×

Ang Biblia 1982

SALMO 19

1
Ang mga langit nagapahayag sang himaya sang Dios; kag ang kahawaan nagapakita sang binuhatan sang iya mga kamut.
2
Sa adlawadlaw nagahambal, kag sa gab-i-gab-i nagapakita sing ihibalo.
3
Walay hambal ukon polong; ang ila tingug wala mabatii;
4
ang ila latid naggowa sa bug-os gid nga duta, kag ang ila mga polong sa ukbung sang kalibutan. Sa ila nagpahamtang sia sing kayangkayang nga sa adlaw,
5
nga subong sang nobyo nga nagagowa sa iya hulut, kag nagakalipay subong sang makusug nga tawo sa pagdalagan sa iya dalaganon.
6
Ang iya paggowa kutub sa ukbung sang kalangitan, kag ang iya paglibut tubtub sa mga ukbung sini; kag wala gid sing nalipdan sa iya kainit.
7
Ang kasogoan sang Ginoo himpit, nga nagapahauli sang kalag; ang pagpamatuud sang Ginoo malig-on, nga nagapaalam sang bunayag;
8
ang mga pagtolon-an sang Ginoo matarung, nga nagapasadya sa tagiposoon; ang sogo sang Ginoo putli, nga nagapasanag sang mga mata;
9
ang kahadluk sa Ginoo matinlo, nga nagapadayon sa gihapon; ang mga pagsolondan sang Ginoo matuud, kag matarung sing bug-os.
10
Halandumon sila sing labi pa sa bulawan, sang sa madamu pa nga bulawan nga bus-og; matam-is pa man sa dugus kag sa mga nagatolo sa uludlan.
11
Labut pa paagi sa ila ginapaandaman ang imo alagad; sa pagbantay sa ila may dakung balus.
12
Sin-o bala ang makasapu sang iya mga sayup? hilwaya ako sa akon tinagong mga sayup.
13
Punggi man ang imo alagad gikan sa hungud nga mga sala; dili sila pagpagahuma sa akon! Niyan manginmatarung ako, kag manginhilway ako sa dakung paglalis.
14
Kabay nga ang mga polong sang akon baba kag ang pagpamalandong sang akon tagiposoon mahamut-an sa imo itololok, O Ginoo, igang nakon kag manunubus nakon.
Ilonggo Bible 1982
Ang Biblia 1982 Philippine Bible Society
:
Save Notes