×

Buku Loyera

MASALIMO 142

1
Ndikulirira Chauta mokweza, ndikupemba kwa Chauta mofuula.
2
Ndikupereka madandaulo anga kwa Iye, ndikutchula mavuto anga pamaso pake.
3
Pamene mtima wanga ufooka, Inu mumadziŵa zoti ndichite. Adani anditchera msampha m'njira imene ndimayendamo.
4
Ndikayang'ana ku dzanja lamanja, palibe ndi mmodzi yemwe wosamalako za ine. Kulibe koti ndithaŵire, palibe munthu wondisamala.
5
Ndimalirira Inu Chauta, ndimati, “Inu ndinu kothaŵira kwanga, ndinu zanga zonse m'dziko la amoyo.”
6
Imvani kulira kwanga, pakuti ndataya mtima. Pulumutseni kwa ondizunza, chifukwa andiposa mphamvu.
7
Tulutseni m'ndende kuti ndizitamanda dzina lanu. Anthu anu adzandizungulira, chifukwa Inu mwandichitira zabwino zambiri.
Chewa Bible BLYDC
Bible Society of Malawi
:
Sungani Zolemba