×

Adamawa 1994

Jabuura 148

1
Halleluya! Maŋgte Jawmiraawo haa asamanji! Maŋgte mo nder ɓaŋgiiɗum!
2
Maŋgte mo, onon malaa'ika'en maako! Maŋgte mo, onon honooɓe maako ɓe asama!
3
Maŋgte mo, onon naaŋge e lewru! Maŋgte mo, onon koode jaynanɗe!
4
Maŋgte mo, onon asamanji ɓurɗi towugo e ndiyamji gonɗi dow asamanji!
5
Ɗi fuu ɗi maŋgta innde Jawmiraawo, ngam o tagi ɗi bee umroore maako.
6
O tabitini ɗi haa abada abadin, ɗi luutataa umroore maako sam.
7
Maŋgte Jawmiraawo haa lesdi, onon ndiyamji lugguɗi fuu e kuuje kulniiɗe nder beeli,
8
ma'e e mallimallooje e ndiyamji ɗi peewol saatini e duule, keni caatuɗi baɗooji muuyo maako,
9
kooseeje e towndiije fuu, leɗɗe dimooje ɓiɓɓe e leɗɗe cemmbiɗɗe fuu,
10
kuuje ladde e dabbaaji saare fuu, ladooji e colli!
11
Maŋgte mo, onon laamiiɓe nder duniyaaru e ummaatooje fuu, mawɓe e ardiiɓe nder duniyaaru fuu,
12
suka'en e faanyɓe rewɓe, ndotti'en e derke'en!
13
Ɓe fuu ɓe maŋgta innde Jawmiraawo! Ngam innde maako ɓuri inɗe fuu mawnugo, daraja maako ɓuri asama e lesdi.
14
O hokki ummaatoore maako baawɗe. Ngam maajum hoolaaɓe maako fuu maŋgtan mo. O semmbiɗini Isra'iila, ummaatoore ɓadiinde mo. Halleluya!
Fulfulde Bible Adamawa 1994
DEFTERE ALLAH Alliance Biblique du Cameroun, 1994
:
Hisnu Teskorɗe