×

EBIBILIA ENCHENU 2020

ZABURI 10

1
Omonene, naki gwateneneire aare iga? Naki okwebisa, otari kororekana ase chingaki chi’emechando?
2
Abakori amabe baenenire na gokorera abaremerwa bobe. Tiga babwatwe abanyene ase emeroberio yabo y’obobe.
3
Omonto omokori ebibe nigo agwetogeria okogania okobe gw’enkoro yaye; na omonto ore ne ribero nigo akoragereria Omonene na komochaya.
4
Omokori amabe ase oboenenu bwaye nigo agoteba ng’a Nyasae takomoa egesusuro. Nigo akorengereria ng’a Nyasae tari.
5
Omonto oyio nigo akogenderera gokina ase chinchera chiaye. Ebina biao okonacha nigo bire igoro mono, takobimanya; nigo agochaya ababisa baye bonsi.
6
Nigo akorengereria ase enkoro yaye ime: “Tinkwoboa gento kende, tinkonyorwa na bobe bonde nonya ng’ake.”
7
Aya agokwana nigo aichire okoragereria, na obong’ainereria, na ogokorera abande bobe; oromeme rwaye nigo robwate amang’ana ’obobe na ogosaria.
8
Nigo akwebisa ase emechie oboera abanto, oganya agwo ase ogoita abanto batari na komocha. Nigo agotengera konyora abatari na gokonywa konde,
9
nigo akwebisa aase are bobisi, buna endo ere ase egetutu eboete, oganya ase okobwata abaremerwa; nigo akobabwata ekero akobakurura ase omoeto oye.
10
Nigo akoramama buna endo kobaboera, erio obwata namaboko aye omonto otari na gokonywa konde.
11
Igo akorengereria ase enkoro yaye ime, “Nyasae tagwechandera kende, obisire obosio bwaye ng’a tayarora nonya ng’ake.”
12
Omonene, inchuo! Nyasae rambora okoboko kwao, na tibweba abanto bachandegete!
13
Aye Nyasae, nase ki omonto omokori amabe akogochaya, na korengereria ng’a aye tokomoa egesusuro.
14
Aye nigo okorora abachandekire na komanya okwerera kwabo, amang’ana ayio nigo oyabegete ase amaboko ao. Omonto otari na gokonywa konde nigo akwerua asore, ekiagera naye botambe ogokonya chintakana.
15
Saria chinguru chi’abanto abakori amabe na abanyabibe, obae egesusuro ase amabe onsi bagokora goika toyarora naende.
16
Omonene nigo are omoruoti o kare na kare; abanto b’Ebisaku batamomanyeti basirigwe ase ense yaye.
17
Aye Omonene, nigo ogotegerera abanto abaitongo abagokogania; nigo okobaigwa na kobeka chinkoro chiabo chinguru.
18
Igo okoa chintakana na abachandegete oboronge bwabo, erinde monto onde bw’ense tagenderera korenta okogosa naende.
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020
:
Save Notes