×

現代台語譯本羅馬字版

詩篇 22

1
Góa ê Siōng-tè, góa ê Siōng-tè, lí sī-án-chóaⁿ pàng-sak góa? Lí sī-án-chóaⁿ lī góa hn̄g-hn̄g m̄ kiù góa, m̄ thiaⁿ góa ê âu-kiò?
2
Góa ê Siōng-tè ah, góa ji̍t--sî kiû-kiò, lí bô ìn góa; góa mî--sî kiû-kiò, bô tit-tio̍h an-lêng.
3
Lí sī sèng ê Siōng-tè, lí ēng Í-sek-lia̍t ê chheng-chàn chòe pó-chō.
4
Goán ê lia̍t-chó͘ óa-khò lí; in óa-khò lí, lí ū kái-kiù in.
5
In ai-kiû lí, ū tit-tio̍h chín-kiù; in óa-khò lí, lí bô hō͘ in sit-bāng.
6
M̄-kú góa m̄-sī lâng, sī thâng-thōa, hō͘ lâng ki-chhì, siū chèng-lâng khòaⁿ-khin.
7
Khòaⁿ-tio̍h góa ê lâng lóng kā góa thí-chhiò, ngiauh-chhùi hàiⁿ-thâu, kóng,
8
“Lí chiong pún-sin kau-tài Siōng Chú, I ná bô lâi kiù lí? Kì-jiân Siōng Chú kah-ì lí, I ná bô lâi kiù lí?”
9
Lí tùi bú-thai kā góa chiap--chhut-lâi; lí hō͘ góa tī lāu-bú ê heng-chêng tit-tio̍h an-ún.
10
Góa tùi chhut bú-thai chiū kau-thok lí, tùi góa chhut-sì, lí chiū-sī góa ê Siōng-tè.
11
Kiû lí m̄-thang lī góa hn̄g-hn̄g, in-ūi hoān-lān pek-kūn, bô lâng pang-chān góa.
12
Ū chin chōe gû-káng pau-ûi góa; Pa-san ê iá-gû sì-bīn ûi-khùn góa.
13
In chhin-chhiūⁿ sai khui-chhùi tōa-siaⁿ háu, beh thiah-li̍h thun-chia̍h góa.
14
Góa ê khùi-la̍t chhin-chhiūⁿ chúi piàⁿ-liáu-liáu; góa ê kut-thâu lóng thu̍t-lûn; góa ê sim chhin-chhiūⁿ la̍h tī pak-lāi siau-iûⁿ.
15
Góa ê cheng-le̍k ta--khì, chhin-chhiūⁿ phòa--khì ê hiā-phìⁿ; góa ê chi̍h liâm tī téng-kiuⁿ bōe kóng-ōe; lí kā góa pàng tī thô͘-kha, chhut-chāi góa sí.
16
Pháiⁿ-lâng chhin-chhiūⁿ kui-kûn káu pau-ûi góa, chhin-chhiūⁿ sai thiah-li̍h góa ê kha, góa ê chhiú.
17
Góa ê kut-thâu lóng ōe-sǹg--tit; in teh khòaⁿ góa, teh siòng góa.
18
In pun góa ê gōa-phàu, ūi-tio̍h góa ê saⁿ thiu-chhiam.
19
Siōng Chú ah, kiû lí m̄-thang lī góa hn̄g-hn̄g; Siōng-tè — góa ê khùi-la̍t ah, kiû lí kín lâi pang-chān góa.
20
Kiû lí kiù góa thoat-lī to-kiàm, kiù góa ê sìⁿ-miā thoat-lī káu ê sè-le̍k.
21
Kiû lí kiù góa thoat-lī sai ê chhùi; lí í-keng ū thiaⁿ góa, hō͘ góa thoat-lī iá-gû ê kak.
22
Góa beh tùi góa ê hiaⁿ-tī pò-iông lí ê miâ; góa beh tī chū-hōe tiong o-ló lí.
23
Lín kèng-ùi Siōng Chú ê, tio̍h chheng-chàn I. Í-sek-lia̍t ê hō͘-tāi, tio̍h kui êng-kng hō͘ I; Ngá-kok ê hō͘-tāi, lóng tio̍h kèng-ùi I.
24
In-ūi I bōe khòaⁿ-khin sàn-chhiah-lâng, bōe bû-sī in ê khùn-khó͘, mā bōe bīn oa̍t-cháu m̄ chhap in; in kiû-kiò ê sî, Siōng Chú ū kā in thiaⁿ.
25
Góa beh tī tōa chū-hōe tiong chheng-chàn lí ê só͘-chòe; góa beh tī kèng-ùi Siōng Chú ê lâng bīn-chêng siā góa ê goān.
26
Sàn-chhiah-lâng ōe tit-tio̍h pá-chiok; chhē-kiû Siōng Chú ê lâng ōe chheng-chàn I. Goān lín ê sim éng-oán ū oa̍h-khì!
27
Tōe-chiūⁿ só͘-ū ê lâng lóng ōe-kì-tit Siōng Chú ê só͘-chòe lâi kui-sūn I; sè-chiūⁿ bān-cho̍k lóng ōe tī I bīn-chêng kèng-pài.
28
In-ūi chú-koân sio̍k tī Siōng Chú, I sī bān-kok ê chú-cháiⁿ.
29
Tōe-chiūⁿ só͘-ū hù-kùi ê lâng ōe chū-chi̍p lim-chia̍h, kèng-pài; liân teh-beh sí, teh-beh kui-thó͘ ê lâng to ōe tī I bīn-chêng kūi-pài.
30
In ê kiáⁿ-sun ōe ho̍k-sāi I; Chú ê chok-ûi ōe thoân kàu in ê hō͘-tāi.
31
Lâng ōe tùi chiong-lâi beh chhut-sì ê chú-bîn kóng, “Chú í-keng oân-sêng I ê chín-kiù.”
Chinese TTVR
The Bible Society in Taiwan
:
保存笔记