×

Ika Bible 2018

Jobu 6

1
Ya Jobu nọ sị:
2
“Omẹni afụnfụn m te k'a nị wẹ ma nị wẹ marịn k'ọ nyịnhan; omẹni nsọngbu m te k'a nị lele elu skelu nị wẹ marịn k'ọ nyịnhan!
3
Nkẹ ọ nyịnnahịn ẹjan rị ohimin! Ya haịn m gizilẹni e rogụ d'e ku.
4
Onyẹ Hụ Nwọn Ikẹn Ile e gigụọ ụta gba ọbara-ụta jun m ẹhụ, ẹdide wẹ te wẹ hụ e ru mmọn m; Chuku e bugụọ ihiẹn-egun bu ọda tọnị m.
5
Omẹni jaki ọfịa a hụngụọ ẹfịfịa o k'e ri, n'o yimẹzi oro? Omẹni okẹn-efin a hụngụọ ihiẹn o k'e ri, n'ọ rịamazị?
6
W'e ridẹ ihiẹn-oriri ghalẹni asụọ nnu rịlẹni, ra ebẹhụ a chan ụchan imẹ ẹkwan a sụọ asụọ?
7
Emẹtụkọ m'a ẹka; ihiẹn-oriri nọ ẹrịra a kụ m emu!
8
“K'ọ rị m, e mẹni wẹ m ihiẹn m rị a rịọ; k'ọ rị m, Chuku e mẹ ihiẹn m rị a tụ ẹnya a.
9
K'ọ rị m, Chuku e kweri gwerinrin m, kweri gi ndụn a ile ti m ihiẹn k'e gbuni m!
10
Ogẹn ahụn, obi e gi ihiẹn ohu ru m alị — ihiẹn ohu hụn m gi a ghọghọ imẹ okẹn-ụfụnị ghalẹni e bi: nị onwọnni ogẹn m gi latọ oku Onyẹ Hụ Rị Nsọ.
11
Elee ndụn kẹ m nwọnzi m'e gi bi, hụn m k'e gi ufiri ẹ nwọnmẹ olilẹnya? Kị m'e gizi nwan ufiri ẹ bi, hụn m'e gi dinmẹ ndidin?
12
M zedẹ nwan kẹ ọmụma ra ẹhụ m wụdẹ igwe-bronzu?
13
M nwọndẹ nwan ndụn m'e gi yeni enwẹn m ẹka, ra m nwọnzi nwan ndụn hụnnị wẹ napụgụ m ihiẹn m gi wụrụ ịhịan?
14
“Ndụn gụ ịhịan, o furu nị ndị ọwụ a yen'ẹ ẹka, ọsụọn'a n'ọ rịzịnị a tụ egun Onyẹ Hụ Nwọn Ikẹn Ile.
15
Kanị umunẹ m ndịnị efuruni w'e gi dọn ẹnya; wẹ nọhụ kẹ iyi ndị hụ mirin wẹ e jungụ, a tahịzị — lekẹ iyi ndị e junghafegụ okẹn,
16
ogẹn ọkpụkpụ mirin rị e dẹnhinni gi rị e huye wẹ, ogẹn mirin oyi ọchan kpụkpụrụnị rị a rịnranpụnị gi e mẹ wẹ e jun;
17
kanị ọhọhị bịa, a tahị wẹ; uwowo bịa, arịkọzị wẹ ote wẹ.
18
Ndị-ijẹn ghapụha nị wẹ ra, ahụnkọ wẹ, a wahunmẹmẹ wẹ, a chọ mirin, washidẹ alị ọkpọ-nkụn, ọnwụn e gbu wẹ.
19
Ndị-afịa Tẹma a chọjẹn mirin ebẹhụ, ndị-ijẹn Shẹba rị ụzọ e bu wẹ obi nị mirin hụ ebẹhụ.
20
Kanị, o kpuye k'o kpuye wẹ, makẹni wẹ te buchanrịn obi wẹ che ẹ; e ru wẹ nwan ebẹhụ, onwọnni mirin wẹ hụn ra!
21
Ụnụ nọ nwan kẹ iyi ndị ahụn; ụnụ a hụngụọ ihiẹn-egun, egun a tụma ụnụ.
22
“A sịtughọ m ụnụ, ‘Yedọn ni ni m ihiẹn’? A sịtughọ m ụnụ, ‘Gi ni ihiẹn ụnụ nwọn kụpụnị m ụgwọ m gi’?
23
A sịtughọ m, ‘gbapụha nị m ẹka ndị-iṅẹnrẹn m mọbụ zụọpụha nị m ẹka ndị ẹfọ-njọ’?
24
Gwa nị m, nị m hụn ụzọ gba nkịtịn; ghọsị nị m ebe m nọ mẹfie.
25
Ezioku a fụkẹnmẹkẹ ụfụ! Kị ụnụ gi nwan ndọndọ ụnụ ile ghọsị?
26
Ụnụ rịdẹ nwan a chọ nị ụnụ ghọsị nị ekuni m'ẹ ọhụnma, nị ụnụ mẹ oku-ọnụ onyẹ ndụn rị a gụ rịkẹ ufere mmakalaka?
27
Nkẹ ụnụ a tụdẹ mkpọ gi weri nwa nwọnlẹni nẹdi; nkẹ ụnụ a hịụndẹ ọwụ ụnụ repụ a.
28
Dodo ni, budẹ ni nwan ẹnya zinmẹ m. Nị m tụma nwan ntụ idẹnya ụnụ?
29
Weri ni nwayọ; amalẹ ni onyẹ nwọnlẹni ihiẹn o mẹ ikpe; lebanzịnị ẹnya ihiẹn ụnụ rị e ku, n'o nwọnni ogẹn m gi latọ ezi-omumẹ.
30
M gidẹ nwan ọnụ m e ku eje-ihiẹn ra? Ọnụ m ku eje-ihiẹn, ọ marịnkọ?
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes