×

Ika Bible 2018

Ẹbụ-ọma 102

1
Osolobuẹ dodo, nụ ekpere m; dodo, nụ ẹkwan m!
2
Agbakịtọkwọlẹ m azụụn ogẹn nsọngbu; dodo, gọn m ntịn; m kpọku i hụ, dodo zakẹnrin m!
3
M hụ a la kẹ ebe ẹnwụnrụn rị a lọpụ; ọkpụkpụ hụ e nwun m ọkụn lekẹ sị wẹ fiye ẹ ọkụn.
4
Kaka akpụ ndụn ohu arịzị m obi, obi nọ m nwan kẹ ẹfịfịa shinwụnnị; ẹfọ a kpakingụọdẹ m.
5
Udẹn-udẹn m rị a sụn yeni uhue e mẹgụọ m wụrụ ọkpụkpụ-ọkpụkpụ.
6
M rịhụ kẹ ozuzu-ọfịa rị imẹ atụ, ozuzu-nta rị ebe mẹ mkpọkọ-mkpọkọ.
7
Ụran ara buru m; m rịhụ kẹ nnụnụ ya sụọ rị elu ụlọ.
8
Ndị-iṅẹnrẹn m hụ a kpari m uhinhin lẹ efinaị; ndị rị a mụ m ẹmụ hụ e gi ẹfan m a kpọ iyi.
9
Ntụn kẹ m rị nwan e ri nọkẹ ihiẹn-oriri; ẹnya-mirin m hụ a tanye ihiẹn m'a ra!
10
Makẹni y'e gigụọ iwe i lẹ ọnụma ị sọn m; makẹni y'a tụtụrụgụọ m matuhu.
11
Ndụn m hụ a la kẹ onyinyọn ẹnyasị rịhụ a tịnpụnị; m rị e shinwụn nọkẹ ẹfịfịa.
12
Kanị yụ wụ Osolobuẹ k'a rị jẹnrin ejẹn; wẹ k'a nụ ẹfan ị gha agbọ pụ agbọ.
13
I k'e lihi d'e mẹni Zayọnụ omikẹn, makẹni ogẹn y'e gi mẹn'ẹ ọhụnma e rugụọ; ogẹn hụn i kayen'ẹ e rugụọ nwan.
14
Makẹni Zayọnụ rịchanrịn ẹnyi ndị idibo i obi kẹ ọmụma kẹ ẹjan rịn'a e mẹtụzị ẹnyi obi!
15
Alị ile k'a gbaye ẹfan Osolobuẹ; ndị-nze ile rị elu ụwa k'a gbaye ị makẹ ọghọ ị.
16
Makẹni, Osolobuẹ k'a tụndọnzi Zayọnụ; o k'a ghọsị ọghọ a.
17
O k'a nụ ekpere ndị nwọnlẹni eyemẹka; o lelịakọ ekpere wẹ.
18
Wẹ detuni agbọ lalanị ihiẹnni Osolobuẹ mẹ, kẹni ndị wẹ kelẹni mụ, pụha, a ja wẹ Osolobuẹ mma,
19
makẹni Osolobuẹ a nọgụọ elu, ebẹhụ rị nsọ ọ rị, lee ụwa, Osolobuẹ a ghagụọ elu-igwee lee ẹnya elu-ụwa,
20
kẹni ọ nụ udẹn ndị rị ngan rị a sụn; kẹni ọ gbapụha ndị wẹ ma ikpe-ọnwụn.
21
Osolobuẹ mẹ ẹ kẹni wẹ nụ ẹfan a imẹ Zayọnụ, kẹni wẹ ja a mma imẹ Jerusalẹm,
22
ogẹn hụ ndị alị ichẹn-ichẹn lẹ alị-eze ichẹn-ichẹn k'e gi bịagbama d'e fe Osolobuẹ ofufe.
23
Osolobuẹ e mẹgụọ ndụn gụkẹnrin m; o mẹgụọ m ka ẹgẹdi ikẹn!
24
M sị, “Chuku m dodo, egbuchukwọlẹ m! Ịyụ hụn rị ndụn gha agbọ pụ agbọ;
25
ịyụ ke ụwa kete-kete; igwere wụzịkwọ ọrụn-ẹka ị.
26
Wẹ k'a la iwi, kanị yụ nwẹn k'a rịsọnmẹ; wẹ k'a fapụ rịkẹ ẹkwa; i k'e gi ọzọ nọkin ẹnya wẹ rịkẹ ẹkwa, nke wẹ a gụ.
27
Kanị yụ nwẹn wụkwọ onyẹ hụ ị wụ; ndụn ị enwọn ọgụgụ!
28
Ụmụ idibo i k'e bi alị wẹ, ụmụ-ụmụ wẹ e birizikwọ udọn-lẹ-ndọnkwa makẹni ị hụ a.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes