×

Fɔs Oli Baybul 2013

Sam 145

1
A go tɔk ɔlsay bɔt yu, di PAPA GƆD we a de wɔship ɛn mi kiŋ; a go prez yu sote go.
2
Ɛvride a go de prez yu ɛn tɛl ɔlman aw yu gud sote go.
3
PAPA GƆD na big big PAPA GƆD we fɔ prez; nɔbɔdi nɔ go ɛva ebul ɔndastand aw big i big.
4
Dɛn go de tɔk bɔt di big wok we yu de du; na ɔl di jɛnareshɔn dɛn.
5
A go tɔk bɔt aw yu wɔndaful, a go de stɔdi mɔ bɔt yu wɔndaful wok dɛn.
6
Pipul go tɔk bɔt di wɔndaful pawa we yu gɛt, dɔn mi go lɛf de tɛl ɔlman bɔt di wɔndaful tin dɛn we yu dɔn du.
7
Dɛnsɛf go gladi fɔ we yu gud ɛn dɛn go siŋ bikɔs yu de du wetin rayt.
8
PAPA GƆD gud ɛn i gɛt sɔri-at, i nɔ de vɛks kwik ɛn in lɔv beberebe.
9
PAPA GƆD gud to ɔlman; i gɛt sɔri-at fɔ ɔl udat i mek.
10
PAPA GƆD, ɔl wetin yu mek go prez yu; dɛn wan we de fala yu go de prez yu.
11
Dɛn go tɔk bɔt aw yu de rul as Kiŋ ɛn di pawa we yu gɛt,
12
dat go mek ɔlman no bɔt di wɔndaful tin dɛn we yu de du ɛn aw pawaful yu yon kiŋ bi.
13
Yu de rul go de sote go ɛn yu go rul ɔl jɛnareshɔn we gɛt fɔ bɔn. PAPA GƆD de kip in wɔd ɛn di lɔv we i gɛt nɔ de chenj.
14
PAPA GƆD de es udat fɔdɔm ɛn kɔrej udat in at pwɛl.
15
Ɔlman de luk ɔp to yu ɛn yu de gi dɛn tin fɔ it, di rayt tɛm.
16
Yu de gi ɔl wetin yu mek it fri wan te dɛn satisfay.
17
PAPA GƆD nɔ miks pan bɛnbɛn ɛn i gud pan ɔl wetin i de du.
18
PAPA GƆD rɛdi fɔ ɛp ɔl udat kɔl am fɔ ɛp dɛn, mɔ so, dɛn wan we de kɔl am wit ɔl dɛn at.
19
I nɔ de gi dɛn wan we gɛt fred ɛn rɛspɛkt fɔ am, wetin dɛn fɔ gɛt; i de ansa dɛn prea ɛn sev dɛn.
20
PAPA GƆD de mek ɔl udat lɛk am, dɛn layf sef bɔt i go dɔnawe wit bad pɔsin.
21
A go prez PAPA GƆD, Lɛ ɔl wetin PAPA GƆD mek, prez am sote go.
Krio Bible 2013
Krio Bible The Bible Society of Sierra Leone, 2013
:
Sev Notis dɛn