×

Ika Bible 2018

Ẹbụ-ọma 145

1
M k'a ja ị mma, Chuku m hụn wụ Eze; m k'a ja ẹfan ị mma jẹnrin ejẹn.
2
M k'a gha a ja ị mma ụhụọhịn ile, a ja ẹfan ị mma jẹnrin ejẹn.
3
Osolobuẹ e hikẹ ogbe; o furu w'a ja mma ọhụnma-ọhụnma! Osolobuẹ wụ Okẹn-ịhịan, w'a ra saẹka ghọta a?
4
Agbọ ọwụlẹ k'a gwa hụn lalanị nị y'a rụnka, e ku oku okẹn ihiẹn ị rụnsọnmẹ.
5
M k'a gha e ro okẹn ọghọ ị lẹ ikpẹn i lẹ ọrụn-atụmẹnya ị.
6
Wẹ k'a gha e ku oku ihiẹn hi-ogbe ị rụnsọnmẹ; m k'a gha e ku ẹ nị y'e hikẹ ogbe.
7
Wẹ k'a e ku oku ọhụnma ile bu ọda hụn i mẹ, e gi ezi-omumẹ i a bụshi ẹbụ elu.
8
Osolobuẹ e mẹyekẹni ịhịan; o mẹ omikẹn; ara bukẹnrin olulu; o nwọnkẹ ihiẹn-ọsụsụọ.
9
Osolobuẹ e mẹni onyẹ ọwụlẹ ihiẹn rị mma; o mẹni ihiẹn ile o ke omikẹn.
10
Euu Osolobuẹ, ihiẹn ile i ke k'a ja ị mma; ndị e mẹ uche i k'a ja ị mma!
11
Wẹ k'e ku oku ọghọ alị-eze i, ku oku ikẹn i,
12
kẹni ịhịan ile marịn okẹn ihiẹn ị rụnsọnmẹ lẹ ọghọ alị-eze i.
13
Alị-eze i agụkọ; ọkịkị ị k'a tọ gha agbọ pụ agbọ. Osolobuẹ e mẹzuchanrịn nkwa a ile; o nwọn ihiẹn-ọsụsụọ ihiẹn ile o ke.
14
Osolobuẹ e yeni ndị rị a dannị ẹka; o weli ndị rị imẹ nsọngbu.
15
Ịyụ kẹ ịhịan ile rị e lee; y'e ye wẹ ihiẹn-oriri o ru ogẹn ẹ.
16
Ịyụ a shịapụ ẹka e ye ihiẹn ile rị ndụn ihiẹn a gụnnị wẹ, e yejun wẹ ẹfọ.
17
Osolobuẹ e mẹ ihiẹn ile ọhụnma; o mẹ ihiẹn ile k'o furu.
18
Osolobuẹ a nọkunmẹ ndị ile a kpọkun'ẹ, ndị ile gi ezioku a kpọku ẹ.
19
O ye ndị hụn a gbayen'ẹ ihiẹn a gụnnị wẹ; ọ nụ ẹkwan wẹ, a zụọpụha wẹ.
20
Osolobuẹ e che ndị ile ihiẹn ẹ a sụọ nche, kanị, o k'e tikpọ ndị-njọ ile.
21
Ọnụ m sikọ d'a ja Osolobuẹ mma; ihiẹn ile rị ndụn wẹ jama ẹfan nsọ a mma jẹnrin ejẹn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes