×

Ziazia Kekeapai 1978

Atambuahe 145

1
Gi Mbori, nga gi Bakindo, mi atáka pande rimoro, mi asámbua rimoro nye anye kindi.
2
Mi asámbua ro na auru, ki tambua rimoro nye anye kindi.
3
Yekova nga bahe, rengbe na tambua ko ni bakere he gbe, ka i rugu nga tise na pa gako du ni bahe te.
4
Rika ngbatunga aboro atáasa pa gamo mangaapai fu kura rika ngbatunga aboro, ki taki pande pa gamo kangarã mangaapai.
5
Gu baiiriwo du ni taasitaasi he nga ga ga irisa, mi abáka bangire tipa ha na tipa gamo iiriwo mangaapai.
6
Aboro agúmba pa gu ngarã du ti gamo kigikigi mangaapai, mi atáka pande pa ga du ni bahe.
7
I agúmba pa wo rimoro tipa ga wenesino du ni bakere he, ki ngbiko na wawa tipa ga rurupai.
8
Yekova du na inapai, ki hi ahi na nunga aboro a, aipo nga na zinga ya, ki du na weneringise kpaima.
9
Yekova du ni wene ko fu aboro dũ, gako wene nunga aboro du ku ri agu ahe dunduko ko amangi he.
10
Ako Yekova, gamo mangaapai afú atambuahe foro dunduko, gamo ziazia aboro dunduko asámbua ro.
11
I agúmba pa gu taarimo nga ga ga ngbi, ki pe pa ga ngarã,
12
ka yugo pa ga kangarã mangaapai fu awiri aboro, na gu taarimo nga ga ga baiiriwo ngbi.
13
Ga ngbi nga nyenye ngbi, na ga zogarago nye fu arika ngbatunga aboro dunduko.
14
Yekova nasongoda agu yo nati dunduko, ki nitumba agu yo nanugadi dunduko a.
15
Bangiri aboro dunduko du koyo du mo ni, mo nafu gayo riahe fu yo ti regboho.
16
Mo naza bero, ki nimbisi gu nyemuhe nga ga unga ahe dunduko.
17
Yekova du ni ruru ko rogo gako apai dunduko, ni weneringi ko rogo gako mangaapai dũ.
18
Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo.
19
Ko nadigisa gu nyemuahe nga ga agu yo nagunde ti ko, ko nagia gayo kpe ku ari a, ki nibatasi yo.
20
Yekova nabanda agu yo dunduko nakpi nyemu ko; ono gbegberẽ aboro ko agbárasa yo dunduko.
21
Ngbare agúmba pa tambua Yekova, aboro dunduko sámbua kparakpara ziazia rimoko asambua nye anye kindi.
Zande Bible 1978
La Sainte Bible en Zande Alliance Biblique Universelle, 1978
:
Save Notes