×

Ziazia Kekeapai 1978

Atambuahe 141

1
Ako Yekova, mi nakpara foro; mo ípisi tiro kono du mi ni! Mo yé turo sa fugore, ho mi nakpara ni foro!
2
Mo ídi he gi kpetambuahe dú wa wene fuõngua bara bangiro, tumba abere ku ari ki du wa gu motumo nga ga nyemu!
3
Ako Yekova, mo kpária pa ngbare, mo bánda ngbadimo ngbare!
4
Ka mo nidúaga nga kpotore yo sa gbigbita pai wa sa ya, ya mi mangi gbegberẽ mangaapai wa sa na agu aboro namanga irairaapai; ka mi nirí nga gáyo bawene riahe a ya!
5
Ruru boro ta re si adú ni wenepai fere, ni rúgu re, ono si adú wa nzeme ku rire yo; ka rire ka nga ha ya, bambiko rago gayo gbigbitapai gi kpetambuahe adu ho kindi.
6
I abafu gayo abasapungbanga kuti mbia; i agía gimi apai; bambiko si adu nonono.
7
Memerani agbándaka yasika ngbadimo Baatoro kpikpi aboro yo, a wa gu boro nade sende ni bukia ha.
8
Ako Mbori nga Yekova, ono bangire du koyo du mo ni, mi fu tire ku be ro; ka mo nimbú nga mbisimore gbua ya!
9
Mo bánda re be gu gbina re yo ho tipa re, be agu angindi nga ga amangi irairapai!
10
Mo ídi he gbegberẽ aboro tiwi wa sa ku rogo gayo apio, mi ki bati tigimi.
Zande Bible 1978
La Sainte Bible en Zande Alliance Biblique Universelle, 1978
:
Save Notes