×

Ika Bible 2018

Ẹbụ-ọma 109

1
Chuku hụn m'a ja mma, dodo, agbakwọlẹ nkịtịn!
2
Makẹni, ndị ẹfọ-njọ lẹ ndị-ntụ e kujagụọ oku m, e buokingụọ wẹ m ọnụ.
3
Wẹ hụ e kuja oku m ụzọ ile makẹni iwe m rị e we wẹ; e bu wẹ nụmanị m bụ onwọnni ihiẹn m mẹ.
4
Ịma m ikpe kẹ wẹ gi a kụ m ụgwọ ihiẹn-ọsụsụọ, kanị ekpere kẹ m'e mẹ.
5
Wẹ hụ e gi njọ a kụ m mma, e gi iwe a kụ m ụgwọ ihiẹn-ọsụsụọ!
6
Bu oku onyẹni che ẹka eje-ịhịan; onyẹ k'e buokin ẹ ọnụ ya turuye ẹ ẹka-nni!
7
Ikpe wẹ k'e kin ẹ ya ma a; ekpere ẹ ya wụrụdẹ njọ!
8
Ya nwụnchu; onyẹ ọzọ ya weri ọkwa a!
9
Ụmụ a wẹ wụrụ ndị nwọnlẹni nẹdi; nwunyẹ a wụrụ okpoho di nwụnnahịn!
10
Ụmụ a wẹ wahunmẹmẹ ọwahunmẹ-ọwahunmẹ, rịọsọnmẹ ụrịọ; wẹ gha mkpọkọ ụlọ ahụn wẹ bi chọsọnmẹ ihiẹn w'e ri ebe teni!
11
Ndị-ụgwọ wẹ shin'ẹ ọnyan kwarị ihiẹn ile o nwọn; ndị ọ marịnlẹni wẹ kpọnrin ihiẹn ẹ ile.
12
W'a hụnlẹ onyẹ k'e mẹn'ẹ ọhụnma; w'a hụnlẹ onyẹ k'e mẹ omikẹn ụmụ ọ latọ.
13
Ụmụ a ile wẹ nwụnhụnchanrịn; ẹfan wẹ y'a gụ agbọ lalanị gini d'a pụha!
14
Osolobuẹ ya nyanhan njọ ndị nẹdi ẹ wẹ; ya agbagharịlẹ njọ nnẹ ẹ mẹ.
15
Osolobuẹ ya nyanhansọnmẹ njọ ndị ahụn ogẹn ile, kanị w'a nyanhanzịlẹ wẹ lẹ enwẹn wẹ elu-ụwa!
16
Makẹni onwọnni ogẹn ya wụ okẹnnyẹ gi nwọn ihiẹn-ọsụsụọ; ọchụchụ-ọchụchụ k'ọ chụsọnmẹ ndị ụya rị e ri lẹ ndị elu rị a fụ lẹ ndị ndụn gụ, kẹni o gbu wẹ.
17
Ọnụ-ọnụ k'ọ bụ; ya wụrụ onyẹ wẹ bụ ọnụ! Onwọnni ogẹn o gi sụọ a n'ọ rịnị ndị ọzọ mma; ihiẹn rị mma ya gban'a ọsọ!
18
Ịbụ-ọnụ k'o yi nọkẹ ẹwuru; ya dẹnban a ẹhụ rịkẹ mirin, dẹnbandẹ a ụmị ọkpụkpụ rịkẹ ofigbọn!
19
Ya kpumẹchanrịn a kẹ ẹkwa ịhịan gi fụrụ oyi! Ya rịsọnmẹ ẹ ukun kẹ akpụkpọ hụn ịhịan gi e kẹnmẹ ukun!
20
Osolobuẹ ya gi wẹ ile kụ ndị rị e buokin m ọnụ ụgwọ, ndị rị e kuja oku m kẹni wẹ gbu m!
21
Kanị, Di-nwọnni-ẹnyi Osolobuẹ, dodo, gi ufiri ẹfan ị mẹyeni m, gi ufiri ihiẹn-ọsụsụọ ị rịgbu enwẹn ẹ mma gbapụha m.
22
Mmẹ nwẹn, m rị e ri ụya, elu rị a fụ m; e tiwagụọ wẹ m akpobi.
23
M'e d'e fopụ kẹ onyinyọn ẹnyasị; e fechanpụgụọ wẹ m kẹ nwa otutu.
24
Ụkụ rị nwan a ma m gẹgẹgẹ yeni ibu-ọnụ; e fiechanrịngụọ m ẹhụ.
25
Wẹ rị nwan a mụ m ẹmụ; wẹ hụn m, e finfin wẹ isi!
26
Dodo yeni m ẹka, Osolobuẹ wụ Chuku m! Gi ufiri ihiẹn-ọsụsụọ ị zụọpụha m,
27
kẹni wẹ gi ẹ marịn nị ẹka ị rọ, nị ịyụ lẹ enwẹn i wụ Osolobuẹ mẹ ẹ.
28
Wẹ bụma ọnụ k'ọ sụọ wẹ, ọgọzi k'i jẹnkọ d'a gọzi m! Wẹ buhụ nụmanị m mmaka, ifẹnrẹn k'e mẹgbu wẹ, kanị ọghọghọ kẹ odibo i k'a ghọghọ.
29
Ifẹnrẹn ya kpumẹ ndị rị e buokin m ọnụ kpumẹ wẹ nọkẹ ẹkwa, ezigbo ifẹnrẹn ya kpumẹchanrịn wẹ rịkẹ ẹwuru tueru alị!
30
M k'e gi ọnụ m kpanmịn Osolobuẹ ọhụnma-ọhụnma; m k'a nọ ozuzu ndị nke ẹ ja a mma,
31
makẹni ọ nọ ndị wẹ rị a bịangbu e ye azụụn, kẹni ọ zụọpụha wẹ ẹka ndị rị a ma wẹ ikpe ọnwụn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes