×

Ika Bible 2018

Ẹbụ-ọma 104

1
Obi m, ja Osolobuẹ mma! Osolobuẹ, Chuku m, y'e hikẹ ogbe; ọghọ lẹ ikpẹn wụ ẹwuru i!
2
Ukpẹ k'i yi nọkẹ ẹwuru. Ịyụ shịshịapụ igwere rịkẹ okpukpu ụlọ;
3
gi mirin rị orukpu dụnmịn a; orukpu wụ ụgbọ-anyịnyan i gi e jẹn; ufere wụ nku hụn i gi e jẹn.
4
Y'e gi ufere e họnrin ndị-ozi i, e gi ọkụn rị e nwunni e họnrin ndị-ọrụn ị.
5
Osolobuẹ gbe ụwa ye elu iyetọ a, o mẹhunmẹkọ kaka jẹnrin ejẹn.
6
I gi mirin ohimin kpumẹ ẹ rịkẹ ẹkwa, mirin hụn kpumẹ ugu ile.
7
Ị nọ bigbọ, mirin ahụn a katapụ ọsọ; ọ gbapụ ogẹn akpara ị gi han;
8
o hushi elu ugu, ọ kpọtu ugu huye ọdanmgbugbu; o shi ebe i kwademẹtọn'a.
9
Ị nọ tumẹni mirin ohimin ebe o k'e ru, amamgbe o rukpumẹzi ụwa.
10
Y'e mẹ mirin a wapụha imẹ ọdanmgbugbu, e họnrinsọnmẹ iyi rị e hugha ẹgbata ugu.
11
Mirin hụ kẹ anụ ọfịa ile a ra; uwẹ kẹ jaki-ọfịa gi e gbọn ẹgụn-mirin.
12
Mkpẹnrẹn-mirin ndị hụ kẹ nnụnụ a kụye ẹkụ, a nọ agala osisi ndị ahụn a bụ ẹbụ.
13
Y'a gha ụlọ-elu i a gba elu ugu ichẹn-ichẹn mirin; ihiẹn hụn ị rụnpụha kẹ ụwa gi e rijun ẹfọ.
14
Y'e mẹ ẹfịfịa e sueni efin, e mẹ ihiẹn-akụnkụn e sue; kẹni ịhịan rụn ugbo hụn ihiẹn-oriri
15
kẹni ịhịan hụn manya ẹfọ gi a sụọ a ụsụọ kẹni ịhịan hụn udẹn-olivu a kwọ, ihun ẹ e dẹn, kẹni wẹ hụn ihiẹn wẹ e ri ndụn a ban wẹ.
16
Osisi Osolobuẹ kụn a hụnzịkwọ mirin a ra ọhụnma-ọhụnma okẹn-osisi sida alị Lẹbanọnụ hụn Osolobuẹ kụn.
17
Nnụnụ ichẹn-ichẹn a kụ ẹkụ e ye elu osisi ndị ahụn; nnụnụ wụ stọkụ a kụzị ẹkụ e ye elu osisi-fẹ ebẹhụ.
18
Ugu jẹn elu kẹ ewu ọfịa e bi; ebe mẹ ọmụma-ọmụma kẹ ẹlẹtu-ọmụma nkẹ e bi makẹ ihiẹn gha e mẹ ẹ.
19
Osolobuẹ ke ifọn ye ẹ ogẹn ẹ; ẹnyanwụn nkẹ a marịnzịghọ ogẹn o gi a wa.
20
Y'e mẹ eki e gi e họnrin uhinhin, hụn anụ ile rị ọfịa gi a kpa:
21
ikoro ẹwọrọ e dẹnmẹ, a chọ anụ wẹ k'e gburi, a chọ ihiẹn-oriri ẹka Osolobuẹ.
22
Anwụn wama, a laban wẹ okporo wẹ d'e dinẹ,
23
ịhịan nkẹ a pụha d'a rụnma ọrụn wẹ d'e ru ẹnyasị.
24
Euu Osolobuẹ, ihiẹn i ke e bukẹkwọ ọda! Akọ-lẹ-uche k'i gi ke wẹ ile; ihiẹn i ke e jun elu-ụwa ile.
25
Lee ohimin nkẹ ebeni k'ọ han ogbe lẹ k'ọ shịahan; ihiẹn rị ndụn wẹ ghalẹni a saẹka a gụn rị ebẹhụ, kẹ ndị uku kẹ ndị nta.
26
Ebẹhụ kẹ ụgbọ-mirin uku a gba; ebẹhụ kẹ i ketọ Lẹvịatanị, anụ ahụn hi ogbe, n'ọ nọdị, e gu egu.
27
Ịyụ kẹ ihiẹn ndịnị ile e lee ẹnya, kẹni i ye wẹ ihiẹn w'e ri ogẹn ẹ ru.
28
I ye wẹ ya, a hụn wẹ kpọnrin; ị shịapụ ẹka, a hụn wẹ ihiẹn-oriri rijun ẹfọ!
29
I bupụ wẹ ẹnya, obi e feri wẹ! Ị napụ wẹ uzun wẹ rị e kun, a nwụnhụn wẹ; a lashi wẹ ẹjan wẹ gha bịa.
30
Ịyụ zihẹ Mmọn ị gi ke wẹ; ịyụ e mẹ ihiẹn e pupụhazị alị ogẹn ẹ ru.
31
Ọghọ Osolobuẹ ya rịsọnmẹ jẹnrin ejẹn! Ẹfọ ya sụọma Osolobuẹ ụsụọ yeni ihiẹn o ke.
32
Osolobuẹ lehụ ụwa ẹnya, ụwa e zinzinmẹ; o mẹtụhụ ugu ọwụlẹ ẹka, ẹnwụnrụn a lọpụhama!
33
M k'a bụnị Osolobuẹ ẹbụ e we m nwụn; m k'a kụnị Chuku m egu e we m kwọnbepụ.
34
Osolobuẹ ya dodo nị ihiẹnni m rị e ro sụọ a ụsụọ; Osolobuẹ kẹ mmẹ nwẹn gi a ghọghọ.
35
Wẹ tikpọ ndị-njọ elu-ụwa! Ndị e mẹ eje-ihiẹn wẹ gụchanrịn! Obi m, ja Osolobuẹ mma! Ja nị Osolobuẹ mma!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes