×

EƲEGBE BIBLIA 2014

Psalmowo 20

1
Aƒetɔ netɔ na wò le xaxagbe! Yakob ƒe Mawu la ŋkɔ nekpɔ tawò.
2
Neɖo kpekpeɖeŋu ɖe wò tso kɔkɔeƒe la, eye nedo alɔ wò tso Zion!
3
Neɖo ŋku wò nuɖuɖuvɔsawo katã dzi, eye wò numemevɔsawo nedze eŋu.
4
Newɔ wò dzimedidi dzi na wò, eye wòana nàkpɔ ta na wò ɖoɖowo katã.
5
Míatso aseye le wò dziɖuɖu ta, eye míado aflagawo ɖe dzi le mía Mawu ŋkɔ me. Aƒetɔ neɖo wò biabiawo katã ŋu na wò.
6
Azɔ medze sii be, Aƒetɔ akpe ɖe eƒe amesiamina la ŋu. Atɔ nɛ tso eƒe dziƒo kɔkɔe la, eye wòana dziɖuɖuwoe ŋusẽtɔe to eƒe nuɖusi dzi.
7
Ame aɖewo tsɔa tasiaɖamwo ƒoa adegbee, eye ɖewo tsɔa sɔwo; ke míawo ya míetsɔa Aƒetɔ, mía Mawu la ŋkɔ ƒoa adegbee.
8
Woamu adze anyi; ke míawo ya míatso ɖe tsitre, adzɔ ka.
9
Aƒetɔ, na dziɖuɖu fia la; tɔ na mí, ne míeyɔ wò.
Ewe Bible 2014
EƲEGBE BIBLIA The Bible Society of Togo, 2014
:
Save Notes