×

Ika Bible 2018

Jobu 9

1
Jobu nọ sị:
2
“Eziẹ, a marịnghọ m nị ezioku rọ. Kanị, nị egun nị ịhịan a nwụnnị ku ẹ ihun Osolobuẹ nị ẹka a rị ọchan?
3
Ọ sụọn'a nị ịhịan chọ nị ya lẹ Osolobuẹ kin ikpe; ọ shịarịkọdẹ onyẹ ahụn akpụ ajụjụ ohu — ọsụọn'a onyẹ hụ jụ a ajụjụ nnụ-uku.
4
Ọ marịnkẹnmẹkẹ ihiẹn; ikẹn ẹ e hikẹmẹkẹ ogbe, onyẹ gbatun'ẹ isi-akwanran la mmaka?
5
O bupụ ugu wẹ gini d'a marịn; o hukpumẹdẹ wẹ ọ gha e bu olulu.
6
O zinzin ụwa ọnọdị a, e mẹ ebe ile kwọndọnn'ẹ e mẹhunmẹ.
7
Ọ sị anwụn amụlẹ, ọ mụkọ; o kpukin ukpẹ okokisẹ.
8
Ịya sụọ ke igwere hụn shịagbu enwẹn ẹ; ịya sụọ kẹ ẹbiri ohimin rị okpuru ẹ;
9
ịya ke Biẹ lẹ Oriọnụ, kokisẹ ndị rị ẹbamịn-ugu lẹ Pleyadẹsi, kokisẹ ndị rị etintinnaị igwere lẹ ebẹhụ rị ẹbamịn-ndịdan hụn ufere gha e fehẹ.
10
Chuku e mẹsọnmẹ ahụnlele wẹ ghalẹni as'ẹka a ghọta, ọrụn atụmẹnya wẹ ghalẹni a s'ẹka a gụnmarịn.
11
Ọ ghafe m, ahụnkọ m'a; ọ ghakọdẹni ebe m rị, amarịnkọ m.
12
Ọ jụrụ ihiẹn, onyẹ k'a s'ẹka gbọndọn ẹ? Onyẹ k'a s'ẹka sị a, ‘K'ị rịdẹ e mẹ?’
13
Chuku ara bu olulu buhọdụ; wẹ ile hụn kwadọn Rehabụ mbụ-mbụ, okẹn Eje-anụ Ohimin ahụn, e fiẹnringhọdẹ alị ụkụ a.
14
Nanị kẹ m'e dọn nwan s'ẹka sọn ẹ kpe ikpe? Elebe m'a nọ nwan hụn akpụrụ-oku m'e gi sọn ẹ kin?
15
Ọsụọn'a nị onwọnni ihiẹn m mẹ, asakọ m ẹka shịarị Chuku oku; arịrịọ sụọ kẹ m k'a sa ẹka rịọ Chuku, Ọka-ikpe m, n'o mẹni m omikẹn.
16
Ọsụọn'a nị m kpe ẹ e kpe, ọ nọ za — egini m'ẹ dọn n'o k'e gọn m ntịn.
17
O gi ẹbiri ẹ gweriẹn m, a rụsọnmẹ m ẹhụ bụ onwọnni ihiẹn m mẹ.
18
Ọ nịkọdẹ m kwọnru alị, kama o gigụọ nsọngbu wụ m ẹhụ.
19
O mẹni ihiẹn wẹ gi akwanran e mẹ rọ, dikẹn kẹ Chuku wụ! O mẹ nke ikin-ikpe, onyẹ k'a kpọ a ikpe?
20
Ọ sụọdẹn'a nị onwọnni ihiẹn m mẹ, ọnụ m ka madẹ m ikpe; omẹdẹni emẹni m ihiẹn nkẹ w'e gi kọrịanị m, ọnụ m k'a sị nị ikpe ma m.
21
Ọsụọn'a enwọn m ihiẹn w'e gi kọrịanị m, onwọnzini ihiẹn m kpọ enwẹn m; onwọnzini ihiẹn ndụn m wụ ẹnya m —
22
makẹni uwẹ ile wụ ohu; ịya haịn m gi sị, ‘Chuku e tikpọ kẹ ndị nwọnlẹni nkọrịanị kẹ ndị eje-ịhịan.’
23
Ọnwụn gbumẹ idẹnmizi, Chuku a mụma ndị nwọnlẹni ihiẹn wẹ mẹ ẹmụ.
24
O mẹ alị a danban eje-ịhịan ẹka, e kẹnkin ndị a han eṅẹn rịn'a ẹnya. Omẹni ẹlẹ Chuku e mẹ wẹ, onyẹ rọ nwan?
25
Ogẹn m hụ a ghakẹnrịn, a gbakẹnrin karịdẹ onyẹ-ọsọ; ọ hụ e feghafe, ịghọghọ arịa.
26
Ọ hụ a gbaghafe lekẹ ụgbọ-mirin ẹfịfịa papirọsụ, nọkẹ ugọn ndị fekọ d'a jụrụ ihiẹn-oriri.
27
M sị, ‘Nị m la nsọngbu m tọ, rọnmẹbehi ihun, mụma ẹmụ,’
28
egun afụnfụn m ile hụkwọ a tụ m, makẹni a marịnghọ m nị y'a hatukọ m sị onwọnni ihiẹn m mẹ.
29
Ebe o mẹni i k'a marịrị m ikpe, kị m rị a lụgbuzini enwẹn m mmaka?
30
Ọsụọn'a nị m gi ncha wụ enwẹn m, gidẹ ncha ka ncha kwọchanpụ ẹka m,
31
i k'e nu m ye imẹ ịkpọtọ kẹni ize m bandẹ ẹkwa m yi ẹhụ.
32
Chuku ẹlẹ ịhịan nọkẹ mmẹ hụn m'e gi shịarị a oku, kẹni ẹnyi ẹbụbụọ kin.
33
Omẹni o te nwọnghọ onyẹ k'a s'ẹka hannị mmẹ lẹ ya eṅẹn, kwọndọn ẹnyi ẹbụbụọ ẹka —
34
wepụnị m mkpịnsịn a, kẹni egun ẹ tụbehi m.
35
Ogẹn ahụn egikọzị m egun ẹ gba nkịtịn — kanị kẹ ihiẹn nọ nwan, asakọ m ẹka ku.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes