×

NTETO INJEGA CIA 2018

Ngieosio 17

1
Itû MWATHANI mbigua; thikîîra îkaya rîaakwa ûnteethie! Igua ngîkûromba, ntî na waayia.
2
Tega woone arîa ûûma bûrî; ûmpebeerie îgi.
3
Kinya ûgacûnkûûna nkoro yaakwa; kinya ûganceema ûtukû; kinya ûkangeria buru, gûtî meeyia wona ndeene yaakwa; ni ntîaragia mantû jatî ja mma.
4
Ûntû bwegiî mathithio jarîa antû bathithagia, ni nî ndeganîte na mîîtîre ya imaramari nthithagia mantû jarîa uugîîte.
5
Nî mbîtaga na mîîtîre yaaku; na ntîmîebagîra.
6
Itû Mûrungu nî ngûgûkaîra, nîûntû nî mbîjî ûkaambîtîka; Itû nkindîra gûtû gwaaku wigue îromba rîaakwa.
7
Onania kîaao gîaaku kîrîa gîtîthiraga gwe Mwonokia wa barîa bamatûkaaga kîrî gwe rîrîa baithûkîrwa nî anthû baao.
8
Menyagîîra ta kaana ka riitho ûmbithage ta ûrîa nyoni iithaga twanaana twaayo rungu rwa mathagu jaayo.
9
Ûnkaragie kuuma kîrî barîa baaî barîa beendaga kûnthiria; anthû baakwa barîa banthiûrûkîrîte.
10
Bo batî kîaao; na mantû jarîa baaragia no ja rwikumio.
11
Batwîre beengeene naani; nandî nî banthiûrûkîrîte; beeteereete boona kaanya bangwîthia nthî.
12
Bakari ta ngatûnyi yeene nyama, nî ta ngatûnyi îng'eentu iiciithîrîte gîntû.
13
Itû MWATHANI njû, ûbaithûkîre ûbombe ûntunyûkie na rûchiû rwaaku kuuma kîrî barîa baaî.
14
Ntunyûkia na inya yaaku itû MWATHANI, kuuma kîrî barîa beekîte wîrîgîîro bwaao mantûûne ja nthîgûrû. Bakanûkie na îkanûkia rîrîa ûtûûraga wîkîte nîûntû bwaao, Bakanûkie amwe na aana baao, na kinya aana ba aana baao.
15
Îndî ni nî mbijî ngaakwona nîûntû ndî ûmwagîru. Naani rîrîa ngookagîîra rûkîîrî nkaang'anîrwa nî gûkwona ûrîa ûkari.
Songe Bible 2018
KIMERU BIBLE WITH DC Bible Society of Kenya, 2009, 2018
:
Save Notes