×

Ika Bible 2018

Ẹbụ-ọma 10

1
Euu Osolobuẹ, k'ị nọteni nwan ebe m rị? Kị y'e zuemẹ enwẹn i ogẹn nsọngbu?
2
Eje-ịhịan hụ e mẹkarị enwẹn ẹ a chụgbu ndị zelẹni; eje-umẹ wẹ rị e zu ya nwụndọn wẹ!
3
O gi ihiẹn rị a gụnn'a a nyan isi; o kuyeni onyẹ ẹnya-uku, a kpọlịa Osolobuẹ.
4
Mpache ara nị eje-ịhịan fe Osolobuẹ ara rodẹ Osolobuẹ kaka!
5
Ogẹn ile kẹ ihiẹn gi a ghan'a. O mẹkarị enwẹn ẹ, onwọnni ihiẹn o gi oku i e mẹ; imi-imi k'o ru ndị-iṅẹnrẹn ẹ.
6
Ọ hụ a sị enwẹn ẹ, “Onwọnni ihiẹn k'e mẹni m; ẹfọ jẹnkọ d'a sụọsọnmẹ m ụsụọ, enwọnkọ m nsọngbu.”
7
Ihiẹn jun ẹ ọnụ wụ ịkpọ-iyi, lẹ ntụ lẹ irọn-egun, o gi ire ẹ e mẹ oku, e ku eje-oku.
8
Ọ warịsọnmẹ alị ọfịa, a nọ ebe ọ warị e gbu ndị nwọnlẹni ihiẹn wẹ mẹ; ẹnya a hụ a chọ onyẹ k'a nị a gbu.
9
Ọ warị kẹ ẹwọrọ warịnị; e che n'ọ nwụndọn onyẹ nwọnlẹni eyemẹka — o gi ọnyan a nwụn wẹ, ọ dọnkpụnrụn wẹ.
10
Ndụn a gụ wẹ, a sọhị wẹ, makẹni ọ karịgụọ wẹ ẹka!
11
Eje-ịhịan a sị enwẹn ẹ, “Ẹnya Chuku arịd'a, o bupụgụọ ihun — ara hụndẹ ihiẹn m rị e mẹ!”
12
Lihi nwan, Osolobuẹ! Chuku dodo, ye nwan ẹka! Azọkwọlẹ ndị wẹ rị a bịangbu!
13
Kị onyẹ-njọ rị a kpọlịadẹni Osolobuẹ — a sị enwẹn ẹ, “Ọ jụkọ m ihiẹn ọwụlẹ”?
14
Kanị yụ wụ Osolobuẹ hụ a hụnkwọ kẹ nsọngbu kẹ ẹkwan — n'i mẹgwarị. Onyẹ wẹ rị a bịangbu sikọ d'e bu enwẹn ẹ che i ẹka; ịyụ e yeni ndị nwọnlẹni nẹdi ẹka.
15
Kpagi ẹka onyẹ-njọnị, eje-ịhịannị; ye ẹ afụnfụn njọ a ile — agbagharịkwọl'a kaka!
16
Osolobuẹ wụ Eze jẹnrin-ejẹn; ndị alị ọzọ rị alị a k'a lachanrịn iwi!
17
Euu Osolobuẹ, y'a nụgụọ ihiẹn ndị wẹ rị a bịangbu rịọ ị; y'a gba wẹ umẹ a gba; y'a nụ ẹkwan wẹ a nụ —
18
y'e kuni ndị nwọnlẹni nẹdi lẹ ndị wẹ rị a bịangbu ọnụ wẹ; amamgbe ịhịan mmaka wẹ gi ẹjan mẹmẹ e rọnzi wẹ egun.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes