1
O Ginoo, daw ano ang akon paghigugma sa imo! Ikaw ang akon mangangapin.
2
Ang Ginoo amo ang nagaamlig sa akon, sia amo ang akon malig-on nga pamakod. Ang akon Dios amo ang akon mangangapin, kag upod sa iya indi ako maano. Sia amo ang akon taming, ginaapinan niya ako agod indi ako maano.
3
Nagpanawag ako sa Ginoo, kag iya ako ginluwas sa akon mga kaaway. Dayawon ang Ginoo!
4
Ang lubid sang kamatayon nagsambod sa akon, ang mga balod nga nagalaglag naglapaw sa akon.
5
Ang lubid sang kamatayon nagsambod sing hugot sa akon, kag ang lulobngan naghanda sang iya tugalbong para sa akon.
6
Nagpanawag ako sa Ginoo sa akon kalisdanan, nagpanawag ako sa akon Dios agod buligan. Sa iya templo nabatian niya ang akon tingog, ang akon pagpanawag sa pagpangayo sing bulig nakalambot sa iya palamatin-an.
7
Dayon ang duta naglinog kag nagkurog, ang mga sadsaran sang mga bukid nag-uyog kag nagtay-og, tungod kay ang Dios nangakig!
8
Nagtub-ok ang aso sa iya ilong, naggwa sa iya baba ang nagaharahara nga kalayo kag nagadabdab nga mga baga.
9
Ginbuksan niya ang langit kag nagpanaog sia, nga may gal-om sa idalom sang iya mga tiil.
10
Nagsakay sia sa kerubin kag naglupad, nag-abot sia sa hinali nga nagasakay sa mga pakpak sang hangin.
11
Gintabunan niya ang iya kaugalingon sang kadudulman, ang madamol nga mga gal-om nga puno sang tubig naglibot sa iya.
12
Yelo nga daw mga bato kag nagadabdab nga mga baga nagikan sa kilat nga yara sa atubang niya, kag naglapos ini sa madamol nga mga gal-om.
13
Dayon ang Ginoo nagdaguob gikan sa langit, kag nabatian ang tingog sang Labing Mataas.
14
Ginpana niya ang iya mga baslay, kag nag-alaplaag ang iya mga kaaway, ginpakirab niya ang kilat, kag nagtal-as sila.
15
Nakit-an ang kadadalman sang kadagatan, kag ang mga sadsaran sang duta nabuksan, sang pagsaway mo sang imo mga kaaway, O Ginoo, kag sang pagdaguob sang imo tingog sa kaakig.
16
Gikan sa langit gindawhat ako sang Ginoo, iya ako ginbatak gikan sa madalom nga tubig.
17
Ginluwas niya ako sa akon gamhanan nga mga kaaway, kag sa tanan nga nagadumot sa akon, kay indi ako makasarang sa ila.
18
Sang yara ako sa kalalat-an ila ako ginsalakay, pero gin-apinan ako sang Ginoo.
19
Ginlikaw niya ako sa katalagman, ginluwas niya ako tungod kay iya ako nahamut-an.
20
Ang Ginoo naghatag sa akon sing balos tungod kay matarong ako, ginbendisyunan niya ako tungod kay wala ako sing sala.
21
Gintuman ko ang kasugoan sang Ginoo, wala ako nagtalikod sa akon Dios.
22
Ginatuman ko ang tanan niya nga mga kasugoan, wala ko ginalapas ang iya mga sugo.
23
Nakahibalo sia nga wala ako sing kasaypanan, nga ang malaut akon ginalikawan.
24
Gani, ginhatagan niya ako sing balos tungod kay nagahimo ako sing matarong, kag nakahibalo sia nga wala ako sing sala.
25
Ikaw, O Ginoo, matutom sa mga matutom sa imo, kag maayo gid sa mga himpit.
26
Putli ka sa mga putli, pero ginadumtan mo ang mga malaut.
27
Ginaluwas mo ang mga mapainuboson, pero ginasumpo mo ang mga bugalon.
28
O Ginoo, nagahatag ka sa akon sing kapawa, ang akon Dios nagasubol sang kadudulman nga yara sa akon.
29
Ginahatagan mo ako sing kusog sa pagsalakay sang akon mga kaaway, kag sang gahom sa pagguba sang ila mga depensa.
30
Daw ano kahimpit sang mga binuhatan sini nga Dios! Daw ano ka masaligan ang iya mga pulong! Kaangay sia sang taming sa tanan nga nagadangop sa iya.
31
Ang Ginoo lamang amo ang Dios, ang Dios lamang amo ang aton mangangapin.
32
Sia ang Dios nga nagahatag sa akon sing kusog, ginaapinan niya ako nga indi maano sa akon dalanon.
33
Ginapalig-on niya ang akon mga tikang subong sang usa, ginabantayan niya ako sa kabukiran.
34
Ginahanas niya ako para sa inaway, agod mabingat ko ang labing mabaskog nga pana.
35
Ikaw, O Ginoo, nagaapin kag nagaluwas sa akon, nangingamhanan ako sa imo pag-atipan, kag ang imo gahom nagaapin sa akon.
36
Tungod sa imo wala ako madakpi, kag wala ako mahulog sa kamot sang kaaway.
37
Ginalagas ko ang akon mga kaaway kag nadakpan ko sila, wala ako mag-untat tubtob malutos ko sila.
38
Ginalampusan ko sila, kag indi na sila makabangon, nalutos sila kag nagahamyangon sa akon tiilan.
39
Ginahatagan mo ako sing kusog sa pag-away, kag pagdaog sa akon mga kaaway.
40
Ginapatal-as mo ang akon mga kasumpong, ginalaglag ko ang mga nagadumot sa akon.
41
Nagapangayo sila sing bulig, pero wala sing may makaluwas sa ila, nagapanawag sila sa Ginoo, pero wala niya sila pagsabta.
42
Ginadugmok ko sila kaangay sang yab-ok nga ginapalid sang hangin, ginatasak ko sila, kaangay sang lunang sa mga dalan.
43
Ginaluwas mo ako sa mabinatuon nga mga katawhan, kag ginapadumala mo ako sang mga kapungsoran, ang mga tawo nga wala ko anay makilala akon na karon mga ginsakpan.
44
Kon mabatian nila ako, nagatuman sila gilayon, ang mga dumoluong nagaduko sa atubang ko.
45
Nadulaan sila sing kaisog, kag gikan sa ila mga pamakod naggwa sila nga nagakurog.
46
Buhi ang Ginoo! Dayawon ang akon mangangapin! Ang Dios amo ang akon manluluwas! Isugid ang iya pagkagamhanan!
47
Ginpadaog niya ako batok sa akon mga kaaway, iya ginpaidalom ang mga tawo sa akon gahom,
48
kag iya ako ginaluwas sa akon mga kasumpong. Tungod sa imo, O Ginoo, nagadaog ako batok sa akon mga kaaway, kag ginaapinan mo ako sa mapintas nga mga tawo.
49
Gani, O Ginoo, sa tunga sang kapungsoran nagadayaw ako sa imo, nagaamba ako sing mga pagdayaw sa imo.
50
Dalagku nga mga pagdaog ang ginahatag sang Dios sa iya hari, ginapakita niya ang iya mapinadayunon nga gugma sa iya pinili, sa kay David kag sa iya mga kaliwat sa walay katubtoban.
Ilonggo Bible 2012
Maayong Balita nga Biblia Philippine Bible Society, 2012