×

Ika Bible 2018

Ẹbụ-ọma 105

1
Ye ni Osolobuẹ ekele; kpọku n'ẹ; gwa nị alị ndị ọzọ ihiẹn o mẹ.
2
Bụ nị n'a ẹbụ; kpọ nị n'a egu ịja-mma; ku ni oku ọrụn-atụmẹnya a.
3
E gini ẹfan a rị nsọ a nyan isi; obi ya sụọma ndị ile a chọ ihun Osolobuẹ ụsụọ.
4
A chọ nị Osolobuẹ lẹ ikẹn ẹ; a rịọn'a ogẹn ile.
5
Nyanhankwọ nị ọrụn-atụmẹnya ọ rụn, ihiẹn ile o gi ghọsị ikẹn ẹ lẹ eṅẹn ile o gi ọnụ a han,
6
ụnụ ụmụ Ebraham odibo ẹ, ụmụ Jekọpụ, onyẹ ahụn ọ họrị.
7
Ịya wụ Osolobuẹ, Chuku ẹnyi; elu-ụwa ile hụ a hụn ẹka a.
8
Ọ nyanhansọnmẹ nkwa o kwe jẹnrin ejẹn; ọ nyanhan oku ahụn gha a ọnụ pụha d'e rudẹ agbọ nnụ-uku:
9
ọ nyanhan nkwa hụ rị ẹgbata ya lẹ Ebraham, nkwa ohu hụ o kun enwẹn ẹ kwe Aziki.
10
O ru ẹka Jekọpụ, o kwedọnzi ẹ nkwa ahụn, gi ẹ họnrin iwu; o kwezi ndị Izrẹlụ ya, gi ẹ họnrin nkwerigbama itẹbitẹ.
11
Ọ sị wẹ, “M k'e ye ụnụ alị Kenaanị, o k'a wụrụ ukuu ụnụ.”
12
Ebuni wẹ ọda ogẹn ahụn, wẹ wụhụ itumunyẹ alị Kenanị hụ.
13
Ọkwahunmẹ kẹ w'a kwahunmẹ, a gha alị e shi alị, a gha alị-eze e shi alị-eze.
14
Kanị, onwọnni onyẹ Chuku nị bịangbu wẹ; o gidẹ ufiri wẹ a jụgbọ ndị-nze,
15
sị wẹ “Emẹtụkwọlẹ ni ndị m họrị ẹka! Emẹkwọlẹ ni ndị-amụma m ihiẹn ọwụlẹ!”
16
Ogẹn o gi sị ụnwụn mụma alị hụ ile, mẹ wẹ ahụnzịlẹ ihiẹn-oriri wẹ te gi dọn ẹnya,
17
o zi okẹnnyẹ ohu shi Ijiptu d'e buruni ndị nke ẹ ụzọ. Okẹnnyẹ hụ wụ Josẹfụ; orire wẹ re ẹ kẹ igbọn k'o gi jẹn.
18
Ụkụ a gbụrụ a yeni ẹgan wẹ kpọma a; wẹ kpọma a igwe olu.
19
Oku Osolobuẹ ku e lelesọnmẹ Josẹfụ d'e ru ogẹn oku Josẹfụ ku mbụ gi mẹzu.
20
Eze Ijiptu nọ zi wẹ wepụha a ụlọ-ngan — eze ahụn kị alị ichẹn-ichẹn wepụha a.
21
O bu obi-eze ẹ ile che okpuru ẹ, o we ndị ile wụ nke ẹ ye ẹ kịma;
22
kẹni ọ gwama ndị-ọrụn a ihiẹn wẹ k'e mẹ, kuzimẹ ndị-isi ẹ kẹ w'e mẹ ihiẹn.
23
Izrẹlụ wụ Jekọpụ nọ bịa alị Ijiptu; Jekọpụ nọ bịa d'e biri alị Ham nọkẹ otumunyẹ.
24
Osolobuẹ nọ mẹ ndị nke ẹ mụba ọda-ọda, mẹ wẹ karị ndị-iṅẹnrẹn wẹ ọda;
25
o mẹ ize ndị nke ẹ ban ndị-iṅẹnrẹn hụ, nke wụnị e gi wẹ ẹro sọn idibo ẹ.
26
Osolobuẹ nọ zi odibo ẹ wụ Mozizi, ya lẹ Ẹrọnụ hụn Osolobuẹ họrị.
27
Wẹ nọ rụnsọnmẹ ihiẹn ọ gwa wẹ, ihiẹn o gisọnmẹ ghọsị ẹka a; a rụnsọnmẹ wẹ ọrụn-atụmẹnya imẹ alị ụmụ Ham hụ:
28
O zi ishi d'a gbagbarị alị ahụn; Mozizi lẹ Ẹrọnụ apanị oku ẹ;
29
o mẹ mirin wẹ họnrin ẹdeke, mẹ azụn wẹ nwụnhụn;
30
o mẹ ẹwọ jun alị wẹ, jundẹ mmughẹ eze wẹ;
31
o ku oku, nzinzin lẹ ẹnwụn-nta e jun alị wẹ ahụn ile;
32
o mẹ mirin-ozuzue wẹ họnrin ẹkwan-igwere, amụma e begbarị alị wẹ nọkẹ ọkụn rị e nwunni;
33
o wiwipụchanrịn osisi vaịnị lẹ figi wẹ, gungwọnpụ osisi ndị rị alị wẹ wụ Ijiptu;
34
o ku oku, igurube nọ bịa, igurube wụ igurube, hụn wẹ ghalẹni a saẹka a gụn —
35
igurube e ripụ ihiẹn ile rị e sue alị ahụn, ripụ ihiẹn ile rị ugbo wẹ.
36
Ya kẹ Osolobuẹ nọ nwan gbuchanrịn ikẹnnyẹ-ibuzọ rị alị wẹ, ụmụ ile wẹ gi obi-ụtụntụn mụ!
37
Ọ nọ wepụha ndị Izrẹlụ wẹ lẹ siliva lẹ goru; onwọnni onyẹ ọwụlẹ ẹhụ rịlẹni ikẹn imẹ ebọn wẹ ile.
38
Ndị Ijiptu nọ ghọghọma nị ndị Izrẹlụ a pụgụọ, makẹni egun wẹ e te tụmagụọ ndị Ijiptu.
39
Osolobuẹ nọ gi orukpu kpumẹ ndị nke ẹ rịkẹ ịhara, ye wẹ ọkụn rị e nwunni w'e gi e legha ụzọ imẹ uhinhin.
40
A rịọ w'a, o zihẹni wẹ nnụnụ wụ kwẹlụ, yezi wẹ brẹdi gha elu-igwee bịa mmagi-mmagi.
41
Ọ gbawa ọmụma, mirin e hupụha, mirin e huru imẹ alị ọkpọ-nkụn.
42
Makẹni ọ nyanhan nkwa a ahụn rị nsọ, nkwa hụ o kwe odibo ẹ wụ Ebraham.
43
O wepụha ndị nke ẹ ebẹhụ, e gi wẹ ịghọghọ pụha; ndị ahụn ọ kpọ nke ẹ nọ gi oro ịghọghọ pụha.
44
O we alị ndị alị ọzọ rị ichẹn-ichẹn ye wẹ, e weri wẹ ihiẹn ndị alị ahụn rụn.
45
O mẹ ẹ kẹni ndị nke ẹ e dọnmẹ uhi ẹ, e dọnmẹ iwu ẹ. Ja nị Osolobuẹ mma!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes