×

Maayong Balita 2012

SALMO 111

1
Dayawa ang Ginoo! Sa bug-os ko nga tagipusoon magapasalamat ako sa Ginoo, sa pagtilipon sang iya mga tawo.
2
Daw ano ka makatilingala sang mga butang nga ginahimo sang Ginoo! Ang tanan nga nalipay sang iya mga binuhatan naluyag maghangop sini.
3
Ang tanan nga iya ginahimo puno sang kadungganan kag pagkahalangdon, ang iya pagkamatarong wala sing katapusan.
4
Ang Ginoo nagapadumdom sa aton sang iya makatilingala nga mga binuhatan, maayo sia kag maluloy-on.
5
Nagahatag sia sing kalan-on sa mga nagapasidungog sa iya, wala sia nagakalipat sang iya kasugtanan.
6
Ginpakita niya ang iya gahom sa iya mga tawo, paagi sa paghatag sa ila sang mga duta sang mga dumoluong.
7
Matutom sia kag matarong sa tanan nga iya ginahimo, masaligan ang tanan niya nga mga sugo.
8
Nagapadayon ini sa tanan nga panahon, ginhatag ini suno sa kamatuoran kag katarungan.
9
Ginluwas niya ang iya mga tawo, kag naghimo sia sing walay katapusan nga kasugtanan sa ila. Balaan kag gamhanan sia!
10
Ang pagtahod sa Ginoo amo ang paagi nga magmaalam ang tawo, nagahatag sia sing husto nga paghukom sa tanan nga nagatuman sang iya mga sugo. Dapat sia dayawon sa walay katapusan!
Ilonggo Bible 2012
Maayong Balita nga Biblia Philippine Bible Society, 2012
:
Save Notes