×

EBIBILIA ENCHENU 2020

AYUBU 6

1
Erio Ayubu akairaneria, agateba:
2
“Onye ndiria obororo bwane bwarenge korengwa, na emechando yane yonsi ebekwe ase ekerengo erengwe!
3
Ebio nigo biare ebirito kobua omokenye ore ase enyancha; ase ayio nabeire omwango ase ogokwana ayio.
4
Nyasae Omonguru ombetire emegwe yaye, na omoika one ong’usire obosongo bwabo; okogosa kwa Nyasae kwarobeire kondwania.
5
Inee! Etigere y’orosana nkwana ere, ekero egotakuna obonyansi? Gose eng’ombe nkwana ere, ekero egendererete korisia?
6
Onye endagera tebekiri omonyo okoyiansia, neriegwe? Inee! Omochununu bwe rigena ri’engoko nobwate obwansu?
7
Chindagera echio omoyo one ochiangire, chiabeire chindagera chikongechia.”
8
“Naki nanga yaba buya onye nanyora aya nkoboria, onye Nyasae nanchera aya nganetie!
9
Nigo nganetie Nyasae anche ang’ake ansegenye, arambore okoboko kwaye ang’ite nkwe!
10
Ayio nigo are kogera ndemigwe; nigo narenge kogoka ntari koigwa obororo bw’okoromwa oko okonene. Ekiagera tinkaneti amang’ana a Nyasae ore Omochenu.
11
Chinguru chiane inki chiisaine imbe nokoganya kore nogosemeria? Na omoerio one naki ogochia koba, ngenderere koremereria?
12
Inee! Chinguru chiane nigo chire chinkong’u buna echi’amagena? Gose omobere one nigo ore omokong’u buna etaai?
13
Ekeene gokonywa konde gwonsi tikori ime yane, amagenderero nabwate naurirwe.”
14
“Omosani nigo agwenerete kororera omonto bwerusirie moyo amabera, onye taibo, rirorio otigire koiroka Omonguru.
15
Abaminto bakorire obong’ainereria babeire buna chintuboka chi’amache, na buna chiooro chi’emegoko chigoeta chiaera.
16
Barabwo nigo banga buna chindooche chiamerire amache ’obokendu abwataine, na amagena ’embura are imeo.
17
Ekero ki’omobaso chiasunkera chiakea; na omorakera ogocha chiasira kegima korwa aase abo.
18
Abagendi babwate chitugo chiabo nigo bakogobera korigia amache, tibakoyanyora; ase igo bakwera ase erooro.
19
Abagendi ba Tema nigo bakoriga‐rigia amache, naboigo abaonchoreria ba Seba basemeria koyanyora.
20
Abwo nigo bagoichana, ekiagera tibanyorete eki basemeretie; ekero bachete aase agwo, bakanyora ng’a nigo bang’ainetwe.
21
Nabogio nainwe mwabeire asende buna chintuboka chiria; mwarorire emechando yane, mwakumirie na kwoboa.
22
Inee! Inche natebirie onde ng’a andetere ekeegwa? Gose naboririe onde ng’a arue embooria korwa ase chinibo chiaye?
23
Gose natebirie onde ng’a antoorie korwa ase okoboko kw’omobisa one? Gose natebirie onde ng’a amboorie korwa ase amaboko ’abachandi baane?”
24
“Inyorokererie, na inche ninkire‐kiri imanyie amamocho nakorire.
25
Naki amang’ana ’ekeene agwansa! Korende amang’ana ayio aino ay’obong’ainereria, inki agokonya?
26
Inee! Nigo mokorengereria ng’a amagn’ana ’omonto bwerusirie moyo nigo anga buna omwaga?
27
Onye naboigo, rirorio monyare goaka obomera igoro ye chintakana, monyare gokorera abasani baino amagori amake ase okobaoonia.
28
Bono, komoranche mondigererie; ninde nobomaene kegima, tingokwana oborimo asemore.
29
Nabasoroire, irana, timobaisa gokora ing’ana rinde riibe. Bono irana naende, ekiagera ring’ana riane neri’oboronge.
30
Inee! Amang’ana aane ngokwana nay’oborimo? Inee! Tinkonyara gokwana inyatanane ayare amabe?”
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020
:
Save Notes