×

現代台語譯本羅馬字版

詩篇 147

1
Ha-lé-lú-iah, chheng-chàn Siōng Chú! Chhiùⁿ-koa o-ló lán ê Siōng-tè, chin hó; chheng-chàn I sī ha̍p-gî, chin thang hoaⁿ-hí.
2
Siōng Chú tiông-kiàn Iâ-lō͘-sat-léng, chū-chi̍p Í-sek-lia̍t tiong siū-lia̍h khì īⁿ-pang ê lâng.
3
I i-hó siong-sim ê lâng, pau-chat in ê siong.
4
I sǹg chhiⁿ-sîn ê sò͘-bo̍k, chi̍t-lia̍p chi̍t-lia̍p kā in hō-miâ.
5
Lán ê Chú chì-tōa, ū tōa khùi-la̍t; I ê tì-hūi bû-kiông-chīn.
6
Siōng Chú hû-chhî pi-bî ê lâng, kā pháiⁿ-lâng phah-tó tī thô͘-kha.
7
Lín tio̍h ēng kám-siā ǹg Siōng Chú chhiùⁿ-koa, tôaⁿ-khîm chhiùⁿ-koa, o-ló lán ê Siōng-tè.
8
I khí-hûn jia-thiⁿ, ūi-tio̍h tōe chún-pī hō͘-chúi, hō͘ soaⁿ hoat-chháu.
9
I sù chia̍h-mi̍h hō͘ cháu-siù, hō͘ teh thó-chia̍h ê sòe-chiah o͘-a.
10
I ì-ài--ê m̄-sī bé ê la̍t tōa; I hoaⁿ-hí--ê m̄-sī lâng ê kha gâu-cháu.
11
Siōng Chú ì-ài--ê sī kèng-ùi I, gióng-bōng I chû-ài ê lâng.
12
Iâ-lō͘-sat-léng ah, tio̍h chheng-chàn Siōng Chú; Sek-an ah, tio̍h siōng-chàn lí ê Siōng-tè.
13
In-ūi I kian-kò͘ lí siâⁿ-mn̂g ê mn̂g-chhòaⁿ, sù-hok hō͘ siâⁿ-lāi ê lâng.
14
I hō͘ lí kéng-lāi pêng-an, ēng siōng-hó ê be̍h hō͘ lí chia̍h pá.
15
I ǹg tōe hoat-chhut bēng-lēng; I ê ōe thoân-pò͘ chin kín.
16
I lo̍h-seh chhin-chhiūⁿ iûⁿ-mn̂g, lo̍h-sng chhin-chhiūⁿ hé-hu.
17
I lo̍h-pha̍uh chhin-chhiūⁿ iù-chio̍h; I thàu léng-hong, siáⁿ-lâng tòng ōe tiâu?
18
I chi̍t-ē bēng-lēng, chiah-ê chiū lóng iûⁿ--khì; I khí hong, chúi chiū lâu.
19
I ēng I ê ōe chí-sī Ngá-kok, chiong I ê bēng-lēng kap kui-lē chí-sī Í-sek-lia̍t.
20
I m̄-bat án-ni khoán-thāi pa̍t-kok; I ê kui-lē, in m̄ bat. Ha-lé-lú-iah, chheng-chàn Siōng Chú!
Chinese TTVR
The Bible Society in Taiwan
:
保存笔记