×

Maayong Balita 2012

SALMO 102

1
Pamatii ang akon pangamuyo, O Ginoo, pamatii ang akon pagpangayo sing bulig!
2
Indi ka magpanago sa akon kon yara ako sa kagamo! Pamatii ako, kag sabta gilayon ang akon pagpanawag!
3
Ang akon kabuhi nagakawala subong sang aso, ang akon lawas daw ginasunog sa horno.
4
Nagakalaya ako subong sang hilamon, wala na ako sing gana sa pagkaon.
5
Nagaugayong ako sing mabaskog, panit na lang ako kag tul-an.
6
Kaangay ako sang ilahas nga pispis sa desierto, subong sang bukaw sa mga lugar nga ginub-an.
7
Nagahigda ako nga indi makatulog, subong ako sang pispis nga nagaisahanon sa atop sang balay.
8
Sa bug-os nga adlaw ginapakahuy-an ako sang akon mga kaaway, ang mga nagayaguta sa akon nagagamit sang akon ngalan sa pagpakamalaut.
9
Abo ang akon kalan-on, kag ang akon mga luha nagasimbog sa akon ilimnon,
10
tungod sang imo kaakig kag kasingkal. Ginhakwat mo ako kag ginhaboy.
11
Ang akon kabuhi kasubong sang mga landong sa kahapunanon, kaangay ako sang laya nga hilamon.
12
Pero ikaw, O Ginoo, hari sa walay katapusan, ang tanan nga mga kaliwatan magadumdom sa imo.
13
Magatindog ka kag magakaluoy sa Sion, nag-abot na ang tion sa pagkaluoy sa iya, amo ini ang nagakaigo nga tion!
14
Ang imo mga alagad nagahigugma sa iya, bisan nga nalaglag na sia, naluoy sila sa iya bisan nga naguba na sia.
15
Ang mga pungsod magakahadlok sa Ginoo, ang tanan nga mga hari sang duta magakahadlok sa iya gahom.
16
Kon ang Ginoo magpatindog liwat sang Sion, ipakita niya ang iya pagkagamhanan.
17
Magapamati sia sa pagpanawag sang iya mga tawo nga ginpatumbayaan kag pagasabton niya ang ila pangamuyo.
18
Isulat para sa palaabuton nga kaliwatan ang ginhimo sang Ginoo, agod ang mga tawo nga wala pa mabun-ag magadayaw sa iya.
19
Ang Ginoo nagtamod halin sa iya balaan nga lugar sa kahitaasan, nagtamod sia sa duta gikan sa langit,
20
sa pagpamati sang mga ugayong sang mga binilanggo, kag sa paghilway sang mga ginpamatbatan sing kamatayon.
21
Gani ang mga tawo magasugid sang ngalan sang Ginoo sa Sion, magadayaw sila sa iya sa Jerusalem,
22
kon ang mga pungsod kag mga ginharian magtipon kag magsimba sa Ginoo.
23
Ang Ginoo nagpaluya sa akon samtang ako pamatan-on pa, ginpalip-ot niya ang akon kabuhi.
24
O Dios ko, indi ako pagkuhaa karon, sa wala pa ako magtigulang! O Ginoo, ikaw nagakabuhi sing walay katapusan;
25
sang una gintuga mo ang duta, kag ang mga langit ginhimo sang imo gid mga kamot.
26
Sila tanan mawala, pero ikaw magapadayon, magadaan sila subong sang mga bayu. Pagailisan mo sila subong sang mga bayu, kag mawala sila.
27
Pero ikaw amo man sa gihapon, kag ang imo kabuhi wala sing katapusan.
28
Ang amon mga kabataan magakabuhi nga indi maano, kag ang ila mga kaliwat magakabuhi sa idalom sang imo pagbantay.
Ilonggo Bible 2012
Maayong Balita nga Biblia Philippine Bible Society, 2012
:
Save Notes