1
Ako Yekova, gi ome, mi nakpi nyemu ro.
2
Yekova nga gi mbia, nga gi nyanyaki gbata nga gi batasi, gi Mbori nga gi mbia, mi akida kuti ko; gi vurakube, nga ome gi bata, nga gi sosono kirikiri gbata.
3
Mi akpara fu Yekova, rengbe na tambua aboro ko; si du bati mi ti ni be avurare.
4
Agiri kpio atapa re kirikiri, gu yasika ime nga basapambori nagundesi re;
5
agiri Baatoro kpikpi aboro adu pati re kirikiri, agbina kpio aidi ka zia re.
6
Mi akpari fu Yekova rogo gi fudifudipai, ki nipoi ku ari fu gi Mbori. Ko ki nigi fugore rogo gako yekaru yo, gi kpe ku ari ki ye ki ti ku tuko yo.
7
Kpotosende ki wo ki nikio, amburu abaagangara ki nigbisi, ki du ni zigizozigizo ho bambiko ko azingi.
8
Ngime ki nikuru õko yo, we ngbako ki niriti ahe; kingiriwe ki nirungudi be he.
9
Ko anuga angbangbaturũ a, ki nizorõ, nduunduu bitimo ki du tii nduko yo.
10
Ko ki oro ri keruba, ki gu; ii, ko agu ni ipo ri apupo yuge.
11
Ko asa bitimo ni gako basura pati ko kirikiri, bitimo nga ga aime, na nanaga mai angbangbaturũ yo ni gako bagbuko.
12
Amorogumba na kingiriwe ki kuru rogo gako mai be gu imaima imarago naadu barangba ko.
13
Yekova asu rogo angbangbaturũ yo, gu Ko nga Bahe ki susi, amorogumba na kingiriwe.
14
Ko azumudi gako asiida, ki gbandaka yo; aikpira gumba akĩ, ki nimangi yo gbegberẽ.
15
Ako Yekova, agene baime adu ni kusikusi he, mburu zegino ki du ni ku he, mbiko ga zahe, na gu utura onga nakuru orõ yo.
16
Ko akedi sunge ngbangbaturũ yo, ki di re, ko agbe re rogo dungu aime yo.
17
Ko abatasi re be nyanyaki vurare, na agu yo naasoga re, mbiko i adu na ome ki susi re.
18
I aye fuo re rago gi gberãngbi; ono Yekova adu ni songodire.
19
Ko akusi re ku rogo bakere rago a; ko abatasi re, bambiko mi angba ti ko.
20
Yekova amangi pai fere rengbe na gi rurupai; ko afu mosoro fere rengbe a wa bere adu ni gigiri he.
21
Bambiko mi aka kuti agu apai nga ga Yekova, ka mi aguari nga pati gi Mbori nimangi gbegberẽpai ya.
22
Bambiko gako sarangbanga dunduko adu ku bangire, mi asa nga gako rugaapai ti re ku sa yo a te.
23
Mi azanga pai bara bangiriko, mi ki banda tire be irairapai.
24
Si du Yekova afu mosoro fere ti ni rengbe na gi rurupai, bambiko wa bere adu ni gigiri he bangiriko.
25
Mo nayugo tiro ni boro inapai fu boro inapai; mo nayugo tiro ni ruru ro fu ruru boro;
26
mo nayugo tiro ni gigiri ro fu gigiri boro; mo ki yugu tiro ni keretukeretu boro fu boro vura.
27
Bambiko mo abatasa rungorungo aboro; ono mo agbe bangiri airaenda ku sande.
28
Bambiko mo natiga gi baro; Yekova nga gi Mbori nahasa rago rogo gi bitimo.
29
Ni rengo mi nasusa dagba rikavura mbiko ro; mi nagu ri ngapa mbiko gi Mbori.
30
Ono tipa Mbori ― gako gene du ziazia; gu pai nga ga Yekova i wisigi he si da ti rengo; ko nga vurakube fu agu yo dunduko nafu tiyo ku be ko.
31
Bambiko da du ni Mbori, fuo kina Yekova sa? Da du ni mbia, fuo kina gaani Mbori?―
32
nga gu Mbori naukadi re na ngarã, ki nimbakadi gi gene si du zezere.
33
Ko naipisa ndure si ipi wa ndu ngbiimo, ko namaa re ku ri tumbatumba arago.
34
Ko nayugo pa vura fu bere, bere ki gbe mboto sirigi.
35
Mo afu vurakube ga bata fere a, kumbabero asongodi re ku ari, ga undahe asa re ni bakere boro.
36
Mo akiisi ba ndure tii re yo, kpendure azerenga nga te.
37
Mi ado fuo avurare, ki gbia yo; mi akaraga nga tire te, daho mi anyasi yo ni.
38
Mi ahogi yo puu, ka i arengba nga na guari ya; i atiwi ku tii ndure yo.
39
Bambiko mo aukadi re na ngarã tipa so vura; mo amangi agu yo naaguari kuti re i nugadi bara bangire.
40
Mo amangi avurare a i sa giiyo fere, mi anyasi agu yo naasoga re.
41
I akpari ku ari, ono boro adu nga ho sa ka batasi yo te, i akpari fu kina Yekova, ono ko akaraga nga pai fu yo te.
42
Mi asa yo tubutubu wa nvutu barangba yuge; mi abafu yo ku zegi yo wa gu birikobiriko he du bangiri agene.
43
Mo nabatasi re be gu zuba nga ga gimi aboro; mo asa re mi du ku ri arikaaboro; agu aboro mi aina nga yo ya, i ara fere.
44
Ho i agi pa re ni i agi sangbare ni ba sa; auro aye ka ra fere na goyo.
45
Auro apaya dũ, i akuru rogo gayo kisikisi rago nikio be gunde.
46
Yekova du ni ungako; sambuahe dú fu gi mbia, i kiisi pa Mbori nga ga gi bata,
47
nga Mbori naira gi bape, ki sa aboro ni zogozogo yo ku tii re;
48
nga gu ko nabatasi re be avurare; ii, mo atumba re ku ri agu yo naaguari kuti re; mo natuka re be airazuu.
49
Ako Yekova, si du mi afú atambuahe foro dagba arikaaboro yo, ki nibi bia tambuahe ti rimoro.
50
Ko nafu bakere bata fu gako bakindo; ki niyugu weneringise fu gako mbedimbedi boro, fu Dawidi na angbatungako nye anye kindi.
Zande Bible 1978
La Sainte Bible en Zande Alliance Biblique Universelle, 1978