×

Ika Bible 2018

Ẹbụ-ọma 119

1
Ngọzi wụ nke ndị e bi obibi nwọnlẹni nkọrịanị, ndị gi iwu Osolobuẹ e bi.
2
Ngọzi wụ nke ndị e dọnmẹ iwu Osolobuẹ gi shịanị enwẹn ẹ ẹri, e gi akpakalị obi wẹ e fe Osolobuẹ;
3
ndị ghalẹni e mẹ eje-ihiẹn; kama, w'a ghasọnmẹ ụzọ Osolobuẹ.
4
Y'a gwagụọ ẹnyi e dọnmẹ iwu i, e dọnmẹ wẹ ọhụnma-ọhụnma.
5
K'ọ rị m, m hụ e mẹ ọdịnalị i tumẹni ẹnyi, e mẹ wẹ ogẹn ile!
6
Ogẹn ahụn, ifẹnrẹn emẹkọ m m gha e gi iwu i e lele enwẹn m.
7
M k'e gi obi kụrụ ọtọ ja ị mma, ogẹn m'e gi mụnrụn uhi rị mma i yisọnmẹni ẹnyi.
8
M k'a gha e mẹ ọdịnalị i tumẹsọnmẹni ẹnyi; dodo, ajụtọkwọlẹ m!
9
Nanị kẹ okoro a dọn bigha? Ghahanị i gi ihiẹn i ku e bi.
10
Obi m ile kẹ m gi e fe i, dodo, anịkwọlẹ m latọ ihiẹn ndị ị sị ẹnyi e mẹ.
11
E bugụọ m ihiẹn i ku che obi m, amamgbe m'e mẹ i njọ.
12
Ọjịja-mma ya rịn'ị, Osolobuẹ, dodo, kuzi m ọdịnalị i tumẹsọnmẹni ẹnyi.
13
M'e gi ọnụ m e kupụha uhi ile gha ọnụ ị pụha.
14
Imẹ hụn i ku a sụọ m ụsụọ nọkẹ onyẹ nwọn ẹregede akụ-lẹ-ụba!
15
M k'a gha e ro iwu i, bu ẹnya m che ụzọ ị.
16
Ọdịnalị i tumẹsọnmẹni ẹnyi k'a gha a sụọ m; azọkọ m ihiẹn i ku.
17
Dodo, mẹ n'ọ rịnị odibo i mma, kẹni m rị ndụn mẹ ihiẹn i ku.
18
Shịapụ m ẹnya, nị m hụn okẹn-ihiẹn rịsọnmẹ iwu i.
19
Abịamabịa kẹ m wụ elu-ụwa; dodo, ezuemẹlẹni m iwu i.
20
Ẹgụn uhi i yisọnmẹni ẹnyi a gụn m ogẹn ile, a gụn m ọda-ọda.
21
Y'a jụgbọ ndị mpache ahụn wẹ bụ ọnụ, hụn a latọ iwu i.
22
Dodo, napụ m ifẹnrẹn lẹ mkpari wẹ rị a kpari m, makẹni m hụ e mẹ hụn i ku.
23
Ọsụọn'a nị ndị-isi zuni m eje-umẹ, odibo i k'a rị e ro ọdịnalị i tumẹsọnmẹni ẹnyi.
24
Hụn i ku wụ hụn a sụọnị m; uwẹ a dụn m ọdụn.
25
M fiẹnrin nwan alị mọmọmọ; dodo, dọnmẹ m ndụn k'i dọn ku.
26
Mgbe m gi gwachanrịn ị ihiẹn ile, i nọ za m; dodo, kuzi m ọdịnalị i tumẹsọnmẹni ẹnyi.
27
Dodo, mẹ m ghọta iwu i, kẹni m hụn ụzọ e ro ọrụn atụmẹnya ị.
28
M'e d'a kwangbu enwẹn m yeni ụya; dodo, gba m umẹ k'i dọn ku.
29
Dodo wezụkanị m obibi zinrinlẹni, y'e mẹ omikẹn kuzi m iwu i.
30
A họrịgụọ m nị m k'e bi obibi wẹ gi e dọn ẹnya; e bugụọ m uhi i yisọnmẹni ẹnyi che ihun m.
31
Euu Osolobuẹ, hụn i ku kẹ m kwọnkẹnmẹ; dodo, egbekwọlẹ ifẹnrẹn ye m ihun!
32
M k'a gha e mẹkẹnrin ihiẹn ndị ị sị ẹnyi e mẹ, makẹni y'e mẹ m e nwọn nghọta e nwọncheni.
33
Osolobuẹ, dodo kuzi m ọdịnalị i tumẹsọnmẹni ẹnyi, kẹni m mẹsọnmẹ wẹ d'e ru njẹndemẹ.
34
Ye m nghọta, nị m hụn ụzọ e dọnmẹ iwu i, e gi obi m ile e dọnmẹ ẹ.
35
A ghọsị m kẹ m'a dọn dọnmẹ iwu i, makẹni iwu i a sụọ m ụsụọ.
36
Mẹ m bu obi che hụn i ku, ẹlẹ eje-erere!
37
Wepụ ẹnya m ihiẹn nwọnlẹni isi; ka dọnmẹ m ndụn ebe m rị e sọn ụzọ ị.
38
Mẹzuni odibo i nkwa i kwe kẹni wẹ gi ẹ gbaye i.
39
Wepụnị m ụya m rị a tụ egun ẹ, makẹni uhi i ile rịchanrịn mma!
40
Lee ẹ, ẹgụn nkuzi i a gụn m a gụn; gi ezi-omumẹ i ye m ndụn.
41
Osolobuẹ, dodo mẹ ihiẹn-ọsụsụọ ị ru m ẹka, ya lẹ nzụọpụha ị — nọkẹ kẹ i dọn kwe nkwa,
42
kẹni m hụn ihiẹn m'a shịarị onyẹ rị a mụ m ẹmụ; makẹni ihiẹn i ku kẹ m gi e dọn ẹnya.
43
Dodo, ewepụkwọlẹ ezioku ọnụ m, makẹni uhi i kẹ m rị e lee ẹnya;
44
ogẹn hụ e dọnmẹsọnmẹ m iwu i jẹnrin e jẹn,
45
e mẹshịa ẹhụ, makẹni m hụ e sọnshi iwu i ikẹn.
46
A gwama m ndị-nze oku hụn i ku, ifẹnrẹn emẹkọ m;
47
a ghọghọ m ni m'e dọnmẹ iwu i, makẹni w'a sụọ m ụsụọ;
48
e liyeni m iwu i ẹka, makẹni w'a sụọ m ụsụọ; e rosọnmẹ m iwu i tisọnmẹni ẹnyi.
49
Dodo, nyanhan oku i gwa odibo i hụn i gi nwan mẹ m nwọn olilẹnya.
50
Ihiẹn obi gi e ru m alị imẹ nsọngbu m wụ ọnwan: nị nkwa ị e dọnmẹ m ndụn.
51
Ndị mpache a mụgbugụọ m, kanị alatọkwọnị m nwan iwu i.
52
M hụ a nyanhan uhi i yisọnmẹ mbụ-mbụ, Osolobuẹ, e gi ẹ a kasị enwẹn m obi.
53
Olulu ndị-njọ e bu m ọda-ọda, makẹni w'a ra dọnmẹ iwu i.
54
Iwu i yesọnmẹ ẹnyi kẹ m gi a bụ ẹbụ ebe ọwụlẹ m bi.
55
M hụ a nyanhan ẹfan ị imẹ uhinhin, Osolobuẹ, e dọnmẹ iwu i.
56
Ihiẹnni kẹ m'e mẹ: m'e dọnmẹsọnmẹ iwu i.
57
Osolobuẹ kẹ m hanrịn; e kweọlẹ m nkwa nị m k'e mẹsọnmẹ ihiẹn i ku.
58
Obi m ile kẹ m gi a rịọ ị, dodo, lee m ẹnya ihun k'i dọn ku!
59
E lekpọgụọ m obibi m, e hutọgụọ m mẹmẹ hụn i ku.
60
M'e mẹ ihiẹn ndị i ku ozigbo-ozigbo, m'a ra lọkpụn.
61
Ọsụọn'a nị ndị-njọ e gigụọ ụdọ kehunmẹ m, m'a ra zọ iwu i.
62
M'e lihi imẹ abalị a ja ị mma makẹ uhi rị mma i yisọnmẹni ẹnyi.
63
M wụ ọwụ ndị ile a tụ egun i, ọwụ ndị ile e dọnmẹ iwu i.
64
Ihiẹn-ọsụsụọ ị pụha ifọn elu-ụwa ile, Osolobuẹ, dodo kuzi m iwu i.
65
Y'e mẹkẹni odibo i, Osolobuẹ, rịkẹ k'i dọn ku.
66
Ye m ezigbo uche lẹ amamihiẹn, makẹni m kweri iwu i.
67
K'i kelẹni ye m afụnfụn, m te kpahukọ akpahukọ; kanị, m'e mẹ nwan ihiẹn i ku.
68
Onyẹ rị mma hụn e mẹ mma k'ị wụ! Dodo, kuzi m iwu i.
69
Ndị mpache hụ e buokin m ọnụ, kanị m hụkwọ e gi obi m ile e dọnmẹ iwu i.
70
Obi wẹ kpọkin akpọkin lekẹ ihiẹn ụtọrọ gbakin, kanị iwu i a sụọ m ụsụọ.
71
Afụnfụn m ta hụghọ m mma kẹni m mụnrụn iwu i.
72
Iwu gha ị ọnụ pụha ka m mkpa karị egho, karị akpụrụ goru lẹ siliva nnụ bu ọda.
73
Ịyụ ke m, buchesọnmẹ m ụkụ lẹ ẹka, dodo, ye m nghọta, kẹni m mụnrụn iwu i.
74
Ndị hụn a tụ egun i k'a hụn m, ghọghọma, makẹni m hụ e gi oku i e dọn ẹnya.
75
A marịnghọ m nị ezigbo eṅẹn kẹ y'a han, Osolobuẹ, nị y'e mẹgụọ kẹ onyẹ wẹ gi e dọn ẹnya ebe ị nọ ye m afụnfụn.
76
Dodo, gi ihiẹn-ọsụsụọ ị kasị m obi, kẹ i dọn kwe odibo i nkwa.
77
Mẹ omikẹn i ru m ẹka, kẹni m rị ndụn; makẹni iwu i a sụọ m asụọ.
78
Ifẹnrẹn ya mẹgbu ndị mpache ahụn, makẹni e gigụọ wẹ ẹro buokin m ọnụ; kanị mmẹ nwẹn k'a gha a e rokwọ iwu i.
79
Ndị ile a tụ egun i wẹ bịa d'e kunrun m, ndị ile marịn ihiẹn i ku.
80
Obi m y'a kụrụ ọtọ ebe idọnmẹ iwu i rị, amamgbe ifẹnrẹn e mẹ m.
81
Ndụn a gụn m ebe m rị e che n'i zụọpụha m; ihiẹn i ku kẹ m gi e nwọn olilẹnya.
82
Ẹnya hụ a tụrụ m m gi e lee ẹnya ihiẹn i kwe nkwa a, m hụ a sị, “Elee mgbe kẹ y'e gi rọkọ m obi?”
83
M rị nwan kẹ akpụkpọ-anụ wẹ kọnmẹ ẹnya-ọkụn; kanị azọkwọnị m iwu i.
84
Nanị kẹ odibo i k'e dinhanzị? Elee mgbe y'e gi ye ndị rị e kpokponi m afụnfụn?
85
Ndị mpache e gutọsọnmẹgụọnị m olu; w'a ra dọnmẹ iwu i.
86
Ihiẹn ile ị sị ẹnyi e mẹ furu w'e mẹ; ndị iwe rị e kpokpo m bụ onwọnni ihiẹn m mẹ; dodo, yeni m ẹka!
87
W'e d'e gbupụdẹ m elu-ụwa, kanị, alatọkwọnị m iwu i.
88
Dodo gi ihiẹn-ọsụsụọ ị dọnmẹ m ndụn, kẹni m hụn ụzọ e mẹ hụn gha ọnụ ị pụha.
89
Euu Osolobuẹ, ihiẹn i ku k'a bụn imẹ elu-igwee jẹnrin ejẹn.
90
Onyẹ wẹ gi e dọn ẹnya k'ị wụ gha agbọ pụ agbọ; y'e bugụọ elu-ụwa che ebe ọ rị, o turuhụkwọ nwan.
91
Uhi i ile rịkwọ nwan d'e ru tannị, makẹni ihiẹn ile rị okpuru i.
92
Omẹni ẹlẹ hụn iwu i a sụọ m, nkẹ m'a nwụntọgụọ imẹ nsọngbu m.
93
Onwọnni ogẹn m'e gi zọ iwu i, makẹni y'e gigụọ wẹ ye m ndụn.
94
M wụ nke i; dodo, zụọpụha m, nị m hụ a lịlịma e dọnmẹ iwu i.
95
Ndị-njọ warị e che ni wẹ gbu m, kanị hụn i ku kẹ mmẹ nwẹn e ro.
96
A hụngụọ m'a nị ihiẹn ile nwọn ebe wẹ zuru oke, kanị iwu i zuchanrịn oke.
97
Euu, Iwu i a sụọka m! Ịya kẹ m'e ro kẹ ụhụọhịn han.
98
Iwu i kẹ m gi e nwọnkarị ndị-iṅẹnrẹn m akọ-lẹ-uche makẹni ịya kẹ ẹnya m rị ogẹn ile.
99
Mmẹ ka ndị nkuzi m ile ihiẹn a marịn, makẹni m'e ro hụn i ku.
100
Mmẹ ka ndị isi-ẹwọ ihiẹn a marịn makẹni m'e dọnmẹ iwu i.
101
M'a ra budẹ ụkụ che ụzọ rịlẹni mma, kẹni m hụn ụzọ e mẹ ihiẹn i ku.
102
M'a ra latọ uhi i, makẹni y'a kuziọlẹ m.
103
Ihiẹn i ku a sụọka m ụsụọ ọnụ, sụọkarịdẹ mirin-ẹnwụn!
104
Iwu i kẹ m gi e nwọn nghọta, ịya haịn ize eje-obibi ile gi e ze m.
105
Oku i wụ ukpẹ-ẹka m gi a zọye ụkụ lẹ ukpẹ m gi e legha ụzọ.
106
E kungụọ m ẹfan ị, kunshi ẹ ikẹn, nị m k'a gha e dọnmẹ ezigbo uhi i yisọnmẹni ẹnyi.
107
A hụnjungụọ m ẹnya; dodo Osolobuẹ, dọnmẹ m ndụn kẹ i dọn ku.
108
Dodo Osolobuẹ, narịn oyiye ịja-mma gha m ọnụ pụha; y'a kuzi m uhi i.
109
Ogẹn ile kẹ m gi e bu ndụn m e che ọb'ẹka, kanị m'a ra zọ iwu i.
110
Ndị-njọ e shitọgụọnị m ọnyan, kanị alatọkwọnị m iwu i.
111
Oku-ọnụ ị wụ ukuu m jẹnrin ejẹn; uwẹ e mẹ obi a sụọ m ụsụọ.
112
E wepụhagụọ m obi m nị m dọnmẹsọnmẹ iwu i jẹnrin ejẹn.
113
Ndị gi obi-ẹbụọ e sọn i e ze m ize, kanị iwu i a sụọ m asụọ.
114
Ịyụ wụ ebe m'a warị lẹ akpaịn m gi e che ẹhụ, ihiẹn i ku kẹ m gi rị dọn ẹnya.
115
Pụ nị nị m, ụnụ ndị-njọ nị m hụn ụzọ e mẹ ihiẹn Chuku sị ẹnyi e mẹ!
116
Dodo, dọnmẹ m kẹ i dọn kwe nkwa; kẹni m rị ndụn; anịkwọl'a kpuye m.
117
Dọnmẹ m, makẹ eje-ihiẹn gha e mẹ m, kẹni m hụn ụzọ a gbaye iwu i ogẹn ile.
118
Y'a jụ ndị ile latọ iwu i; ẹro wẹ ile a wụrụ ihiẹn la iwi.
119
Y'e kpọnpụ ndị-njọ ile nọkẹ unyin; ịya haịn hụn i ku gi a sụọ m.
120
Ẹhụ hụ a ma m nni yeni egun i; uhi i hụ a tụ m egun.
121
E mẹgụọ m ihiẹn rị mma lẹ ihiẹn furuni; dodo, ajụkwọlẹ m tọnị ndị rị a bịangbuni m.
122
Dodo, biye ẹka kẹn'ọ rịnị odibo i mma; anịkwọlẹ ndị nhọnrọn bịangbu m!
123
Ẹnya e mẹ m bii m gi e lee ẹnya nzụọpụha ị, m gi e lee ẹnya n'i mẹzu nkwa hụ wẹ gi e dọn ẹnya hụn i kwe.
124
Dodo gi ihiẹn-ọsụsụọ ị sọn odibo i, y'a kuzi m iwu i.
125
Odibo i kẹ m wụ, dodo ye m nghọta kẹni m marịn ihiẹn i ku ru alị.
126
Osolobuẹ, dodo mẹhunmẹ nwan, n'e tikpọgụọ wẹ iwu i!
127
Eziẹ, iwu i ka m a sụọ karị goru, karịdẹ goru rịgbu enwẹn ẹ mma.
128
Ya wụnị iwu i ile rịchanrịn mma ẹnya m, eje-obibi ile e ze m ize.
129
Hụn i ku a rịka mma, ịya haịn m gi e gi obi m ile e mẹ wẹ.
130
Wẹ kọwa oku i, ukpẹ a bịa, o mẹ ogbori a marịn ihiẹn.
131
M'a shịapụ ọnụ kẹ anụ ẹgụn-mirin rị a gụn makẹni iwu i rị a gụn m.
132
Dodo, lee m, n'i mẹni m omikẹn kẹ i dọn e mẹni ndị ile ẹfan ị a sụọ ụsụọ.
133
Dodo, a ghọsị m ebe m'a zọye ụkụ, kẹ i dọn kwe nkwa; anịkwọlẹ njọ ọwụlẹ kị m!
134
Gbapụha m ẹka ndị a bịangbu ịhịan kẹni m'e dọnmẹ iwu i.
135
Gi ẹnya rị mma lee odibo i, y'a kuzi m iwu i.
136
Ẹnya-mirin m hụ e hu nọkẹ iyi, makẹni a rị wẹ e dọnmẹ iwu i.
137
Onyẹ ezi-omumẹ k'ị wụ, Osolobuẹ, uhi i ile kụrụ ọtọ.
138
Hụn i ku wụ ihiẹn furuni, wẹ ile wụchanrịn oku onyẹ wẹ gi e dọn ẹnya.
139
Iwe e wegbugụọ m, makẹni ndị-iṅẹnrẹn m a latọgụọ ihiẹn i ku.
140
Ihiẹn i ku a ghọsịgụọ ọda-ọda n'ọ wụ ezioku; ọ sụọ mmẹ wụ odibo i ụsụọ!
141
Onwọnni ihiẹn m wụ, wẹ legberi m elegberi; kanị m'a ra zọ iwu i.
142
Ezi-omumẹ i wụ ezi-omumẹ hụn k'a rị jẹnrin ejẹn; iwu i wụ ezioku.
143
M rị imẹ nsọngbu lẹ ihiẹn-ụfụ, iwu i kẹ ẹfọ gi a sụọ m ụsụọ.
144
Hụn i ku rị mma jẹnrin ejẹn; dodo, ye m nghọta kẹni m rị ndụn.
145
Obi m ile kẹ m gi a kpọku i; dodo, za m, Osolobuẹ! M k'e dọnmẹ iwu i.
146
M rị a kpọku i; dodo, zụọpụha m nị m hụn ụzọ e mẹ hụn i ku.
147
M'a zọtẹnhin a kpọku i n'i yeni m ẹka; ihiẹn i ku kẹ m gi e dọn ẹnya.
148
M'a mụ ẹnya eki e we fọn, e ro ihiẹn i ku.
149
Gi ufiri ihiẹn-ọsụsụọ ị nụ ẹkwan m! Osolobuẹ, dodo dọnmẹ m ndụn kẹ uhi i dọn ku!
150
Ndị rị a chọ eje-ihiẹn w'e mẹ a nọzụnhangụọ; enwọndẹ wẹ efe iwu i.
151
Ị rị nsue, Osolobuẹ, ihiẹn ile ị sị ẹnyi e mẹ wụchanrịn ezioku.
152
O tekẹ m gi ihiẹn i ku ghọta nị i ku wẹ nị wẹ rị jẹnrin ejẹn.
153
Dodo, lee afụnfụn m rị imẹ ẹ, n'ị zụọpụha m, makẹni azọnị m iwu i.
154
Dodo kuni m ọnụ m n'ị gbapụha m; dọnmẹ m ndụn kẹ i dọn kwe nkwa!
155
Nzụọpụha erukọ ndị-njọ ẹka makẹni w'a ra dọnmẹ iwu i.
156
Osolobuẹ y'e mẹkẹ omikẹn; dodo, dọnmẹ m ndụn kẹ uhi i dọn ku!
157
Ndị rị e kpokponi m lẹ ndị-iṅẹnrẹn m bu ọda, kanị alatọkwọnị m hụn i ku.
158
M lee ndị ghalẹni e gi oku Osolobuẹ e dọn, ize hụ e ze m, makẹni w'a ra dọnmẹ iwu i.
159
Ledẹ kẹ iwu i dọn a sụọ m, Osolobuẹ dodo, gi ufiri ihiẹn-ọsụsụọ ị dọnmẹ m ndụn!
160
Ihiẹn ile i ku wụ ezioku, uhi ndị ahụn ile rị mma i yi k'a rị jẹnrin ejẹn.
161
Ndị okẹn ịhịan rị e kpokpo m, bụ onwọnni ihiẹn m mẹ; kanị egun ihiẹn i ku rịkwọ m obi.
162
Ihiẹn i ku e mẹ m a ghọghọ nọkẹ onyẹ hụn okẹn akụ-lẹ-ụba o k'a kwarị.
163
Ntụ e ze m ize, m'a ra gidẹ ẹnya hụn a! Kanị, iwu i a sụọ m ụsụọ.
164
Mgbe ẹsa kẹ m'a ja ị mma ụhụọhịn yeni uhi rị mma i yisọnmẹni ẹnyi.
165
Ndị iwu i a sụọ kẹ obi e ruchanrịn alị; onwọnni ihiẹn a saẹka e mẹ wẹ a kpọgburu.
166
M hụ e che i n'ị zụọpụha m, Osolobuẹ; m hụ e dọnmẹ iwu i.
167
M hụ e gi obi m ile e mẹ hụn i ku, m'a ra gi ẹ gu egu.
168
M hụ e dọnmẹ iwu i lẹ oku gha ị ọnụ pụha; y'a marịnchanrịngụọ kẹ m'e bi.
169
Osolobuẹ dodo, nụ ẹkwan m rị a kwan! Dodo ye m nghọta k'i dọn ku.
170
Dodo, nụ ihiẹn m rị a rịọ ị; zụọpụha m kẹ ị dọn kwe nkwa!
171
Ẹbụ k'e jun m ọnụ, makẹni ị hụ a kuzi m iwu i.
172
Ire m ya gi ihiẹn i ku bụsọnmẹ ẹbụ, makẹni ihiẹn ile ị sị ẹnyi e mẹ furu w'e mẹ.
173
Dodo, tịnpụ ẹka ị yeni m ẹka makẹni iwu i kẹ m hanrịn.
174
M rị e che i n'ị zụọpụha m, Osolobuẹ, iwu i a sụọ m ụsụọ.
175
Nị m rị ndụn, kẹni m ja ị mma; iwu i ya yezikwọnị m ẹka.
176
A kpahugụọ m nọkẹ atụnrụn tuhuni; dodo chọha odibo i, nị azọnị m iwu i.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes