|
| 1 |
|
| We Mwĩai Ngai nĩwĩnguũĩte na nũmbĩsĩ. |
|
| 2 |
|
| Nĩwĩsĩ yĩla nĩilyĩ nthĩ na yĩla nĩũngyĩ; wĩ kũasa nũmanyaa mosũanĩo makwa. |
|
| 3 |
|
| Nũmbonaa yĩla nĩendete kana yĩla nĩthũmũĩte; nĩwĩsĩ meko makwa onthe. |
|
| 4 |
|
| O na ndambĩte kũneena ũndũ, we Mwĩai Ngai wĩthĩawa wĩsĩ vyũ kĩla ngũneena. |
|
| 5 |
|
| Ũnthyũlũlũkĩte mbee na ĩtina, nũnzũvĩaa na ũtonyi waku. |
|
| 6 |
|
| Ũmanyi ũsu waku nĩ wa ũseng'yo kwakwa, nĩ mũliku ũkethĩa o na nditonya kwĩthĩwa naw'o. |
|
| 7 |
|
| Ndonya kũthi va nĩ kana nume vala ve Veva waku? Ndonya kũkĩa ngathi va nĩ kana nume vala ũĩ? |
|
| 8 |
|
| Ethĩwa ngambata ĩtunĩ, vau wĩ vo! O na ethĩwa ngakoma vala maveva ma ala akw'ũ mekalaa, vau wĩ o vo. |
|
| 9 |
|
| O na ngaũlũka ngathi wumĩlonĩ wa syũa, kana o na ngathi vala ũkanga ũthelele, |
|
| 10 |
|
| o na vo vau wĩthĩwa vo ũndongoesye, wĩthĩwa vo ũndetheesye. |
|
| 11 |
|
| Ethĩwa ngasya, “Kwa w'o kĩvindu nĩkĩmbw'ĩke, na kyeni kĩla kĩnthyũlũlũkĩte kĩtw'ĩke ũtukũ,” |
|
| 12 |
|
| o na kĩvindu ti kĩvindu kwaku, na ũtukũ wĩthĩawa na kyeni ta mũthenya, nũndũ kĩvindu na kyeni kwaku no ũndũ ũmwe. |
|
| 13 |
|
| Nĩwoombie mamutha makwa onthe, nĩwambũmbĩie ĩvunĩ ya mwaitũ. |
|
| 14 |
|
| Nĩngũũtaĩa nũndũ nũmbĩtwe kwa nzĩa ya ũkĩwa na ya kũseng'ya; mawĩa maku nĩ ma kũseng'ya, nĩnĩsĩ ũu nesa. |
|
| 15 |
|
| Yĩla mavĩndĩ makwa moombawa, makwataniw'e nesa ĩvunĩ kwa mwaitũ, yĩla neanĩaa vau kĩmbithĩnĩ, we nĩweesĩ kana nĩvo. |
|
| 16 |
|
| Nĩwambonie ndanamba kũmbwa, mĩthenya ĩla nĩnengetwe yonthe yaandĩkĩtwe ĩvukunĩ yaku, o na vate ũmwe ũnamba kwĩthĩwa. |
|
| 17 |
|
| We Ngai mosũanĩo maku nĩ ma vata kwakwa; nĩ maingĩ mũno ũkethĩa maimanyĩka ũtalo wamo! |
|
| 18 |
|
| Kethĩwa nĩnĩmatala, methĩwa me maingĩ mbee wa kĩthangathĩ. Yĩla ngũamũka nĩthĩawa nĩo vamwe naku. |
|
| 19 |
|
| Ame Ngai nenda kethĩwa no wũae ala athũku! Kethĩwa oaani nĩmauma vala nĩĩ! |
|
| 20 |
|
| Makũneeneaa maũndũ mathũku; maneeneaa ĩsyĩtwa yaku maũndũ mathũku. |
|
| 21 |
|
| Ame Mwĩai Ngai nĩnĩmenete ala makũmenete, nĩnĩvũthĩtye ala makũng'endeaa! |
|
| 22 |
|
| Nĩnĩmamenete na kĩmena kingĩ; nĩmatalaa kwĩthĩwa me amaitha makwa. |
|
| 23 |
|
| Mbĩkuũe ame Mwĩai Ngai na ũimanya ngoo yakwa; ndate na ũimanya mosũanĩo makwa! |
|
| 24 |
|
| Mantha kana ve ũthũku nthĩnĩ wakwa, na ũindongoeasya nzĩanĩ ya tene na tene. |
|
|
|
|