×

Ika Bible 2018

Ẹbụ-ọma 118

1
Kpanmịn nị Osolobuẹ n'ọ rịka mma; ihiẹn-ọsụsụọ a enwọn ọgụgụ!
2
Ndị Izrẹlụ wẹ sị, “Ihiẹn-ọsụsụọ a enwọn ọgụgụ!”
3
Ikpụlọ Ẹrọnụ, ndị nchụn-ẹjan, wẹ sị, “Ihiẹn-ọsụsụọ a enwọn ọgụgụ!”
4
Ndị ile a tụ egun ẹ wẹ sị, “Ihiẹn-ọsụsụọ a enwọn ọgụgụ!”
5
Kẹ m rị imẹ nsọngbu, a kpọku m Osolobuẹ, Osolobuẹ nọ za m, wepụha m eje-ọnọdị!
6
Osolobuẹ rị m azụụn, egun atụkọ m; kị ịhịan k'e mẹ m?
7
Osolobuẹ rị m azụụn; ịya wụ onyẹ hụn e yeni m ẹka; m k'a hụn ọdịdan ndị iṅẹnrẹn m.
8
Ọ ka mma nị ịhịan gbọnni Osolobuẹ karị igi ịhịan dọn ẹnya.
9
Ọ ka mma nị ịhịan gbọnni Osolobuẹ karịdẹ igi ndị-nze dọn ẹnya.
10
Alị ile te kehunmẹ m, m nọ gi ikẹn rị ẹfan Osolobuẹ tikpọ wẹ!
11
Wẹ te kehunmẹ m, kehunmẹ m azụụn ile — m nọ gi ikẹn rị ẹfan Osolobuẹ tikpọ wẹ!
12
Wẹ te kpụ m nọkẹ ẹnwụn, kanị wẹ nọ tinyụnhụ kẹ ọkụn ẹwụwụ, makẹni m gi ikẹn rị ẹfan Osolobuẹ tikpọ wẹ!
13
Wẹ te nu m eje-onunu nị wẹ nutu m, kanị, Osolobuẹ nọ yeni m ẹka.
14
Osolobuẹ wụ ikẹn m lẹ onyẹ m gi a bụ ẹbụ; ọ zụọpụhagụọ m nwan!
15
Wẹ rị nwan a nụ olu ịghọghọ iwe ndị ezi-omumẹ — ịya lẹ olu ndị wẹ zụọpụha: wẹ rị e yi, “Osolobuẹ a kpaka ikẹn!
16
Ẹka-nni Osolobuẹ e mẹkẹ okẹn-ihiẹn! Ẹka-nni Osolobuẹ a kpaka ikẹn!!”
17
Anwụnkọ m; kama, m k'a rị ndụn kọ ihiẹn Osolobuẹ rụn.
18
Osolobuẹ a fịanlẹ m mkpịnsịn ọda-ọda, kanị ọ nịnị m nwụn.
19
Gụnpụnị nị m nwan ọnụ-mgbọn ndịnị rị ọchan, nị m banye d'a kpanmịn Osolobuẹ!
20
Ọnwan wụ ọnụ-mgbọn Osolobuẹ; ndị ezi-omumẹ k'a banye ẹ.
21
M rị a kpanmịn ị makẹni y'a zagụọ m, zụọpụha m.
22
Ọmụma ndị rị a tụn ụlọ jụtọ, e họnringụọ ọmụma gi ụlọ!
23
Osolobuẹ mẹ ẹ, ọ tụka ẹnyi ẹnya!
24
Tannị wụ okẹn ụhụọhịn Osolobuẹ mẹmẹ! Nị ẹnyi gi ẹ ghọghọ, ẹfọ ya sụọma ẹnyi ụsụọ!
25
Ẹnyi rị a rịọ ị, Osolobuẹ, dodo zụọpụha ẹnyi; ẹnyi rị a rịọ ị, Osolobuẹ, dodo mẹ ẹnyi gha ihun!
26
Ngọzi ya rịnị onyẹ hụn gi ẹfan Osolobuẹ bịa! Ẹnyi gha Ụlọ-nsọ Osolobuẹ e kele ụnụ.
27
Osolobuẹ wụ Chuku; o yeọlẹ ẹnyi ukpẹ! Kwọndọnsọnmẹ ni agala gi bidọn mmẹmmẹ; weri ni anụ ẹnyi gi a chụn ẹjan d'e limẹye mpịn ukpo nchụn-ẹjan.
28
Ịyụ wụ Chuku m, m k'a kpanmịn ị; Chuku m, m k'a ja ị mma.
29
Kpanmịn nị Osolobuẹ, makẹni ọ rịka mma, ihiẹn-ọsụsụọ a enwọn ọgụgụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes