×

Ika Bible 2018

Ẹbụ-ọma 147

1
Ja nị Osolobuẹ mma! Makẹni ọ rịka mma ịbụnị Chuku ẹnyi ẹbụ ịja-mma; ịja Osolobuẹ mma a rịka mma; o furu efuru!
2
Osolobuẹ rị a tụndọnzi Jerusalẹm, e wekinhẹn ndị Izrẹlụ ọ chụpụ alị wẹ.
3
Ọ kasị ndị obi rị a gbawa obi, o kẹnmẹ wẹ ebe wẹ rụsọnmẹ ẹhụ.
4
Ịya marịn kokisẹ ole rịnị, marịndẹ ẹfan wẹ ile.
5
Di-nwọnni-ẹnyi e hikẹ ogbe, ikẹn ẹ e hizikwọ ogbe; nghọta a enwọn okẹn.
6
Osolobuẹ e weli ndị welụa enwẹn wẹ alị; kanị o nutu ndị njọ.
7
Gi nị ẹbụ kpanmịn Osolobuẹ ẹnyi; gi ni ụbọ bụnị Osolobuẹ ẹbụ ịja-mma.
8
O gi orukpu gbama igwere, o mẹ mirin e zueye alị, e mẹ ẹfịfịa e sue elu òke ichẹn-ichẹn.
9
O ye anụmanụ ihiẹn-oriri wẹ, e yezikwọ ụmụ-nnụnụ nke wẹ wẹ rịama.
10
Ihiẹn a sụọ Osolobuẹ ẹlẹ ẹshin-agha nwọn ndụn mọbụ onyẹ nwọn akwanran.
11
Ihiẹn a sụọ Osolobuẹ wụ ndị hụn a tụ egun ẹ, ndị bu obi tụkwasị ihiẹn-ọsụsụọ a.
12
Jerusalẹm, ja Osolobuẹ mma! Zayọnụ, ja Chuku i mma!
13
Makẹni, o fidọnkẹnmẹ ọnụ-mgbọn i; ọ gọzi ndị nke i hụn rị imẹ i.
14
O mẹ ihiẹn a rịnị alị ụnụ mma, e gi ọka kachanrịn mma e yejun i ẹfọ.
15
O ku ihiẹn ọ chọ n'o mẹ elu ụwa, ihiẹn o ku e mẹ ozigbo-ozigbo.
16
O zihẹ mirin oyi ọchan wụ sno hụn a kpụkpụrụnị, ọ nọ kẹ oruru wẹ tanma; o fe imọn e ye ụzọ ile lekẹ ntụn.
17
Ọ ma ẹkwan-igwere e ye imẹ ụwa nọkẹ mbụrụ. Onyẹ k'a saẹka che oyi hụn o zihẹ?
18
O kuzi oku, e dẹnhin wẹ, o mẹ ufere femẹ, mirin e huru.
19
Ọ gwagụọ ụmụ Jekọpụ ihiẹn ọ chọ n'o ku; o butọgụọnị Izrẹlụ ọdịnalị a lẹ uhi ẹ.
20
Onwọnni alị ọzọ o mẹni ihiẹnni; amarịn wẹ uhi ẹ. Ja nị Osolobuẹ mma!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes