×

Pathen Thutheng 2015

Labu 148

1
Pakai chu vahchoijun, van ho-a konin Pakai vahchoijun; chungsang ho-a chun vahchoijun.
2
Avantil jousen, Pakai vahchoijun; ami janelten ama vahchoijun.
3
Nisa le lhathah-in ama vahchoijun; nangho ahsi vahho jousen ama vahchoijun.
4
Nangho vanlaijola vanhon ama vahchoijun; vanho chungvuma twipihon ama vahchoijun.
5
Amahon Pakai min vahchoi uhen; ajehchu aman thu apeh-a, amaho kisem ahiuve.
6
Aman amaho tonsot atonsotna din aphutdetnin; apalkehlou diuvin thupeh apen ahi.
7
Nangho dragon ho le twithuh ho jousen; Leisetna konin Pakai chu Vahchoijun;
8
Mei le gel, buhbang le meijun; khopi huijin athu aguilhunsah-in ahi.
9
Molsangho le lhangho; thingphung ga phaho le cedar thingho:
10
Gamsaho le gancha jouse; tolla kitholho le chungleng vachaho:
11
Leija lengho le mihem jouse; pipuiho le leiset thutan ho jouse:
12
Gollhangho le nungah ho; tehse ho le chapangho:
13
Amahon Pakai minchu vahchoi uhen: Ama minbou chu chungnunpen ahin; aloupina leile van chungvuma uma ahi.
14
Mithengte jouse choi-at nan; Israel chate, ama kinaipi mite choi-at nan; Aman amite ki adomsangtai. Pakai chu vahchoijun.
Thado Bible (BSI) 2015
Thadou Kuki CL (Re-edited) Bible - Pathen Thutheng BU 2015 by The Bible Society of India
:
Save Notes