×

SEBR SÕNGO 1998

Yɩɩla 115

1
Ka tõnd n na n soog pẽgr ye, ayo! Ka tõnd ye, yaa yãmb yʋʋrã, tɩ y nonga tõndo, tɩ y kãabga ka vaanẽ ye.
2
Yaa bõe tɩ bu-zẽmba gomda: «A Israyɛl Wẽnnaama bɛɛ?»
3
Tõnd Wẽnda zao yĩngri, b maanda b sẽn dat fãa.
4
Sã n ya bu-zẽmbã, b wẽnd dãmba yaa wanzurf la sãnem, fãa yaa ninsaal nug tʋʋmde.
5
B tara noore la b pa gomd ye, n tar nini la b pa ne ye.
6
B tara tʋba la b pa wʋmd ye, n tar yõore la b pa kokd yũug ye.
7
B tara nusi la b ka tõe n sɩɩs bũmb ye, b tara nao la b pa lukd b zĩigẽ ye, gomd buud ka yit b kokorẽ ye.
8
Bãmb ne sẽn naan b bãmba zem taaba, bãmb ne sẽn teeg-b bãmba pa são to ye!
9
Israyɛl kamba teeg-y Soaala, bãmb la y sõangda la y gãongo.
10
Aarõ roogo, teeg-y Soaala, bãmb la y sõangda la y gãongo.
11
Yãmb fãa sẽn zoet Soaala, teeg-y bãmba, bãmb la y sõangda la y gãongo!
12
Wẽnd ket n tẽra y yelle, b na ning-y barka, b na ning a Israyɛl buud barka, n ning a Aarõ buud barka.
13
B na ning Wẽnd kẽed-paalsa barka, nin-bõoneg wala nin-bɛda!
14
Bɩ Wẽnd paas y kamb sõore, n paas y yagensa me sõore!
15
Bɩ Wẽnd ning-y barka, bãmb n naan yĩngr la tẽnga.
16
Yĩngrã Wẽnd bas-a-la b meng yĩnga, la b rɩka tẽngã n kõ ninsaalba.
17
Ka sẽn ki-ba n pẽgd Wẽnd ye, bãmb sigda noor kõn le tõog n yaag zĩigẽ.
18
Sã n ya tõndo, tõnd kilsda bãmba marsã la wakat buud fãa. Wẽnd soog pẽgre!
Mossi SSDC 1998
SEBR SÕNGO Alliance Biblique du Burkina Faso, 1998
:
Save Notes