1
E PAPA GƆD, a lɛk yu! Yu na di wan we de gi mi trɛnk.
2
Yu na di wan we de kɔba mi; we a de to yu a de fil sef. Yu dɔn sev mi frɔm mi ɛnimi dɛn an, na yu na mi bakbon.
3
A de pre to PAPA GƆD bikɔs i fit fɔ prez, ɛn i de sev mi frɔm mi ɛnimi dɛn an.
4
Di trap we dɛn bin sɛt fɔ mi, bin dɔn kech mi; i tan lɛk se dɛn bin tay tay mi, we mek a fred.
5
I tan lɛk se dɛn taytay mi ɛn day bin de luk mi korokoro wan
6
Wɛn a bin de pan trɔbul, a pre mek PAPA GƆD ɛp mi; a pre mek PAPA GƆD pul mi pan trɔbul i yɛri mi na ɛvin ɛn ansa mi prea.
7
Ɔlsay de trimbul we yu vɛks, di ath de shek ɛn di mawnten dɛnsɛf de trimbul.
8
Fɔ sho se yu vɛks fɔ tru, smok de kɔmɔt na yu nos, ɔt ɔt kol we de bɔn ɛn faya we de pwɛl tin dɛn de kɔmɔt na yu mɔt.
9
I chɛr di klawd kam dɔŋ fɔ sev mi ɛn put daknɛs bitwin mi ɛn mi ɛnimi dɛn.
10
I yuz in chɛryubim ɛn flay go usay di briz de kɛr am go.
11
I mek di daknɛs kɔba am we i ayd insɛf insay di tik klawd we tan lɛkɛ we ren dɔn dak.
12
We i de na di klawd, di ples so brayt dat laytin ɛn ren we de fɔdɔm lɛk grabul-grabul bigin fɔ kam.
13
We PAPA GƆD, Ɔlmayti de tɔk, in vɔys tan lɛk we tɛnda de rol ɔp klawd, in vɔys kin mek ɛko.
14
I dɔnawe wit di ɛnimi dɛn wit bo ɛn aro ɛn ivin mek laytin fɔdɔm ɛn skata dɛn.
15
We yu de tɔk, wɛn yu vɛks, yu de blo traŋa wan ɛn di vɛri grɔn we di wɔl tinap pan de shek dɔn di wata sɛf na di si de dray.
16
PAPA GƆD pul mi pan siriɔs waala we tan lɛkɛ we man bin de insay dip dip si.
17
I pul mi na mi ɛnimi dɛn an, na di pipul we et mi dɛn an; mi ɛnimi dɛn bin so pawaful dat a nɔ bin fɔ ebul dɛn.
18
We dɛn kin dɔn mek bagin gud wan fɔ kech mi na dɛn trap, PAPA GƆD kin jɛs pul mi kɔmɔt saful na dɛn an.
19
I gi mi alafia; bikɔs i gladi wit mi i sev mi.
20
PAPA GƆD dɔn gi mi di pe we a fɔ gɛt bikɔs mi an klin; a de du wetin i want.
21
A de du wetin in lɔ se, a nɔ sin bikɔs a nɔ tɔn mi bak pan PAPA GƆD.
22
A de du ɔl wetin i se fɔ du. A nɔ disobe am pan natin.
23
Nɔbɔdi nɔ go pɔynt fiŋa pan mi as a de mek shɔ se a nɔ sin.
24
PAPA GƆD sɛf dɔn gi mi wetin a fɔ gɛt; bikɔs mi an klin ɛn a de du wetin i want.
25
Yu nɔ de lɛf udat de fala yu ɔltɛm ɛn udat de du wetin yu want.
26
Udat du gud yu gud to am, bɔt udat wan sho se in gɛt sɛns pan yu go brakɛt yu.
27
Yu rɛdi fɔ ɛp udat nɔ de kak bɔt rɛdi fɔ brok udat de mek gbiŋbin in fɛda dɔŋ.
28
PAPA GƆD, mek a kɔntinyu fɔ si layf ɛn mek layt kam usay bin dak na mi layf.
29
Yu de mek a ebul atak mi ɛnimi dɛn i lɛk aw dɛn plɛnti. A go ivin ebul fɔ klem ay wɔl we dɛn bil fɔ protɛkt dɛnsɛf bikɔs yu de wit mi.
30
Di PAPA GƆD we a de wɔship na PAPA GƆD we nɔ gɛt bɔt. Yu kin biliv wetin i se bikɔs i de kip to in wɔd, In na wanol kɔba klos fɔ udat go to am fɔ kɔba.
31
Udat de we tan lɛk PAPA GƆD di PAPA GƆD we wi de wɔship? Nɔbɔdi nɔ de we tan lɛkɛ am. Na PAPA GƆD we tan lɛkɛ big ston we yu nɔ go muf.
32
In na PAPA GƆD we de gi mi trɛnk fɔ du ɔlkayn tin ɛn i de mek mi we klia.
33
I de mek a nɔ yagba fɔ natin lɛkɛ aw dia nɔ de yagba fɔ rɔn bikɔs in fut dɛn traŋa na grɔn; dɔn a de ebul tinap lɛk man no mata usay a de.
34
I de sho mi aw fɔ fɛt ɛn gi mi di trɛnk fɔ bɛn ayɛn.
35
Yu dɔn gi mi yu big shild we de sev mi ɛn de kip mi sɛf wit yu pawa; yu de yɛri mi prea, ansa mi ɛn gi mi di trɛnk we a nid.
36
Yu mek a waka fri so mi ɛnimi dɛn nɔ ebul mi, a kin tinap ɛn fɛt dɛn lɛkɛ man.
37
Na mi de rɔnata mi ɛnimi dɛn, a de kech dɛn ɛn pas dɛn; a nɔ de blo te a gi dɛn gud dɔti bit.
38
Wɛn a dɔn bit dɛn, na di bit de kil dɛn; so dɛn nɔ de ebul grap pas dɛn day na mi fut.
39
Yu gi mi di trɛnk we a nid fɔ fɛt di batul ɛn mek mi ɛnimi dɛn day;
40
Di wan dɛn we nɔ day rɔnawe ɛn a kil di wan dɛn we et mi.
41
Dɛn ala fɔ mek pɔsin ɛp dɛn, nɔbɔdi nɔ de Dɛn kɔl PAPA GƆD, i nɔ ansa dɛn.
42
We a dɔn bit mi ɛnimi dɛn dɔn, a mas dɛn lɛkɛ se dɛn na dɔti na grɔn.
43
Yu sev mi frɔm dɛn wan we nɔ de yɛri mi wɔd ɔda pipul de lisin to mi fɔrina dɛn ɔl de obe mi.
44
Dɛn ɔl de trimbul naw fɔ pliz mi, di fɔrina dɛnsɛf de dɔbalɛ to mi.
45
Dɛn ɔl dɔn giv ɔp; dɛn dɔn kɔmɔt wit fred ɛn de trimbul na di ples we dɛn bin gɛda de mek gbiŋbin.
46
PAPA GƆD de! Lɛ wi prez am! Lɛ we prez di PAPA GƆD we sev mi!
47
In na PAPA GƆD we de fɛt mi ɛnimi dɛn fɔ mi, i lɛk sɛf na wanol neshɔn na mi ɛnimi, i de put dɛn ɔnda mi fut.
48
I sev mi frɔm mi ɛnimi dɛn ɛn pul mi na di wan dɛn we nɔ wan si mi dɛn an; As fɔ dɛn wan we kin kil pɔsin fɔ natin, i pul dɛn kɔmɔt biɛn mi, saful.
49
Na dat mek a go siŋ ɛn prez yu nem ɛnisay we a de. Na ɛnisay we a de, a go siŋ ɛn prez yu nem.
50
I de gi pɔsin we i pik fɔ bi Kiŋ viktri oba in ɛnimi dɛn. In lɔv nɔ go chenj to Devid ɛn in Jɛnareshɔn. Nain pik Devid ɛn i go lɛk am sote go.
Krio Bible 2013
Krio Bible The Bible Society of Sierra Leone, 2013