|
| 1 |
|
| Isugid ko ang imo pagkagamhanan, O Dios ko kag hari ko, magapasalamat ako sa imo sa wala sing katubtoban. |
|
| 2 |
|
| Sa tagsa ka adlaw magapasalamat ako sa imo, dayawon ko ikaw sa wala sing katubtoban. |
|
| 3 |
|
| Ang Ginoo gamhanan kag dapat gid sia dayawon, ang iya pagkagamhanan indi mahangpan. |
|
| 4 |
|
| Ang imo ginhimo pagadayawon halin sa isa ka kaliwatan pakadto sa isa, isugid nila ang imo gamhanan nga mga buhat. |
|
| 5 |
|
| Ang mga tawo magahambal sang imo kadungganan kag pagkahalangdon, kag magapamalandong ako sang imo makatilingala nga mga binuhatan. |
|
| 6 |
|
| Ang mga tawo magahambal sang imo gamhanan nga mga buhat, kag ako magasugid sang imo pagkagamhanan. |
|
| 7 |
|
| Magasugid sila nahanungod sang imo kaayo. kag magakanta nahanungod sang imo pagkamatarong. |
|
| 8 |
|
| Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. |
|
| 9 |
|
| Maayo sia sa tanan kag maluloy-on sa tanan nga iya ginhimo. |
|
| 10 |
|
| Ang tanan mo nga mga tinuga, O Ginoo, magadayaw sa imo, kag ang tanan mo nga mga tawo magapasalamat sa imo. |
|
| 11 |
|
| Magahambal sila sang himaya sang imo ginharian, kag magasugid sila sang imo gahom, |
|
| 12 |
|
| agod ang tanan nga mga tawo makahibalo sang imo gamhanan nga mga buhat, kag sang mahimayaon nga pagkahalangdon sang imo ginharian. |
|
| 13 |
|
| Ang imo ginharian wala sing katapusan, kag ikaw hari sa walay katubtoban. Ang Ginoo matutom sa iya mga saad, kag maluloy-on sa tanan nga iya ginahimo. |
|
| 14 |
|
| Ginabuligan niya ang tanan nga yara sa kahul-anan, ginabayaw niya ang tanan nga nadulaan sang paglaom. |
|
| 15 |
|
| Ang tanan nga nagakabuhi nagalaom sa imo, kag ginahatagan nimo sila sing pagkaon sa tion nga ila kinahanglanon ini. |
|
| 16 |
|
| Ginahatagan mo sila sing tuman kag ginasabat mo ang tanan nila nga mga kinahanglanon. |
|
| 17 |
|
| Ang Ginoo matarong sa tanan nga iya ginahimo, maluloy-on sa tanan niya nga mga binuhatan. |
|
| 18 |
|
| Malapit sia sa tanan nga nagapanawag sa iya, nga nagapanawag sa iya sing maminatud-on. |
|
| 19 |
|
| Ginahatagan niya sang ila mga kinahanglanon ang tanan nga nagapasidungog sa iya, ginapamatian niya ang ila mga pagpanawag kag ginaluwas niya sila. |
|
| 20 |
|
| Ginaapinan niya ang tanan nga nagahigugma sa iya, pero laglagon niya ang tanan nga mga malaut. |
|
| 21 |
|
| Dayawon ko ang Ginoo sa gihapon, ang tanan nga mga tinuga magdayaw sang iya balaan nga ngalan sa walay katubtoban. |
|
|
|
|