|
| 1 |
|
| Itû MWATHANI, igua îromba rîaakwa, na wigue îkaya rîaakwa. |
|
| 2 |
|
| Ûgántiganîîria ndî nthîînene, kiinda gûtû ûmbigue, ûmbîtîkage na mpwîî rîrîa ndagwîta. |
|
| 3 |
|
| Ûtûûro bwaakwa bûthirangaga ta toogi, mwîrî jwaakwa nîka jûgwakana. |
|
| 4 |
|
| Ndingi nkanyaara ta nyaki, ntîkûûmba kûrîa biakûrîa. |
|
| 5 |
|
| Ndîrîte ngaceng'a; mwanka mîndîîndî îkaumîra. |
|
| 6 |
|
| Nkari ta ntuuntuguru ya rwanda, ntuuntuguru îrîa îtûûraga maganjoone. |
|
| 7 |
|
| Ntîonaga toro, nkari ta kanyoni gatigi gonka îgûrûgûrû rîa nyomba. |
|
| 8 |
|
| Anthû baakwa batindaga gûncikûûra, barîa banthûmbagia batumagîra riîtwa rîaakwa rîrî kîrumi. |
|
| 9 |
|
| Mûju nîju jweete biakûrîa biaakwa, meethori jakaungana na biakûnyua. |
|
| 10 |
|
| Ûmbûkîîrîîtie na mûthûûro, wandingania nthî. |
|
| 11 |
|
| Ûtûûro bwaakwa bûthirangaga ntûti ta kîthiîki ûgoro, bwanyaara ta nyaki. |
|
| 12 |
|
| Îndî gwe MWATHANI waathanaga kenya na kenya naagwe ûkaririkanagwa nthukîîne cionthe. |
|
| 13 |
|
| Ithuranîre wigîîrue Zaiûni kîaao, nîûntû îgiita nî rîkinyi rîa kûmiigîîrua kîaao. |
|
| 14 |
|
| Tuî nthûûmba ciaaku nî tûmîendeete na kinya yeethîrwa îmomorangi nî tûmîendeete. |
|
| 15 |
|
| Mîgongo îgakîraga riîtwa rîa MWATHANI, anene bonthe ba nthîgûrû bakîrage inya yaawe. |
|
| 16 |
|
| Nîkwîthîrwa MWATHANI agaaka Zaiûni, acionanie arî na mwago. |
|
| 17 |
|
| MWATHANI akaigagua maromba ja antû baawe barîa bathangîkaga na atîmena maromba jaao. |
|
| 18 |
|
| Nthukî irîa ikeeja nî ciandîkîrwe mantû jarîa MWATHANI aathithîtie nîkenda nchiarwa irîa ikeeja nyumeene ikumia MWATHANI. |
|
| 19 |
|
| MWATHANI arî gîkaroone kîaawe gîkîtheru kûu îgûrû nî aaraithîîrîtie nthîgûrû arategeera nthî arî kûu îgûrû. |
|
| 20 |
|
| Araigua kîrîro kîa barîa baatheeki aroonokia barîa baagiitîri kûûragwa; |
|
| 21 |
|
| nîkenda batûmagîîria riîtwa riaawe kûu Zaiûni, na bamûkumagie kûu Jerusalemu; |
|
| 22 |
|
| rîrîa antû ba mîgongo bakoothûrana nîkenda bathaathayia MWATHANI. |
|
| 23 |
|
| MWATHANI nî atûmîte ndaaga inya ndî ûmwîthî, anyiiyia ûtûûro bwaakwa. |
|
| 24 |
|
| Îtû Mûrungu waakwa, gwe ûtûûraga kenya na kenya ûkámbûraga ndî ûmwîthî. |
|
| 25 |
|
| Kîambîrîriene nî weekîîre mîsingi ya nthîgûrû, ûrathithia îgûrû na njara ciaaku. |
|
| 26 |
|
| Îgûrû na nthî bikaathira, îndî gwe ûgaatûûra kenya na kenya. Îgûrû na nthî bikaathira ta nguû nabio bithire ta ntaame, naagwe ûbite. |
|
| 27 |
|
| Îndî gwe ûtûûraga o ûmwe ûtûûro bwaaku bûtîthiraga. |
|
| 28 |
|
| Nchiarwa cia antû baaku igatûûraga kindaajî. Antû ba rûrîîjo rwaao bagûtumîkagîre magiita jonthe. |
|
|
|
|