×

Ziazia Kekeapai 1978

Atambuahe 144

1
Yekova dú ni sambuasambua ko nga gi mbia, nayugo pa sovura fu abere, na pa ta kpata fu awirinzagare;
2
nga gi weneringise, nga gi gbata, nga gi sosono kirikiri gbata nga batasire, nga gi vurakube, nga gu ko fu mi tire ku be ko, nga gu ko nasa gimi aboro i ra fere.
3
Ako Yekova, gini he nga boro mo nangera koyo du ni ni, na wiri boro, mo aberã pa ni?
4
Boro wa kina uturangba, gani arame wa kirima naasusa.
5
Ako Yekova, mo núga angbangbaturũ, ki zorõ kono! Mo zádi abaagangara si nigundu!
6
Mo bá ikpira gumba, si ki ki gbandaka yo yasika, mo báfu gamo asiida, ki gbarasi yo!
7
Mo táĩ bero ari yo kono, mo bátasi re, ki kusi re rogo badungu aime, na be awiri kungba aboro,
8
nga agu yo ngbayo nafura ni wia, kumbabeyo du ni kumbabe zire.
9
Ako Mbori, mi abí vovo bia foro; mi abí bia atambuahe foro na gu kindondo du na giriru bawe,
10
mo nga gu ko nafu diabese fu abakindo, nabatasi Dawidi nga ga moyambu.
11
Mo bátasi re be kere basape, ki kusi re be awiri kungba aboro, nga agu yo ngbayo nafura ni wia, kumbabeyo du ni kumbabe zire.
12
Ako, ka awirani nga akumba nidú wa tomaahe asona rago parangayo, awirani nga ade nidú wa sekeseke ambia tukpu bambu rengbe na ga bakindo bambu;
13
gaani agbamu nihí rengbe na angbatunga ariahe; gaani akandoro nibátika banambu yo wa akutu na akutu bawe a;
14
gaani zogozogo anya nidú na awira, bakuadirago nidú nga te; pa zia aboro a te; tawawa nidú nga ngba gaani agene a te!
15
Rago nangba ti agu aboro du ngbatunga pai fu yo wa gere! Rago nangba ti agu aboro du gayo Mbori nga Yekova!
Zande Bible 1978
La Sainte Bible en Zande Alliance Biblique Universelle, 1978
:
Save Notes