|
| 1 |
|
| Ako Mbori, nga ga gi tambuahe, ka mo nióngo nga kii ya! |
|
| 2 |
|
| Bambiko ngba gbegberẽ boro naza kuti re na ngba irabiriki a, i nagumba pai ni mirãyo kuti re ni zire. |
|
| 3 |
|
| I nake pati re kirikiri nigumba apai ni sogote a, ki niso vura na mi zanga ndupai. |
|
| 4 |
|
| I nga abakitingbangare tipa gi nyemuse, ono mi nafu tire sa kpetambuahe tipa yo. |
|
| 5 |
|
| I nafu gbigbitapai fere ku ba wenepai, na sogote tipa gi nyemuse. |
|
| 6 |
|
| Mo mói gbegberẽ boro kuti ni; ki idi he bakitingbanga ru ku kumbabeni. |
|
| 7 |
|
| Ho i ka sapa ngbanga ni ni, i sápu he asapa kuti ni; i gedi gani kpetambuahe wa ingapai! |
|
| 8 |
|
| Gani arame dú adu ni kina umba ha; kura boro rogó gani ahe! |
|
| 9 |
|
| Awirini dú ni awirinyaure, diani ki du ni dekurugbo! |
|
| 10 |
|
| Awirini dú ni yarayara aboro ni aoahe; i gbáta gayo riahe rogo gayo abate! |
|
| 11 |
|
| Irabape zí agu ahe du be ni dunduko; akare gbú aũ gani sunge dunduko! |
|
| 12 |
|
| Ka boro dú nga ho ka dogoda na weneringise fu ni wa sa ya, ka boro dú nga ho ka ina pai fu gani awirinyaure wa sa a ya |
|
| 13 |
|
| I gbándaka tungani ku sa yo; i gbándaka rimoni dagba gu ue rika ngbatunga nikaye! |
|
| 14 |
|
| I tíngidi pa ga atitani irairapai ku bangiri Yekova, ka i gbándaka nga ga nani ingapai a ya! |
|
| 15 |
|
| I dú ku bara bangiri Yekova kindi; ko gbándaka tingida pa yo zegino! |
|
| 16 |
|
| Bambiko ni atingida nga pa yugo weneringise te, ono ni narungosi rungorungo boro na irazingoahe, ka imo agu yo kpotoyo yo awo awo. |
|
| 17 |
|
| Ni akpi nyemu tiwa he; motiwa yé kina ku ri ni! Ngba nga maku fu ni te; si túrú aturã ti ni! |
|
| 18 |
|
| Ni aukadi tini na motiwa wa roko, si rími ku vuni yo wa ime, wa nzeme ku rogo amemeni yo! |
|
| 19 |
|
| Si dú fu ni wa gu roko ni nadada tini na ni, wa gu gire ni navoda dimoni na ni dedede! |
|
| 20 |
|
| Gere dú ni ga abakitingbangare mosoro be Yekova, na ga agu yo nagumba gbigbitapai kuti ungare! |
|
| 21 |
|
| Ako Mbori gi Gbia, ono mo mángi pai fere mbiko rimoro; mo bátasi re mbiko ga weneringise du ni wene he! |
|
| 22 |
|
| Bambiko mi du ni rungorungo re na zingo ahe a, kpotore yo ho ku rogo re yo. |
|
| 23 |
|
| Mi nasusa wa kirima he nagura nyemu; mi du ni yaya re ku ari na ku sande wa kina yere. |
|
| 24 |
|
| Arukusure rungbura be gina riahe; borore du ngorõkia. |
|
| 25 |
|
| Mi du wa úgbarasarimo fu abakitingbangare; ho i nibi re ni, i ki niwo ti riyo. |
|
| 26 |
|
| Ako Yekova, gi Mbori, mo únda re! Ako mo bátasi re wa du pa ga weneringise! |
|
| 27 |
|
| I íni ya bero du; Ako Yekova, mo namangi he! |
|
| 28 |
|
| I tiwa he atiwa, ono mo fú maku! Ho i ka guari ni, zee amánga yo, ono ga moyambu angi angi |
|
| 29 |
|
| I úkadi abakitingbangare ni wasiro; i dádi yo na gayo zee wa baukadi! |
|
| 30 |
|
| Mi afú bakere atambuahe fu Yekova ni ngbare, mi atámbua ko dagba rimbasa aboro. |
|
| 31 |
|
| Bambiko ko naru ku kumbabe irazingoahe, ka batasa ni be agu yo nasapa ngbanga ni sa kpio. |
|
|
|
|