×

Ang Biblia 1982

SALMO 116

1
Ginahigugma ko ang Ginoo, bangud nga nagapamati sia sang akon tingug kag sang akon mga pag-ampo.
2
Bangud nga ginlingig niya sa akon ang iya idulungug, busa magapanawag ako sa iya tubtub nga nagakabuhi ako.
3
Nagsabud sa akon ang mga lubid sang kamatayon; ang mga kasakit sang Sheol nagdakup sa akon; nakakita ako sing kalisud kag kasubo.
4
Niyan nagpanawag ako sa ngalan sang Ginoo: “O Ginoo, nagapakilooy ako sa imo, luwasa ang akon kalag!”
5
Mainayohon ang Ginoo kag matarung; ang aton Dios maloloy-on.
6
Ang Ginoo nagatipig sang bunayag; ginpaubus ako, kag ginluwas niya ako.
7
Balik ka sa imo pagpahuway, O kalag ko; kay ang Ginoo nagmabuganaon sa imo.
8
Kay ginluwas mo ang akon kalag sa kamatayon, ang akon mga mata sa mga luha, ang akon mga tiil sa pagkapukan;
9
magalakat ako sa atubangan sang Ginoo sa duta sang mga buhi.
10
Nagatoo ako, bisan magpamolong ako, “Ginpiotan ako sing daku”;
11
nagsiling ako sa akon kadagmit, “Ang tanan nga tawo butigon.”
12
Ano bala ang ihatag ko sa Ginoo tungud sa tanan niya nga kaayohan ayon sa akon?
13
Magakuha ako sang tagayan sang kaluwasan kag magapanawag sa ngalan sang Ginoo,
14
magabayad ako sang akon mga saad sa Ginoo sa atubangan sang iya bug-os nga katawohan.
15
Bilidhon sa itololok sang Ginoo ang kamatayon sang iya mga balaan.
16
O Ginoo, sa pagkamatuud ako imo alagad; ako imo alagad, ang anak nga lalaki sang imo ulipon nga babayi. Ginhubad mo ang akon mga gapus.
17
Magadolot ako sa imo sang halad sang pagpasalamat kag magapanawag sa ngalan sang Ginoo.
18
Magabayad ako sang akon mga saad sa Ginoo sa atubangan sang iya bug-os nga katawohan,
19
sa mga luwang sang balay sang Ginoo, sa tunga nimo, O Jerusalem. Dayawa ninyo ang Ginoo!
Ilonggo Bible 1982
Ang Biblia 1982 Philippine Bible Society
:
Save Notes