×

Ika Bible 2018

Jobu 5

1
“Ọ sụọ ị y'a hị — onyẹ jẹnkọ d'a za ị? Elee mmọn-ozi k'i burukọ nwan?
2
Iwe-ẹnya e gbu onyẹ-nzuzu; ẹnya-ụfụ e gbu onyẹ marịnlẹni ihiẹn.
3
Mmẹ nwẹn a hụngụọ kẹ onyẹ marịnlẹni Osolobuẹ gbọrịma, kanị idẹnmizi Osolobuẹ nọ bụ ikpụlọ a ọnụ,
4
ụmụ a nọ rị imẹ nsọngbu, wẹ hụ e mẹgbu wẹ imẹ ụlọ-ikpe — makẹni enwọn wẹ onyẹ e kuni wẹ ọnụ wẹ.
5
Ndị ẹgụn e ripụ ihiẹn-ugbo ẹ, kẹ hụn ogun fịfịmadẹ; ọ hụ a gụn wẹ kẹ mirin nị wẹ weridẹ akụ-lẹ-ụba a.
6
Afụnfụn ara gha alị suepụha; nsọngbu ara gha alị pupụha —
7
nsọngbu-nsọngbu a bịanị ịhịan — k'o dọn mẹni elu-elu kẹ ọkụn e nwunshi.
8
Omẹni mmẹ rọ, nkẹ m'a rịọma Chuku; ịya nkẹ m'e kinghọsị.
9
Ọ rụnsọnmẹ ihiẹn a tụ ẹnya, hụn wẹ ghalẹni asẹka a ghọta ọrụn-atụmẹnya wẹ ghalẹni as'ẹka a gụngụ.
10
O mẹ mirin e zueye elu ụwa, o zi mirin e ye ugbo lẹ ọfịa.
11
O bushi ndị e welụa enwẹn wẹ alị elu. O wepụha ndị rị a kwannị imẹ nsọngbu.
12
Ọ kpayịya ihiẹn ndị ẹro romẹ, amamgbe ihiẹn gha aghanị wẹ.
13
O gi ihiẹn ndị akọ romẹ a nwụn wẹ, ndị ẹro zugụ umẹ, o mẹ ẹ la iwi.
14
Ishi a gbakunrun wẹ ebe eki rị elu; efinnaị, wẹ hụ e bi ẹka lekẹ sị uhinhin rọ.
15
O gi ẹ a zụọpụha ndị nwọnlẹni eyemẹka ọnụ ọpịa hụn rị ndị-ejẹni ọnụ, a zụọpụha wẹ ẹka ndị zeni.
16
Ogbẹnnyẹ e gi ẹ nwọn olilẹnya, mmẹgbu e kpumẹ ọnụ.
17
Ya wụ, onyẹ hụn Chuku sị ‘Ẹlẹ ẹrịra, mẹmẹ ẹ ẹnịna’ e nwọnkẹ ngọzi; elegberilẹ nwan mkpịnsịn hụn Onyẹ Hụn Nwọn Ikẹn Ile rị a fịan ị.
18
Ọ rụ ịhịan ẹhụ nke-esi, kanị o kẹnmẹzi ebe ọ rụ a ẹhụ ekẹnmẹ, ọ rụ ịhịan ẹhụ a rụ, kanị ẹka a a zụọzịkwọ ịhịan azụọ.
19
Osolobuẹ k'a gbapụhadẹ i imẹ eje-ihiẹn isin — ọsụọn'a ẹsa, erukọ wẹ i ẹhụ.
20
Ụnwụn bịa, o k'a gbapụha ị ẹka ọnwụn, agha bịa, o k'a gbapụha ị ọnụ ọpịa.
21
O k'e kpumẹ i amamgbe eje-oku e ru i ẹhụ; ntikpọ bịa, egun atụkọ ị.
22
Ị k'a mụ ntikpọ lẹ ụnwụn ẹmụ, egun eje-anụ ụwa atụkọ ị.
23
Ịyụ lẹ ọmụma rị alị ugbo hụn a nọkin ndị-ọzọ ụzọ k'e họnrin ọwụ, ẹgbata yụ lẹ anụ-ọfịa k'a rị mma.
24
Obi jẹnkọ d'e ru i alị n'o nwọnni ihiẹn k'e mẹ ụlọ ị; ị k'a gụn ihiẹn i, y'a hụn a n'o nwọnni hụn tuhuni.
25
Obi k'e ru i alị nị ụmụ ị k'e bu ọda, nị agbọ ị k'e jun kẹ irurue rị alị.
26
Ị k'a kakpụkpọgụ i kebe nwụnhụn, nọkẹ ọka wẹ be ogẹn-ọka, kpọntọ.
27
Ẹnyi e lekpọgụọ ihiẹnni; ezioku rọ; nụ a nwan, y'e gi ẹ bi.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes