn ɛ kɛ tëë diaal tëë ci Kuoth kɛ pa̱l tuɔɔk kä jɛ. Kä cu kɛ jɛ moc kɛ yio̱w kɛnɛ tiil dääpä kɛ̈l kɛ̈ɛ̈li ni kɛn diaal.
Kä cu Kuoth ni̱n I-yob tin jɔak poth ɛlɔ̱ŋ a leny ni ni̱nkɛ tëë jio̱l. Kä cuɛ tekɛ rɔɔm ti bathdɔɔri wäl wi̱cdɛ ŋuaan, kɛ thɔ̱a̱rɔa̱a̱li ti bathdɔɔri bäkɛl, kɛ thääk ti bathdɔɔr kɛl, kɛ ŋut muɔ̱li ti bathdɔɔr kɛl.
Kä cu I-yob lɛ tëk kɛ run ti kuɔ̱r wi̱cdɛ jiɛn da̱ŋ ŋua̱a̱n kɛ kɔr ɣɔ̱ɔ̱nädɛ. Kä cuɛ gaatkɛ, kɛ gaat gankɛ, kɛ gaat gan gankɛ nɛn. Kɛn bëër da̱ŋ ŋuaan diaal cuɛ kɛ nɛn.